Spain ram i Mirum pa Alvaro Ferraro de la Puerta cu a rumnak vialte kaltaak in siangbawi can awk ah Seminary ah a lut

Alvaro Ferraro de la Puerta cu Seville khua, Spain ah a chuak i cu khua ah a ṭhanglianmi asi. Kum18 asi ah chawleh thiamnak (Business) fim cawn dingah Madrid ah aa ṭhial i kum 30 asi ah company pali a dirh khawh. Hmun tampi ah khual a tlawng i business rian tlangtlanak le rianṭuannak lawng ah caan ahman caah kum caan saupi tiang a biaknak asimi Catholic Bupi he ka rak i hlat tiah amah nih a chim bal. Sihmanhsehlaw, “Mirum tlangval pa nih zungzal nunnak hmuh awk ah zeidah ka tuah lai?” tiah Jesuh sin ah a halnak kong le Jesuh nih, “na ngeihmi thil hna kha va zuar hna law mi sifak kha va pe hna, cun ka zul,” tiah a ti i, mirum tlangval pa cu a ngeihmi chawva a tamtuk caah ngaihchia ngai in a kir,” ti mi kong kha, zapi he biaruahṭinak ah siseh, thlacamnak ah siseh ka lung chung ah a um zungzal tiah Alvaro Ferraro de la Puerta nih a ti. A donghnak ah Bawinu Mary langhnak Lourdes ah a ram kip in a ra mi pumhnak i Missa raithawinak ah  siangbawi bawmtu (altar boy) a rak ṭuan. Atu ahcun Alvaro Ferraro nih a ngeihmi company zuarnak le company uktu le tlangtlatu sinak kha kal taak in Alcala de Henares khua ah siangbawi (tlangbawi) cannak hramthawhnak sianginn “ Seminary” ah a lut. Cuka ahcun Catholic tlangbawi nih a cawn awk asi mi fimthiamnak vialte a cawng lai i kum sarih a rau lai. Amah i a chimmi cu, “Bawipa Pathian nih a kan kawh tik ah, “elaw / yes) tiah kan leh awk asi tiah a ti. A donghnak ah, zei dah na tinhmi le na duh bikmi asi tiah mi nih an hal tik ah, “ Mithiang si ka duh,” tiah a leh hna.