Siannak lungthin

Nihin cathiang kan Nu Bupi nih a kan timh piakmi hna cu(1Kor. 4:1-5; Lk. 5:33-39) tiang a si lai. 

Thawngṭhabia chungah, “Jesuh cu mi a cheukhat nih an thawh i, “Johan zultu pawl cu atu le atu rawl an ul i thla an cam, cun Farasi mi hna zultu pawl zong nih khan cu bantuk ṭhiamṭhiam cun an tuah; sihmanhsehlaw nang na zultu hna cu an ding an ei ko,” tiah an ti. Jesuh nih a leh hna i, “Nupi ṭhit rawl danghnak ah, nupi ṭhitupa cu an sin i a um chungah khan sawmmi hna cu rawl ulhter awk a si, tiah nan ruat maw? Nan ruat hrimhrim lai lo. Sihmanhsehlaw nupi ṭhitupa an sin in a chuah caan kha a phan ko lai i cu tikah cun rawl cu an ul te ko lai,” tiah a ti. 

Kan Bawipa Jesuh Khrih a bia bangin Jesuh Khrih a zum i a zultu pawl, Lamkaltu pawl le a zummi pawl zultu vialte hna hi kan Bawipa Jesuh thihnak in a thawh ṭhan hnu vancung ah a kai i Thiang Thlarau a co hnuah cun atu le atu rawl an ul ko, ti kha cathiang chungah hmuh khawh a si. Asiahcun kan biak kan Pathian nih, khamhtu pa Khrih nih a duhmi rawl ulhnak hi zeidah a si, ti kha biakam hlun chung Profet Isaiah hmurka in a rak chimchung cia. (Is. 58:6-8) ah, “Ka duhmi rawl ulhnak cu hihi a si: Hremnak cikcin kha chat hna u law dinlonak hngawngkual kha phoih hna u law hremmi kha luatter hna u. A rawl a ṭammi kha nan rawl hrawm hna u law inn ngei lo misifak kha tlun inn onh hna u. Aih awk a ngei lomi kha thilpuan ṭhen hna u law nan sahlawh le nan rualchan hna kha bawm loin um hna hlah u. Hi hi ka duhmi rawl ulh phun cu a si” tiah a ti. “Cu ti nan tuah ahcun kan dawt hnanak kha nan cungah zinglei ni ceu bangin a ceu lai i nan hma cu khulrang in a dam lai. Nanmah khamh awkah nan sinah ka um zungzal lai; nan sin i ka umnak nih cun a kam kip in an ven hna lai. Thla nan cam tikah kan leh hna lai. Nan ka chawnh tikah kan chawnh ve hna lai,” tiah a ti. 

(Is 58:3-5) chungah a ti ṭhanmi cu, “Rawl nan ulh pah ah pei nanmah duhnak kha nan kemh chih i nan rianṭuantu kha nan hrem hna cu. Nan puarhrang zungzal, nan i vel, nan i si lengmang. Hi bantuk rawl ulhnak nih hin nan thlacamnak cu a ka ngaihter lai, tiah nan ruat maw? Rawl nan ulh tikah nanmah le nanmah sifah nan i pe, nan lu cu ram hnah bantukin niam tein nan khun i bawmhnak caah khumpuan nan phah i a cungah vutcam nan phulh. Cucu maw rawl ulh nan timi cu a si? Cu nih cun a lung a ton lai ti ah maw nan ka ruah?” tiah Pathian nih a ti. Cucaah cun sual ngaihchihnak caah thilpuan i thleh bauh le buri i khuh le vutcam i phulh hi lenglei in langhternak lawng a si i kan Pathian nih cun chunglei nun kha a zoh i thinlung put kha a zohmi a si. Rawl kan ulh tikah hmual a ngei ngaingai mi cu zeidah a si? 

Kan langhter cang bangin rawl kan ulh tikah rawl eilo lawng kha si loin biakinn ah kal in sual thlahnak sacrament kha laak in, missa pumhnak ah i pumh in, taksa duhnak kha i sum in, sual i ngaihchih in, mi cungah ṭhatnak va tuah, thlacamnak lawng si loin thla kan cam khawh hnuah misifak miherh / mi chambau pawl kha va bawmh, si khawh tawkin kilven, cu hna cu kan biak kan Pathian nih a duhmi rawl ulhnak cu a si. Nihin hi Mithiang Rose ih a puaini a si bantukin mah hi kum (10) faite lawng a si lioah hin Nu Mary nih chonhnak, langhnak a hmumi nute a si i amah nih a timi cu, “Pope i ṭhit hruainak tangah nawl ngai tein nan um awk a si. Pope i ṭhit hruainak tangah zumh awk tlak tein nan um awk a si” tiah Viterbo khuapi ah, “nan sualnak i ngaichih u, Pope hruainak tangah nawl ngai tein nan um awk a si, zumh awk tlak tein nan um awk a si” tiah lampi ah a au. 

Sihmanhsehlaw hruaitu pawl, Siangpahrang pawl nih amah le a chungkhar cu an hlawt. Sihmanhsehlaw zumhnak he ralṭha tein, zumh awk tlak sinak i tlaih in ngakchiate hmanh si ko sehlaw Pathian mithmai zoh in cuticun sual ngaihchih ding a forhfial hna tikah cun AD (1251) kum ahcun Viterbo khua i a ummi hna cu Pathian nawl ngai tein, nun i thlen in Pathian nawl ngai tein kar a hlang ṭhan, ti kha tuanbia chungah kan hmuh khawh. Mithiang Rose hi amah a kum (17) a si ah vawlei nunnak in a dong. A ruak cu nihin ni tiang thu lo man loin a um ko, ti kha Khrihfa Bupi tuanbia ah kan hmuh khawh.

 Zei ruangah dah Pope i chimhhrinnak ah a nawl ngai tein nan um lai, zumh awk tlak tein nan um lai, tiah a ti si ahcun nihin kan relmi bible pakhatnak (1Kor. 4:1-5) lak karah cun, “Kannih cu Khrih sal, Pathian biathli kengtu ah khan nan kan ruah awk a si. Cu bantukin thil a kan fialmi a rian biapi bik cu a Bawipa sin i zumh awk tlak tein a um kha a si” tiah a ti. Cucaah cun Mithiang Paul cu lamkaltu a si bantukin Lamkaltu hna cu Khrihfa Bupi i hruaitu an si. Cu hna lakah, lamkaltu hna vialte lakah Mithiang Peter kha hruaitu bik, a lubik ah Jesuh Khrih nih rian a pek. Cucu ‘Papa’ ti a si i, “Pope” tiah ti a si. 

Cucaah cun Pope ṭhit hruainak tangah nawl ngai tein um kha Khrih hnuzul si i Khrih ṭhit hruainak tangah um cu a si i, cucaah cun Mithiang Rose nih Pope i ṭhit hruainak tangah nawl ngai tein nan um awk a si, tiah nunnak thap in a aupinak kha a si. Cucaah cun duhdawtmi u le nau, nu le pa hna kannih zong amah a zumtu kan si bantuk in Khrihfa kan si i amah a zultu kan sinak ah nun siannak he zumh awk tlak a sal sinak in kan Bawipa Jesuh Khrih hnu cu zul peng ko usih.

Thazaang petu /- Saya Canute Bawi Kam