Ngaihchiatnak in Lunglawmhnak ah
Nihin ni ah kan ruah hnga dingmi cu Nu Mary ih ngaihchiatnak puaini a si. Zeicahdah ngaihchiatnak hi Bupi nih puai ah a kan tuahter kan tikah Mithiang Pius (7) nak nih hin AD (1800) lioah hin Pope rian a rak ṭuan lioah khan a ram rianṭuannak in khan ṭhawlnak kha a rak tong. Kha tikah khan ral zamnak hmun khan Nu Mary sinah khan thla a rak cam. A cam hnu ah khan luatnak a hmuh hnuah Nu Mary bawmhnak philh lonak ah khan vawlei khuazakip ummi Catholic Bupi kha hi Nu Mary ngaihchiatnak hmun (7) kha ruah nolh ṭhan i thlacam awkah khan a kan fial.
Hika ah ngaihchiatnak, lungkuainak hmun (7) hi zeidah an si kan ti tikah cun pakhatnak ah Profet Simeon nih Nu Mary sinah khan a rak chimmi, “Hi naute hi hmailei ah na lung hi nam in an sawhtu ah a rak cang te lai” tiah a rak ti i cuticun Nu Mary ngaihchiat lungkuainak hi a hram a rak i thawk.
Cun pahnihnak ngaihchiatnak hmun cu zeidah a si si ahcun Izipt ram Siangparhang nih khan naute kha thah a duh, tiah Vancungmi nih a rak chimh hna tikah khan zanṭim ah Izipt ram ah an rak zam; cucu (Mt. 2:13-21) chungah khan Nu Mary nih Fapa Jesuh Khrih kha a rak zaam pinak kha a ngaichiatnak pahnihnak cu a si.
Pathumnak ah Bawi Jesuh kum (12) a si lioah hin a nu le pa nih Jerusalem khua ah Paschal puai tuah dingah an kalpi loah khan tlunlei ah khan a zul ti hna lo i kha ti khan nithum chung kha an hmuh ti lo i ngaihchia lungkuai lungfak in khan an rak kawl i cu hnuah an rak hmuh ṭhannak kha kan hmuh.
Palinak ah zeidah a si kan ti ahcun, Bawipa Jesuh Khrih vailamtah a put lioah khan Nu Mary nih a rak ton, timi kha (Jn. 19:17) chungah khan kan hmuh.
Cun panganak cu zeidah a s ikan ti ahcun vailamtah cungah an khenh chih i vailam tungah an thlai lioah khan Nu Mary nih khan a hmuh. Kha khan Nu Mary sinah Profet Simeon nih a rak chimmi, “Na lungthin kha nam nih an chunh te lai” a timi kong ah khan a rak tling.
Paruknak ah zeidah a si kan ti ahcun hi vailamtah cungah a thih hnu ah khan Bawipa Jesuh Khrih a ruak cu Nu Mary ṭang cungah an pomter, khakha a paruknak a si i cun Bawipa Jesuh Khrih cu amah thlan a si lomi Ariamatia Josef nih a thih hlanah a rak i tuahciami thlankua chungah khan Jesuh cu an vui. Cucaah hi thlankua i an vui tikah khan Nu Mary i ngaihchiatnak kha a zual khun.
Cucaah hi Nu Mary ngaihchiatnak hmun (7) hi ruah in khan Mithiang Pius (7) nak nih hin hi puai hi vawlei cung khuazakip ah kan tuah lai, tiah a rak tinak kha a si.
Dawtmi u le nau hna hi Nu Mary ngaihchiatnak puai hi kan tuah kan ti tikah hin Nu Mary hi a chuah lawmhnak ni kan tuah bantukin khan amah a chuah hnawh chanmi hi Fapa Jesuh Khrih i khamhnak rian ah khan ngaihchiat lungkuai pah in khan i tel dingah Pathian nih khan a rak sawm. Cucaah hi a ngaihchiatnak hmun (7) hi kan zoh tikah Baiwp Jesuh Khrih hi khamhnak lam lawngte kha an si caah Nu Mary nih Fapa Jesuh Khrih khamhnak lam ah a rak i tel, timi hi kan hmuh.
Cucaah zumtu u le nau, kannih vialte hna zong Jesuh Khrih nih, “Keimah a ka zummi cu, keimah hnu a ka zulmi cu a vailamtah i put seh law ka hnu ka zul seh” tiah a kan ti bantukin khan Nu Mary bantukin khan kannih vialte zong nih vawlei cungah kan harsatnak le kan ngaihchiatnak le kan lungkuainak le kan nganfahnak vialte kha Nu Mary bantukin khan Pa Pathian sinah kan ap i kan tuarpi a si ahcun hi kan ngaihchiatnak le hi kan tuarpi mi kan nganfahnak vialte kha hmunungbik ni ahcun kanmah caah sui luchin ah khan aa cang te lai; timi kha ruat usih.
Hi ngaihchia lungkuai in kan ummi vialte hi kannih vialte nih ngaihchiatnak lawngin khan ruat loin khan hmailei kan sui luchin a cantertu ngaihchiatnak hmun hna an si; timi kha ruat usih law kha ti khan kannih nih thazaang i lak usih law cucun kannih nih vawlei cungah kan tuar kan harmi vialte zong kha zaang tein khan kan phurh khawh lai i cu hlengah zungzal nunnak caah a hrampi zong kha a si lai timi kha kannih nih ruah chih usih law cuticun Bawipa Pathian nih kan tuar, kan harnak ah khan thluachuah a kan pek lai, timi kha kannih nih thazaang i lak usih.
Thazaang petu /- Fr. Abraham Hrang Hit