JESUH A HMET LIO BIATHUK HNA
Jesuh a chuah hnu niriat ah cuarpar an tan cu Abraham tefa chung le biakammi miphun chung a lutnak hmelchunhnak a si. (Lk. 2:21). Mah hi nawlbia tangah aa dawrnak (Gal. 44) le Israel biaknak chungah luhnak a si. Hi chungah hin a nunchung vialte aa tel zungzal. Mah hmelchunhnak nih “Khrih ah cuarpar tannak” a simi “Tipil innak” kha a langhter chung. (Col. 2:11-13). Epifani cu Jesuh Khrih Isreal Messiah, Pathian Fapa le vawlei khamhtu, tiah langhternak a si. Epifani puaipi cu nichuahlei mifim hna nih Jesuh an biaknak, Jordan tiva ah tipil a innak le Galilee peng Kanan khua nupi ṭhit puaiah Bawipa aa telnak kong hna kha kawmh in tuah a si. (Mt. 2:1).
Nichuahlei mifim hna cu Lawki biaknak phung aiawhtu an si i anmah chungah Thawngṭhabia nih minung cannak thawngin khamhnak Thawngṭha a cohlangmi vialte lakin hmasabik theitlai kha a hmuh hna. Judah Siangpahrang biak awkah Jerusalem ah mifim hna an ratnak ah, David arfi ceunak chungah miphun vialte siangpahrang a si dingmi an kawl kha a lang. (Mt. 2:2, Num. 24:17-19, Biat. 22:16). An ratnak nih lawki mi hna zong nih Jesuh kha an hmuh kho i Pathian Fapa le vawlei khamhtu tiah an biak khawh ti kha a langhter. Hihi Judah mi hna sin i mernak lawnglawng in a si kho. Zeicahtiah Messiah kong biakamnak cu Biakam Hlun chungah a um bangin anmah hna sin lawngin hmuh khawh a si. (Jn. 4:22, Mt. 2:4-6).
Jesuh kha biakinn ah an pekchanhnak nih Bawipa taa a simi hna lakah fater a sinak kha a hmuhsak. (Lk. 2:22-29, Ex. 3:2, 12-13). Simeon le Anna bantukin Israel mi vialte nih khamhtu kha an hngak. Jesuh cu hlanliopi in hngahmi Messiah, “Miphun vialte ceunak,” le “Israel thangṭhatnak” ti in hngalh a rak si i, “aa ralmi hmelchunhnak” zong a si. Mary caah chimchungmi ngaihchiatnak vainam nih Khrih vailam cung thawinak kha a thanh chung. Cu vailam nih miphun vialte hna hmaika ah Pathian nih a rak timhmi khamhnak kha a rak pek awk a si.
Izipt ram ah an zaamnak le ngakchia hna thah an sinak nih, muihnak nih ceunak a ral kha a langhter. (Mt. 2:13-18). Amah cu amah ram ah a ra i a miphun nih amah kha an cohlang duh lo. (Jn. 1:11). Khrih a nunnak dihlak cu hremnak hmelchunhnak tangah a um. A mi hna nih amah nunnak kha an hrawm ve. (Jn. 15:20). Izipt ram in a rak chuahnak nih Israel mi hna an rak luatnak kha a ruahter ṭhan i Pathian miphun hna luattertu taktak an si kha a langhter. (Mt. 2:15, Hos. 11:1).