MARY NGAKNU THIANG SINAK LE PATHIAN NU SINAK

Pathian Nu Sinak

Thawngṭhabia ah Mary cu “Pathian nu” tiah an auh i Elizabeth nih fa a hrin hlan hmanh ah khan, “Ka Bawipa Nu” tiah a rak auh cang. (Lk. 1:43-, Jn.2:1, 19:25, Mt. 13:55). A ngaite ahcun Thiang Thlarau in a pawi; thi le sa in Fapa ah a cangmi cu zungzal in Pathian Fapa a simi le Thumkawmh Pathian ah pahnihnak person a simi Jesuh i a nu a si. Cucaah Bupi nih Mary cu “Pathian Nu” (Theokotos) taktak a si, tiah a ti.

Ngaknu thiang sinak

Khrihfa zumhnak ah a um cangka in Bupi nih Jesuh cu Thiang Thlarau ṭhawnnak lawnglawng in pawi a si ti kha a zumh i a cawnpiak zungzal. Pa hngalh loin a pawinak ah Mary nih a hrinmi Fapa cu Pathian Fapa taktak a si ti ngiatnak, hmelchunhnak in Khrihfa pupa nih an rak hmuh zungzal.

Bible cathiang chungah ngaknu thiang nih a pawi timi hi minung hngalh khawhnak le a si khomi hna nakin a sang deuhmi a si. (Mt. 1:18-25, Lk.1:26-38). Vancung mi nih, “A pawi mi cu Thiang Thlarau in a si,” tiah Joseph kha a ti. (Mt. 1:20). Bupi nih hika zawn ah Profet Isaiah bia a tlinnak kha a hmuh. “Zoh hmanh! Ngaknu thiang nih a pawi lai i fapa a hrin lai,” (Is. 7:14, Mt. 1:23) tiah a ti.