Dawtnak in Sersiam

Nihin kan nupi nih thlarau thazaang lak dingin a kan timhpiak mi cathian hna cu 1Corinthians 8:1-7,11-13; Luke 6:27-38 hna hi an si. 

Nihin kan relmi cathiang hna nih a langhter mi cu ‘Mi dang hna he zei nih dah a ṭha mi pehtlaihnak kan ngeihter’ timi a si. Paul nih ralrin a kan pek mi cu ‘Theih hngalhnak nih a kan hlatter lio ah dawtnak tu nih cun pehtlaihnak ṭha a kan ngeihter’ tiah a ti. Thil tampi a theimi kan si men ko lai. Kan zumhnak hna zong zei dah an si tiah kan theih ko men lai. Cun kanmah le kanmah cung zongah thil ti ngamnak ralṭhatnak kan ngei ko men lai. Sihmanhsehlaw, pacang, nu tling pa tling kan sinak cu theih hngalhnak lawngin rinh ding a si lo. Zeitluk in dah dawtnak kan ngeih timi tu in a si deuh.

Theih hngalhnak nih a caan ah cun kan lung a kan puar ter khawh. Kan ruahnak he aa dang deuh in khua a ruat mi hna cungah fawi tein an ṭhat lonak le mah nih ruah ning in biakhiahnak tuah khawh zong a fawi. Paul nih Korin khua mi hna sin ah ralrinnak bia a chimmi cu kan zalonnak le kan theih hngalhnak nih zeitik hmanh ah midang hna ṭhatnak caah dawnkhaan tu si lo ding a si tiah a ti. 

Hi ralrin peknak nih hin kan hmuhnak lawng hi a hmaan mi a si tiah ruah lo ding; a caan ah thil dik-hmaan mi kan chim kan tuah ko men lai, sihmahsehlaw dawtnak nih a langhter ve mi cu a herh ahcun midang ṭhatnak caah cun kan duhnak lawng tuah kha hrial ding a herhnak a langhter ve. Biatak zalonnak timi cu mah duhnak lawng kha duh paoh in tuahser lo ding, dawtnak in tuahser nak tu kha thim ding a si.

Thawngṭhabia nih hi kong he pehtlai in fiang chinchin in a langhter ve. 

“Nannih ka bia a theihmi hna, nan ral kha va daw hna u, an huatu hna cungah khan ṭhatnak va tuah u,” tiah a ti.

Jesuh Khrih nih a chimmi bia hna hi minung kan taksa duhnak le timhnak he cun aa pial kalh ngaingai ko. Mi dang pakhatkhat nih fahnak an kan pek tikah, kan minung sinak nih kan chungin a kan fialmi le a kan leh ter mi cu faknak pek ṭhan ding, leh rul ding, asiloah hrial hna ding, asiloah lungchung ah in chingchiah ding khin a si. Jesuh nih cun phun dang ngai a kan fial, “Dawnak in leh ding” a si a ti.

Jesuh nih a chimmi ah hin ṭhatlonak a tuah tu hna an tuahser mi ah a poi lo tiah a ti a si lo. A kan cawnpiak duh mi cu ‘Mi dang hna ṭhat lonak an tuah mi nih a kan uk ding a si lo’ timi tu kha a si deuh. Mi dang tuahsernak hna paoh kha cu kan tuaitham thiam kho dih men lai lo. Sihmahsehlaw, hrial ding maw a si hrial lo ding timi kha cu thim khawhnak kan ngei ko. Huatnak nih huatnak kha nganter chin. Cu bantuk huatnak hna kha ngaihthiamnak, thlacampiaknak, siannak in leh ding a si kong kha Jesuh nih a kan cawnpiak duhmi cu a si.  

Jesuh nih “Midang kha va soi hna hlah u law nannih zong Pathian nih an soi ve hna lai lo; midang kha sual va phaw hna hlah u law nannih zong Pathian nih sual an phaw ve hna lai lo; midang kha an sualnak va ngaithiam hna u law nannih zong Pathain nih nan sualnak an ngaihthiam ve hna lai” tiah a ti. 

Thazaang petu /- Fr. Fidelis Maung Sein