Khrih Siangpahrang Puai

November 24, 2024

-Daniel 7:13-14

-Revelation 1:5-8

-John 18:33b-37

Tuzarh Zarhpini hi biaknak kum a donghnak Zarhpini a si bantukin “Jesuh Khrih Siangpahrang” puaini tuahnak in Bupi nih a donghter. Jesuh cu van le vawlei Siangpahrang tiin kan zumh kan cohlaan i “Dawtnak, Dinnak” in a Pennak kan phanh khawhnak hnga lam a kan hmuhsaktu a si. Vawlei siangpahrang hna he i lo loin Jesuh cu Pathian nih kan zawn a kan ruahnak kha a nunnak in a kan hmuhsaktu a si.

Jesuh cu dawtnak a ngeimi tuukhal le a ṭhawng a liannganmi Siangpahrang a si. Dinnak le dawtnak he uk awkah kan sin a rami a si. Hmunkip ah ai ṭhekmi minung sihmanh hna seh, tlau hmanh hna seh, asiloah hliamhma a phunphun an tuar zongah, Jesuh cu kan dam ṭhannak hnga le tling tein le hmunkhat tein Pathian sin kan phanh khawh ṭhannak hnga a kan kawl zungzal tu a si. Jesuh pennak cu hi vawlei uktu hna ngeihmi pennak bantukin sihlah hmanhsehlaw, a hnu zultu Khrihfa mi vialte hna nih vacung pennak kha hi vawleicung hrimhrim ahhin pakhat le pakhat kan i dawtnak in kan tlunter ding a si.

Pilat nih Jesuh kha Judah Siangpahrang na si maw tiah a hal tikah Jesuh nih a pennak cu hi vawlei ta a silo tiah a leh. Vawlei uktu bawi hna sinah a hmuhmi ‘nawlngeihnak, upatnak le mah zawn lawng ruahnak’ timi hna kha a chim duhmi a si. Pathian pennak i biapibik ah chiahmi cu hma a pumi hna damter le mitcaw mi hna mit auter kha a si. Cucu Thlarau leiin kan fahnak, cun Pathian dawtnak le ṭhatnak tbk., kan hmuh thiamlo kan theihthiam lomi hna kha chim duhmi a si.

Siangpahrang Jesuh Khrih cu vawlei sualphawt awkah si loin khamh awkah a rami a si. Jesuh cu sermi thil vialte huhphenh awk le a sinah him tein kan umnak hnga caah kan sin a rami a si. Jesuh kha Siangpahrang le Bawi a si tiah na cohlang kho cang maw? Khrih kan Siangpahrang cu upatnak, sunparnakle thangṭhatnak kan pek zungzal awk a si.