Pathian Biakam cungah Zumhnak Ngeih
Nihin kan rel mi Bible cathing hna cu Micah 5:1-4; Psalm 12:6-7; Matthew 1:18-23 hna hi an si. Cathiang hna nih an langhter mi cu Pathian biakam hna hi a tling lo bantuk le a si kho lomi bangin kan ruah tawn nain Pathian nih zeitik hmanh ah a biakam a let bal lo timi kha a si. Pathian nih kan caah a timh mi thil hna cu kan i ruah lo caan ah, kan i ruah lomi hna kha hmang in duhsah tein a tlinter ko timi kha kan theih ding a si.
Prophet Micah nih: uktu pakhat Bethlehem in a hung chuak lai tiah a ti. Bethlehem khua cu zeitluk hmanh in a fami khua te sihmanhsehlaw Pathian nih a mi hna caah a tinhpiak mi hna thlanhtu le Uk tu pakhat cu khua in a rak chuak lai tiah a ti. Kum caan saupi a rauh hnu ah Matthew Thawngṭhabia nih Pathian biakam Jesuh Khrih cungah a tlinnak kha a langhter. Mithiang Joseph zong Mary nih zeitin nau a pawi timi a hngal kho lo nain Pathian nih a vancung mi hmang in “Mary nih a pawi mi nau cu Thiang Thlarau thawngin a si” tiah a chimh i ‘Emmanuel’ “Pathian kan sinah a um” timi min sak a si lai nak kong zong fiang tein a hngalhter.
Psalm 12 chung zongah: Pathian biakam cungah zumhnak ngeih ding in a kan cawnpiak. “Pathian bia cu a thianghlim mi a si” a ti. Minung bia hna cu an i thleng kho, an rawk ko, lunghrinhnak a um kho. Sihmanhsehlaw Pathian bia cu zungzal in a hmun, zumhtlak a si a ti. A chimmi paoh a tlinter khawh a si.
Joseph cu Pathian timh mi program ning tein a rak zul tu a si. Pathian nih zeitin dah a timh mi a si hnga timi zong a thei dih kho lo, a phichuak tiangin a ruat kho fawn lo. Sihmahsehlaw Pathian timh mi cungah zeibantuk biahal nak hmanh ngei lo in a rak zulh. A zumhnak le a tuahser nak nih a kan cawnpiak mi cu “Kan theih-hngalh dih lawngah Pathian kha ka zumh lai ti ding a si lo” timi kha a si. Zumhnak timi cu karkhat kan hlaan in a kan hruaitu pa hruainak ah khan zumh bu tein zulh kha a si ko.
“Emmanuel” “Pathian kan sinah a um” timi hi nihin kan relmi cathiang nih a kan cawnpiak duh mi a muru cu a si. Pathian cu harsatnak kan ton caan le kan nun lam fiang fai in kan i theih lo lio caan zongah kan sinah a um ko. Kanmah he aa hlat in a um lo. Jesuh Khrih thawngin a mi hna sinah a ra mi a si. Kan ṭih caan ah kan sin ah a um ko. Kan hmai lei si ning kong kan i fian lo lio caan zongah kan sinah a um ko. Kan caah Pathian biakam a tling lo tiah kan ruah lio caan zongah kan sin ah a um zungzal ko. A kan kal tak bal lo.
Nihin nang lei kei zong Pathian bia thiang cungah zumhnak kan ngeih khawh ve ding in kan cathiang hna nih a kan sawm ve. Joseph bangin kan hngalh khawh lomi kan tong kho ve. Micah chan lio mi hna bangin Pathian biakam kan cungah a tlin ve nak hnga ding zong a hngak mi kan si kho. Sihmahsehlaw, kan Cathiang nih fiang tein a kan cawnpiak mi cu Pathian cu zumhtlak Pathian a si. A biakam hna cu an thiang, zungzal an hmun i kan sin a kan umpi mi zong a si taktak mi a si timi kha kan theih ding a si.
Thazaang petu /- Fr. Fidelis Maung Sein