Bawipa Vailam in Thluachuah lam lei ah

September (14) ni cawn nikhat ni caah Bupi nih a kan timhpiakmi cathiang hna chungin thlarau thazaang i lak ṭhan hna usih. Nihin September (14) ni cu “Bawipa vailam puaini “The Exaltation of the Holy Cross” puai a si. Bawipa a vailam puai ni kha nihin Bupi nih a kan tuahpiak mi cu a si. 

Vailam puaini cu zeiruangah Bupi nih a kan tuahpiak? “Vailam” kan ti tikah hlan ahcun sual dantatnak, mi thahnak, hremnak can i rak hmanmi a si. Sihmanhsehlaw, Jesuh Khrih thawngin vailam cu a thianghlimmi ah a hung cang i cu vailam thawngin le cu vailam huham thawngin, Bawipa nih a hmannak thawngin kannih vialte hna khamhnak lam a hun siter kha nihin ni ah Bupi nih a kan cawnpiakmi cu a si. 

Voikhat bible kan relnak ah (Nub. 21:4-9) chungah kan rel i, Israel mi hna nih Thetse ram ah harnak an ton tikah Moses le Pathian cungah an zai hnawh hna. “Hi ramcar chungah hin na kan hruai i, ei awk ngei lo, din awk ngei lo, chungah le a lin, zaan ah le a kik, harsatnak phunkip ah zeiruang ah dah lunglawm thanuam tein kan umnak Izpit ram in na kan chuahpi i hi hmun ah hin thih dingah na kan hruai” tiah mi hna nih Pathian le Moses sinah complain, an zai tikah Bawipa a dawtnak kha an theithiam ti lo. Bawipa nih fim a rak chimh hna, a rak cawnpiak hna. 

Zei in dah a rak cawnpiak hna? Fahnak peknak in a cawnpiak hna. Harsatnak, fahnak timi hi a damter khotu, a lohter khotu, thluachuah a thleng khotu cu Pathian lawnglawng a si timi kha a rak cawnpiak hna. Cu tikah mei rul a thlah i, Israel mi hna cu rul nih cun a rak cuk hna. Mah cu tikah an i ngaichih ṭhan i Moses sinah cun, “Pathian sinah kan nawl piak ṭhan ko law, kan palh cang, kan palhnak kan i ngaichih cang, kan sualnak kan i ngaichih cang e, rak kan nawl piak ṭhan ko law, rak kan khamh ṭhan ko law” tiah an nawl tikah Pathian nih dar rul ser in cu dar rul a zohmi paohpaoh cu an dam lai e, tiah va kal in va zoh dingah Moses bia a theimi hna, Pathian fialmi bia a theimi hna nih an va kal i an va zoh tikah an dam taktak. 

Minung ruah ningin hi thil cu a si kho lomi a si. “Kan zoh zongah zeidah a thleidannak a um lai e, zeitindah zoh sawhsawhnak cun kan dam lai e” tiah khua a ruatmi an um kho. Cutin khua a ruahmi, lungaw tawmnak a ngeimi hna nih damnak an hmu lo, an thi. Cucaah Pathian bia cu kan nunnak caah a si, Pathian bia cu thluachuah a si. Cu thluachuah nih cun damnak a pek ṭhan. A thianghlim lo, tiah minung nih kan ruahmi hmanh kha Pathian nih a thianter i khamhnak, damnak a petu sign sentut pakhat ah a cang timi kha kan hmuh. Cu bantuk cun Vailam zong hlanchan ah, Rome mi hna chan ah sualnak a ngeimi hna thahnak, hremnak, ningzatnak, tiah rak ruahmi sihmanhsehlaw Jesuh Khrih Pathian nih vawlei mi hna tlanhnak caah a rak hman tikah a thianghlimmi ah a cang, thluachuah ah a hung cang, kanmah thlarua khamhnak ding caah a hung cang a si. 

Cucaah nihin ni ah nang le kei zong Pathian bia cungah lungaw tawmnak kan ngei sual maw? Lungaw tawmnak kan ngeih sual a si ahcun Israel mi hna Pathian bia zum loin, dar rul a zoh duh lomi hna thetse ram ah an thih bantuk kan si sual lai. Pathian bia a zummi, a va kal i a va zohmi hna nunnak an hmuh bantukin kannih zong Pathian nihin ni ah a kan cawnpiakmi kha kan zumh ve a si ahcun, kan zulh ve a si ahcun nunnak kan hmu ko lai, thluachuah kan hmu lai. 

Khrihfa kan si, sihmanhsehlaw a caante ah Pathian thluachuah kha a kawltu kan si sual maw? asiloah Pathian tu a kawl hmasa tu dah kan si timi zong kha ruat ṭhan hna usih. A dammi hna hmuh hnu lawngah zumh, a thluachuah hmuh hnu lawng zumh, ti kan si ahcun Pathian kan hmuh sual lai lo. Pathian bia kan cohlang kho sual lai lo. Pathian nih a kan tinh piakmi kan tlolh sual lai. 

Pathian kha a pakhatnak bik kan kawl a si ahcun thluachuah kan sinah a ra ko lai. Zeicahtiah Pathian cu thluachuah hrampi a si caah a si. A thluachuah kha kan kawl a si ahcun Pathian hmu loin pinpalo ah kan phan sual lai. Nihin i Bupi nih a kan tuah piakmi Pathian nih a kan dawtnak Vailam huham in Vailam puaipi kan tuahmi ah hin kannih vialte zong Pathian bia cungah, Pathian thluachuah cungah, Pathian biakam cungah zumhnak fek tein Pathian a fialmi kha ṭuan khawh i zuam ko hna usih.

Thazaang petu /- Fr. Fidelis Maung Sein