Khrih cungah Dirhmi Nunnak

Bible cathiang hna: 1 Corinthians 10:14–22; Psalm 115:12–13, 17–18; Luke 6:43–49

Nihin kan relmi cathiang hna nih a ruah ṭi dingin a kan sawmmi cu ‘Kan Lungthin khawi ah dah kan hmunhter’ timi i dah ṭhan dingin a kan sawm. Paul nih: “Cucaah ka dawtmi ka hawile hna, siasal kha bia hna hlah u,” tiah a ti. Kan pawngkam ah siasal bantuk thil tampi an um kho; rumnak, thil ti khawhnak, mi nih thangṭhatnak, tibantuk. Pathian can ah kan lungthin chungah hmunhma a lami, hmunhma kan pek mi thil paoh kha siasal an si ko.

Psalm hla nih a timi cu ‘Kannih cu Pathian ngeih mi kan si’ a ti. “Pathian nih a kan theih i thluachuahnak a kan pek ko lai” tiah a ti. Philh mi kan si lo. Pathian nih a theih-hngalh mi kan si. Amah sin kan panh ṭhan dingah a kan sawm zungzal tu a si. Kan tuah hnga ding a simi cu ‘Sermi thil hna kha Pathian aiawh ah chiah lo ding’ a si ko. Zeicah tiah cun Pathian lawnglawng nih a kan khamh khawh i a kan bawmh khawh caah a si. 

Nihin Bawinu Mary mithiang puai zong kan tuah. Sullam a ngei ngaingai mi a si. Khrihfa hna caah Mary timi min cu a sunglawng tuk mi zong a si. Zeicah kan ti a si ahcun ‘A zeizong vialte kha Pathian a pe siang tu Nu a si’ caah a si. Tangdornak lungthin a ngeih mi, nawl ngaihnak lungthin a ngeih mi, zumhnak a ngeih mi, cu vialte nih cun Pathian mithiang kha a thangṭhat khawh. A nunnak hrimhrim in Pathian Sunpar lianngannak kha a thangṭhat khawh caah a si. 

Mary lianngannak le minthannak cu vawlei thil ti khawhnak le sining cungah hmuh khawh ding cu a si lo. Amah nih Pathian bia a theih tikah bia a lehnak “Na bia bangin na sal nu ka cungah si ko seh” tiin a zeizong vialte a pek khawhnak cungah hmuh khawh a si. Ṭihnak in aa tei ter lo. Fahnak a ton te hnga dingmi le hmailei caah ah a ton te hnga dingmi hna cungah lung rethei le van sang in um lo. Harsatnak a ton te lai dingmi nih Pathian cung a zumhnak kha a don kho lo. 

Nihin thawngṭhabia chung zongah Jesuh nih: “A ngan a dammi thingkung nih thei chia a tlai lo, thingkung ṭhalo zong nh thei ṭha a tlai ve lo” tiah a ti.

Thingkung cu a theitlai in theih khawh a si. Cuvebantukin, Khrihfa pakhat sinak cu kan nunnak ah a langh ve ding a si. Khrihfa ka si tiin i auh khawh cu a fawi ngai ko lai. Thlacam zong a fawi ngai ko lai. Cun Pathian kong chim zong a fawi ngai ko lai. Sihmahsehlaw, Jesuh nih thuk deuh in bia a kan hal mi cu: “Zei bantuk thei dah kan nunnak ah kan tlai ve lai” timi hi a si.

Ngaihthiamnak thei kan tlai hna maw, a siloah lehrulh duhnak dah kan tlai? Daihnak maw, tuk dohnak thei dah kan tlai? Mah zawn lawng ruahnak maw, siannak thei ṭha dah kan tlai? Mi dang cung zangfah thiamnak maw, i theihter duh lonak thing thei dah kan tlai? Zumh tlak sinak thei par ṭha kan tlai kho ve cang hna maw?

Mary nih cun aa dawh ngai mi nunzia thei tlai dawh tlai khawh ve dingin lam a kan hmuh sak cang. A chungkhar hna cu Pathian cung hram bunh in a nung mi, a ṭhang mi chungkhar an si. Tangdornak lungthin a ngeih mi nih nawl ngaihnak theipar ṭha a tlai khawh. A zumhnak nih ral ṭhatnak theipar ṭha a tlai khawh. A dawtnak nih mi caah bawmh duhnak le ṭuanpiak duhnak theipar ṭha a tlai khawh. A zumhnak nih intuar khawh nak theipar a tlai khawh. Pathain he naihniam tein a umnak nih zumhtlak a si nak theipar ṭha a tlai khawh. 

Jesuh nih Inn satu pahnih hna tahchunhnak bia a kan chimh. A fimmi pa nih lung cungah a inn kha fek tein a sak i tiva a hung lianh tikah a inn cu fek tein sak mi a rak si caah a hninh in a hnin kho lo. 

Kan nunnak lungpi cu Khrih Jesuh kha a si ko. 

Chungkhar chungah siseh, phu chungah siseh, rianṭuannak ah siseh, pakhat le pakhat kan i pehtlaihnak ah siseh, mah pumpak nunnak ah siseh harnak thilchia le tilet an tho kho tawn. Ngaihchiat caan a um kho, lung dongh caan a um kho. I theih palhnak a um kho. Tukforhnak ton caan a um kho. Fahnak kan ton caan a um kho. Pathian cung kan zumhnak nih zeizong harnak vialte in kan luat lai tiah a kan cawnpiak lo. Sihmahsehlaw, Pathian cung zumhnak kan ngeih mi nih intuar khawhnak thazang le harnak hna lonh khawh nak thazaang hna a kan ngeihter khawh. 

Jesuh vailam pawngah Mary cu a dongh tiang zumh fek tein a um kho mi nu a si. A kan cawnpiak mi cu: Pathian cungah zumhnak kan ngeih a si ahcun fahnak le harnak kan ton tik zongah kan tlu lai lo timi kha a si. Pathian lungpi cungah zumhnak in fek tein a sa kho tu kan si ve cang hna maw?

Thazaang petu /- Fr. Fidelis Maung Sein