Biatak a Duhmi Pathian a si
Nihin caan ṭha, caan sunglawi a kan petu kan Pathian a hmasabik amin thiang thangṭhat si ko seh. Nihin a voikhatnak kan relmi (Jb. 42:1-3, 5-6, 12-17 / Lk. 10:17-24) hna an si.
A tawinak in kan vun langhter lai, “Sawm sarih le pahnih kha thanuam ngaiin an ra kir i, “Bawipa nangmah min in kan ṭhawl hna tikah khuachia hmanh nih kan nawl an ngaih,” an ti. Jesuh nih a leh hnai, “Satan kha van in nimtlau bantukin a tlak kha ka hmuh. Ngai hmanh u: rul le tlangngaikuang hmanh lamh khawhnak ṭhawnnak le nan ral ṭhawnnak tei khawhnak kan pek hna caah zeihmanh nih an ti kho hna lai lo; sihmanhsehlaw thlarau ṭhalo nih nan nawl an in ngaih hna caah khan i lawm hlah u, vancung i nan min ṭial a si ca tu ah khan i lawm tuah,” a ti hna.
“Nan hmuhmi thil nan hmuh caah hin zeitluk in dah nan caah lunglawmh awk a si. Zeicahtiah fiang tein kan chim hnna, profet tampi hna le siangpahrang hna nih nan hmuhmi hi hmuh an rak duh ko nain an hmu kho lo, theih an rak duh ko nain an thei kho lo,” tiah a ti hna. Bawipa thawngṭhabia a si.
Pathian cu minung thaw chungah a ummi a si lo, minung lungthin chungah a ummi a si. Pathian cu a ruam a kaimi hna sinah a ummi a si lo, toidormi le nunnemmi sinah a ummi a si. Pathian cu lung a puammi hna he a um, a kal ṭimi a si lo, lungthin a thiangmi hna he a um a kal ṭimi a si. Pathian cu mah le mah aa bochanmi hna he lam hlatpi ah a ummi a si.
Toidor le nunnemmi hna sinah a ummi a si. Pathian cu mifim mithiam mi hna an saya a si lo, biatak a duhmi le biatak a kawlmi hna an saya a si. (2Kor. 4:7) ah, “thilti khawhnak ṭhawnnak hi kanmah tuah khawhmi a si lo, Pathian pekmi a si”. (Filip. 2:2-5) ah, “Mah pumpak thangṭhat a kawlmi va si hlah u; mi dang nakin ka ṭha deuh tiah va ruah hlah u. Midang duh ning kha hmuh thiam i zuam u” tiah a ti. (Lk. 1:51) ah, “Ruamkaimi hna khuakhaannak cu a hrawh dih hna”.
Thil ṭha kan tuahmi cungah pawrhlawt ruamkainak a duhmi a si lo. (Is. 14:12-17) ah, “nangmah cu vancung in na tlak cang, hlan ahcun miphun tampi kha a rak tei hna, atu cu vawlei ah hlonh na si cang” a ti. Pathian cu mah le mah aa bochanmi hna he hawikomhnak a ngeimi a si lo, amah aa bochanmi hna he hawikomhnak a ngeimi a si. Kanmah ṭhawnnak, kan fimnak, kan thiamnak bochan loin Pathian ṭhawnnak aa bochanmi le Pathian sinah lawmhnak bia a chimtu si a kan duh.
Thazaang petu /- Saya Francis Khua Pheng