Mah Duhnak Maw, Pathian Duhnak dah?

September (16) ni caah Bupi nih a kan tiamhpiakmi kan bible cathiang hna chungin Pathian bia in thazaang i lak ṭhan hna usih. Voikhat bible kan relmi (1Kor. 12:31-13:13) tiang, cun Luke thawngṭha (Lk. 7:31-35) chung a si. 

Korin cakuat chungah Mithiang Paul nih dawtnak kong he pehtlaiin dawh ngaiin a langhtermi cu, “Dawtnak cu thlachiat a ruat i mi cungah zaangfahnak a ngei. Dawtnak cu a nah a chuak lo, a lung a puam lo i aa pawrhlaw lo. Dawtnak cu tla bulbal in khua a sa lo i amah zawn lawng aa ruat lo. A thin a tawi lo, palhnak kha aa cinken peng lo. Dawtnak cu midang sualnak cungah khan diriam in a um lo, biatak tu ah khan aa lawm. Dawtnak cu a lung a dong bal lo. Zumhnak a ngei, ruahchannak a ngei, a lung a sau i a thin a fual. A hmun zungzalmi thil pathum an um. Cu hna cu zumhnak le ruahchannak le dawtnak an si; cu hna lak i a nganbik cu dawtnak a si” tiah a ti. 

Paul nih dawtnak kong he pehtlai in Khrihfa hna nih dawtnak lungthin kan ngei hnga dingmi kha a langhtermi kha a si. Khrihfa a si lomi hna nih ta hi bantuk dawtnak hi an ngei ve lo maw? Ngei tuk ta! Asiahcun kannih Khrihfa chinchin nih cun, Jesuh Khrih hnu zultu chinchin nih cun hi lungput hi kan ngeih ding a herh hrimhrim ko e; timi Paul nih a cawnpiakmi a langhter duhmi cu a si. Jesuh Khrih cu Pathian a si; Pathian cu dawtnak a si i  Jesuh Khrih hnu a zulmi nih cun cu dawtnak cu kan i nunpi dingmi kan nunnak ah kan langhter dingmi a si kha Paul nihin 1Korin chungah dawh ngaiin a kan cawnpiak. 

Thawngṭhabia chungah minung hna kan sining le minung hna nih kan hmanmi nunzia a langhter. Zeitindah a ti tiah cun, “Tipil petu Johan kha a hung chuak i, rawl a ul i zu zeihmanh a ding lo. Sihmanhsehlaw nan i thawh i khuavang a ngei nan ti. Cun Mi Fapa kha a hung chuak ve i, a ei a ding i nannih nih nan i thawh i, “Hi pa hi zoh hmanh u, mi sa ram le mi zu ram, ngunkhuai khawltu hna le misual hna koi a si nan ti.” Minung hna nih kanmah kan duh ningin midang hna kha nung hna seh, zulh kan duh zia kha zul hna seh, tiin kanmah opinion in pedaan kan tah lengmang. Cucu minung nunzia si. Aho tiang khi dah cuticun kan ti? Pathian tiang hmanh kha kanmah duh ning zul seh, kanmah duh ningin kan tuah piak seh, tiin kanmah leikap tu ah kan hnuh lengmang. 

Jesuh Khrih nih hi nunzia kha nihin ni ah a kan cawnpiak. Pathian nih keimah a duhnak maw a tuah lai (asiloah) keimah nih maw Pathian duhnak kha kan tuah lai timi te kha ruat ko hna usih. Paul nih cun Khrihfa hna nih kan ngeih hnga dingmi dawtnak lungthin kha a kan canwpiak. Cu dawtnak lungthin ah mah zawn ruahnak a um lo, mah zawn aa ruat lo. Midang hna harnak an tonnak zongah diriam in a um lo. Kan Bawipa Jesuh Khrih zultu hna he thawngṭha a chim tikah mi hna nih zei an rel lomi hna sinah dawtnak thawngṭha an phuan, cun Pathian dawtnak kha an langhter, mizaw hna an damter hna, cu tikah nahchuahnak a ngeimi minung taksa, thisa ruah ningin cun hihi Pathian sinin a rami zong a si lai lo; tiin anmah nih Pathian mi sinak hnga ding caah anmah duh ning tein khan nunter an timh tikah Bawipa nih, “hihi cu a palh, nanmah duh ningin Pathian nih an tuahpiak hna ding kha si loin Pathian duh ningin nun ding, tuah ding tu kha nan si” timi kha a langhternak cu a si. 

Sumnak he a rak rami Tipil petu Johan zong kha a kong chiat an ceih. Dawtnak he miphun kip he komh lulh in, ahohmanh thleidannak lungthin ngei loin Bawipa Jesuh a rat tikah zongah Jesuh Khrih kha an thangchiat ṭhiamṭhiam ko. Cucaah kannih Khrihfa hna zong dawtnak lungthin taktak he zeitindah kan hawikom, kan pawngkam hna he kan ṭhut kan dir ṭi timi hi ruat ṭhan hna usih. Mi kong ceih a hmangmi hna he kan um ṭi peng a si ahcun mi kong ceih kan hmang ve ko lai. 

Ṭhatlonak a tuah zungzaltu, a tuah lengmangtu, tuah dingin aa tim lengmangtu hna he kan ṭhut, kan dir, kan kal ṭi a si ahcun ṭhatlonak leiah kan panh. Zehmui kahmi hmun ah kan um a si ahcun Zeihmui rim kan nam ve ko lai. Dawtnak he a nungmi hna he kan kal, kan um ṭi, kan i chonh biak a si ahcun dawtnak lungthin zaangfah thiamnak lungthin, ruahpiak thiamnak lungthin kan ngei ve ko lai. Cucaah Paul i nihin Korin cakuat chungin a kan cawnpiak bantukin dawtnak lungthin ngeih ding, cu dawtnak cu Pathian a si. Zeizong vialte lo dih hmanh sehlaw zungzal a hmun ding cu dawtnak a si. Pathian dawtnak cu zungzal in a hmun ko.

Pakhat le pakhat cungah ṭhatnak kan tuahmi cungah khan Bawipa nih thluachuah a let tampi in a kan pek zungzal ko lai. Khrihfa hna kan nunzia cu pakhat le pakhat cungah dawtnak kan ngeihnak kha a si. Hlan mi hna, hlan Khrihfa hna an i dawtnak thawngin Antioch khua ah hi mi hna cu aa daw tukmi an si ee; tiah mi hna nih an ti. Hi hna cu “Khrihfa” tiah rak kawhmi hna an si bantukin hlan i kan sining te kha nihin ni zongah dawtnak kha tuahsernak in langhter kho ve hna usih. Pathian fanu fapa kan sinak kha Pathian nih a kan dawt bantukin pakhat le pakhat kan i dawtnak ah langhter kho zungzal ve hna usih. 

Thazaang petu /- Fr. Fidelis Maung Sein