MARY – ZUNGZAL NGAKNU THIANG
Ngaknu thiang sinak kong zumhnak a thuhnak nih Bupi kha Mary ngaknu thiang a sinak hi a taktak le a zungzal in a si; fa a hrin lio hmanh ah a si, tinak lei ah a rak huai. Khrih hrinnak nih a nu ngaknu thiang sinak kha a zawr ter lo, a thianter deuh. Cucaah Bupi biaknak ah Mary cu “Zungzal Ngaknu Thiang” tiin a thangṭhat.
Hi cawnpiaknak kongah Bible Thiang nih Jesuh le nau kong kha a chim ṭung, tiah biahalnak a chuah ṭheo. (Mk. 3:31-35, 6:3, ICor. 9:5, Gal. 1:19). Bupi nih mah Bible cacaang hna hi Ngaknu Thiang Mary i a fa dang hna tiah a chim duhmi a si lo, ti kha a theih zungzal. A ngaite ahcun Jesuh unau hna timi James le Joseph hna cu a dang Mary fale hna an si.
Cu Mary cu Jesuh zultu a si ve i Mathew nih “Mary dang” tiah a auh. (Mt. 13:55, 28:1, 27:56). Annih cu Biakam Hlun phung ningin Jesuh he a naimi rualchan cingla an si. (Gen. 13:8, 14:16, 29:15, etc.).
Jesuh cu Mary fapa ngeihchun a si. Sihmanhsehlaw thlarau lei nu a sinah cu Khrih nih a khamhmi mi vialte hna sinah a phan dih. A hrinmi Fapa cu Pathian nih a unau hna lakah fater in a chiahmi a si. Cu a unau hna a khamhnak le an hrin ṭhannak ah nu pakhat dawtnak in a telpi ve hna. (Jn.19:26-27, Rom. 8:29, Biat. 12:17).
Pathian tinhnak chungah Mary i ngaknu thiangin nu sinak
Zumhnak mit nih, zeicahdah Pathian nih khamhnak rian a ṭuannak ah hin a Fapa hi ngaknu thiang nih hring seh, ti a duhnak khuaruahhar awk sullam kha biaphuan a zapi zohnak in a hmuh khawh. Mah sullam hna nih hin Khrih le khamhnak rianṭuannak le mi vialte canah Mary pekmi ṭuanvo hna kha a tongh dih.
(1) Mary ngaknu thiang sinak cu BIA minung a cannak ah Pathian lawng hi a hram thawktu a si, ti kha a langhter. Khrih cu minung cannak a lak ruangah Pa he an ni hlat bal lo. Amah nih Pathian sinak ahcun Pathian taktak a si i, minung a sinak ah Mary fapa taktak a si. Sihmanhsehlaw a sinak, phunhnih ah Pathian Fapa taktak a si.
(2) Jesuh cu Thiang Thlarau in ngaknu thiang Mary nih a pawi. Zeicahtiah amah cu Adam thar a si i amah nih sertharnak kha hram a thawk. “Hmasa mi cu vawlei in a si, a pahnihnak mi cu vancung in a si” (ICor. 15:45, 47). A pawi cangka in Khrih minung sinak cu Thiang Thlarau he aa khat. Zeicahtiah Pathian nih, “Thlarau kha a ningpi in a pek” (Jn. 3:34). A tlinnak chungin kannih nih vel cungah khan kan hmuh.” (Jn. 1:16, ICor. 1:18).
(3) Ngaknu thiang nih a pawinak in Jesuh, Adam thar nih zumhnak thawngin Thiang Thlarau chungah fa sinak a hmumi hna kha hrinnak thar ah a hruai hna. “Zeitindah a si khawh lai?” Pathian nunnak chungah i telnak cu “thi in a si lo, Pathian in a si” (Jn. 1:13). Hi nunnak connak cu ngaknu thiang phungin a si i minung sinah pekmi Thlarau laksawng a si. Pathian he i pehtlaihnak ah minung auh kan si zia cu, Mary ngaknu thiang in nu a sinak ah a tling. (IICor. 11:2).
(4) Mary cu ngaknu thiang a si. Zeicahtiah ngaknu thiang a sinak cu Pathian duhnak cungah lungaw tawmnak le a zuangzam mi zumhnak zeihmanh ngei loin le lung cheuchumnak ngeih loin aa peknak hmelchunhnak a si. (ICor. 7:34-35). Khamhtu pa nu a si termi cu amah a zumhnak hi a si. “Mary cu thluachuakmi a si, “Zeitintiah Khrih pumsa kha a pawi ca lawng si loin Khrih ah zumhnak a ngeih caah a si deuh” (St. Augustine).
(5) Ngaknu thiang a si nu zong a simi Mary cu, Bupi hmelchunhnak zong a si, Bupi cu zumhnak he Pathian bia kha a cohlangmi nu ah a cang. Phungchimnak le tipilnak in hrinmi Pathian fale kha a thi ko lomi nunnak thar ah a hruai hna. Amah Bupi hrimhrim hi ngaknu thiang a si. A va (Jesuh) nih a pekmi zumhnak vialte kha thiang tein a zohkhenh.