Bawinu Mary Lungkuainak Puai (The Seven Sorrows of The Blessed Virgin Mary) September 15

          Bawipa Jesuh Khrih sifah temhnak a intuarnak zarhpini i cawn ningani bantukin September thla a lai ah Catholic Bupi nih voikhattthan in Bawinu Mary i ngaihchiat lungkuainak / fahnak hna kha hleice i cinken tthan awkah puaini a tuahter. Bawinu i ngaihchiat lungkuainak (7) kha DAL (1) NAK ah ka ttial cang.

          Nihin puai ni cu Servites mipi bu (asiloah) Bawinu lungkuainak (7) bu ah (1668) kum ah an rak pek hmasat bik i (1814) kum ah Pope Pius VII cu ramchung in tthawlnak dantatnak in a rak luattthan tikah lunglawmhnak sinak in vawlei pumpi huap Catholic puai ni sinak ah phungning in a rak thanh.

          Hi puai he pehtlai in kan ruahchih dingmi cu Bawinu Mary kha a thinlung a kuaitertu (7), DAL (1) NAK i ka langhter mi kha a si. Bawinu Mary cu ngaihchiat lungkuainak a ton fate a hngal lo konain a lungah aa cinken. Cucaah Nu Mary lungkuainak hmelchunhnak kha thir pum (7) aa tel mi thinlung he an langhter ttheo. Bawinu nihcun kha lungkuainak vialte kha zumhnak in a tei dih i a rak lonh dih khawh. Thir zum aa telmi thinlung kha a phorh khawh i a hnubik ahcun Van Siangpahrang Bawinu timi lukhimh-taraphu kha a rak lak khawh. Kan nunnak ah ngaihchiat lungkuainak kan ton tikah Bawinu kha tahfung ah i chiah in kan i zohchunh awk a si. Bawinu bantukin kan zumhnak sawnter loin kan Khrihfa nunnak lamthluan kha a dongh tiangin kan kal cio ding a si. Rosary thlacamnak, Bawipa Thisa cohlan i einak, Litany saknak, thla fatin hmasabik zarhteni poah ah sualthlah i Bawipa Thisa einak, Bawinu kong he pehtlai mi cauk le ca hna relnak, Bawinu kha kan thinlung chungah hmunhma pek zungzal nak hna cu Bawinu Mary kha upat peknak a si. Bawinu i khamh, zohkhenhnak le lam hmuhsaknak tangah lam kan tlau kho lo tiah Mithiang St. John Bosco nih a rak chim bal.

          Cucaah kan nunnak ah ngaihchiat lungkuainak kan ton tik poah ah kan nu Bawinu Mary sinah zumh bochannak nganpi he naih hna usih! Bawinu Mary sin in Pa Pathian sinah kan herhbau mi veel laksawng hna kha hal zungzal hna usih!