Nunnak le a Theipar
Bible relding mi: Isaiah 5:1-7; Psalm 79(80); Philippians 4:6-9; Matthew 21:33-43
Nihin kan relmi cathiang hna nih a kan cawnpiak mi cu “Pathian mi hna cu ṭha tein kilven mi mitsur dum bantuk zohkhenh an si” nak kong a si i Salm chung zongah Pathian nih a mi hna a khamh ṭhan hna lai nak siseh, Paul nih zeitin dah daih nak in kan nun awk a si timi; cun Jesuh nih mitsur dum ah a cang mi thil sining tahchunhnak kong hna an si.
Voi(1)Bible relnak ah dum ngeitu nih zeitin dah a mitsur dum kha ṭha tein a zohkhenh i theitlai tampi a chuah hmuh nak hnga ding caah aa zuam timi a chim.
Hi mitsur dum a timi ah hin Pathian mi hna kong a cawnpiak duh mi a si.
Pathian nih thluachuah tampi a kan pek; nunnak siseh, chungkhar siseh, zumhnak siseh, thiamnak siesh, bawmtu hawikom si hna seh thluachuah tampi in a kan thuamh. Thluachuah a kan pek hnu ah kanmah lawng tein a kan kal tak lo. Pehtlai in a kan zoh khenh peng rih.
Biahal ding a ummi cu: Pathian nih a ka pek mi thluachuah chungin zeibantuk theipar ṭha dah ka chuahpi, ka tlai timi hi a si. Midang pa khat nih a tlai cia cang mi thei kha kan tlai ve ding si loin kan mah tein Pathian thluachuah cungah lehnak ṭha, theipar ṭha fel tein kan tlai khawh ding kha a duh mi cu a si ko.
Bawipa nih kan theipar ṭha a kan zoh zungzal timi zong kan theih ding a si.
Thawngṭhabia chungah Jesuh nih aa lo ngai in a kan cawnpiak ṭhan. Dum ngeitu nih a rianṭuan tu hna kha a dum ah a kalter hna i dum thingthei chuak a eimi hna sinah an ei man a hal ter hna tikah, a cheu cu an rak hlawt hna, a cheu cu a tuk an velh hna i a cheu cu an thah hna. Hmanung bikah dum ngeitu pa nih a fapa ngeihchun te kha a thlah tik zongah an rak thah ṭhiamṭhiam fawn.
Jesuh nih a kan cawnpiak mi cu zeitindah Pathian nih a mi hna he lung sau tein pehtlaihnak a tuah timi kha a si. Ami, a Profet hna a thlah hna, a hnu bikah a Fapa Jesuh a thlah tik zongah an rak hlawtnak kong a chim. Nihin thawngṭhabia hi minung hna nih kan ton cangmi hnu lei a liam cia cang mi kong lawng a si lo. Nihin nang le kei zong nih zeitin dah kan nun timi kong a si.
Pathian nih kan tlai ding ah a kan duhpiak mi a um. Dawtnak maw huatnak? Ngaihthiamnak maw lehrulhnak lungthin? Siannak maw, mah zawn lawng ruahnak dah? Tangdornak lungthin maw puarhrannak lungthin dah? Zumhtlak sinak maw tuah hnga ding mi cungah i phet-zaam tak nak dah? timi hi kan i check hlat cio ding a si.
Kan zumhnak nih a ṭha mi theipar a chuah ter ding a si. Pathian ka zumh ko timi lawng in a za lo. Amah ta, a mi kan si timi kha kan nunnak hrimhrim ah a langh ding a si. Pathian nih a kan hlaw lo. Amah sin panh ṭhan dingin a kan kawh lengmang ko.
Kan lung retheihnak hna le kan harsatnak hna kha amah sinah kalpi in a chia thiammi kan si a herh. Pathian sinah kan chim a herh. Theipar ṭha kan tlai khawh nak hnga ding ca zongah Pathian sin in theih hngalhnak, fimnak kan hal a herh.
Zei bantuk thil hna in dah ka lungthin hi ka sersiam i ka tuahser nak ah ka langhter timi kan i hngalh a herh ko.
Thazaang petu /- Fr. Fidelis Maung Sein