MIZAPI ṬHATHNEMNAK CAAH RIANṬUANNAK

Mizapi ṭhathnemnak ca i rianṭuannak hnuphen ah minung pakhat cio kip kha upat tein hawikomhnak kha a tuahpiaktu dingmi, al khawh a si lomi a hran minung ṭuanvo nawlngeihnak kha an ngeih cio. Mizapi ṭhathnemnak ca rianṭuannak cu minung phu dihlak i kuttang phu vialte ṭhanchonak he zong aa pehtlaimi a si. Minung phu vialte lakah a fiang i a langbikmi cu minung phu vialte caah a hram ah a simi innchungkhar phu a si.

A hnubik ah mizapi ṭhathnemnak ca tuahnak cu zatlang nunphung he pehtlaimi, daihnak, i remnak, dai tein um pengnak, humhimnak hna kha a halmi a si. Cu thil sining cang hna kha minung upadi a zulh i, dai tein sikaan (zulhphung) ning tein umnak in hmuh khawh a si. Cu daihnak zong kha dinfelnak um loin mikip nih hmuh awk le hmuhtlak a simi kha hmuh khawh a si lai lo. Dinfelnak a um lo tikah ṭhihphaihnak hna a chuak ko lai. Ramkip le minung phu vialte cu mizapi ṭhathnemnak ca tuahnak kha a kilven a zohkhenh i an cuaisan piak awk a si lai.

Nihin vawlei pumpi huap minung phu hna umtu ningcang ah hin, dinfel lonak tampi a chuahnak hmun hna ahcun minung hna cu a hran minung ṭuanvo (nuhrin covo) hna kha an sungh caah, mizapi ṭhathnemnak ca tuahnak a hran kha konglam langhterin, minung hna lungrual tein an ummnak le sifakmi u le nau ṭafar hna caah papek in tuah piak cio dingin sawmnak hna kha an tuah cio.

Misifak hna kongkau kha papek in tuahpiak a herhnak kong kan zoh tikah, Vawlei chungchuak thilri vialte cu minung kan dihlak nih hman dingmi thil a si kha kan cohlan cio ko lai. Sihmanhsehlaw kei nih hlandeuh in kan rak chuah (thanh) mi Evangelic thawngṭha in kan hmuhmi lunglawmh thanuamhnak cathluan (biatlangbor 186-201) ah ka rak langhter cang bangin hmasabik zumtu hna nih an theihfian ningin, sifakmi hna i a nganmi huham upat piaknak kongkau kha hmasabik ah tuah a herhmi a si. Pawngkam kha kan zoh hna tikah “misifak hna kha papek a si lai” timi konglam cu mizapi ṭhathnemnak kha hmual ngei tein tuah piak awk minung zulhphung he pehtlaimi a hrampi biatak (bible) a si.