Pathian Duhnak Tuah hi Kan Herh Taktak mi cu a si Ko

Nihin kan Nu Bupi nih thawngṭha rel dingin a kan timhpiakmi (Jer. 26:1-9; Ps. 69; Mt. 13:54-58) hna hi an si. 

A voikhatnak Jeremiah bible chungah kan hmuh khawhmi cu Profet Jeremiah cu Pathian nih Judah mi hna sinah a thlah i pumhnak inn vung kal lai ci kaw, “An hmai i ka chiahmi ka nawlbia vialte hi an zulh lo an hnon i, ka profet pawl hi zeiah an rel lo a si ahcun an chungah ka tlunter hnga dingmi chiatnak hi ka tlun lai. Sihmanhsehlaw an sualnak an i ngaihchih a si ahcun an chung i ṭhatlonak ka tlunter hngami hi ka khirh ṭhan lai i thilṭha tu in ka thuamh ṭhan hna lai” timi kong, an sualnak kha va hngalhter i an sualnak kha i ngaichih in Pathian sin i rak kir ṭhan ding kha cucu bible pakhatnak ah kan rel. “An hmaika i ka chiahmi ka nawlbia vialte kha an hnon” tiah a ti. Pathian duhmi le Pathian nawlbia zulh cu zeidah a si kan ti ahcun ‘A thlahmi Fapa Jesuh Khrih zumh’ kha Pa Pathian nih a duh bikmi cu a si. 

Nihin Gospel Matthai kan relmi chungah Fapa Jesuh Khrih cu amah khuacia lila Nazareth khua ah a mi hawi, a laihawi hna nih kan Bawipa Jesuh Khrih an hlawt i pumhnak inn ah a cawnpiak hna i khuaruahhar a tuahmi vialte kha an hmuh tikah cun a hmutu le a zohtu hna cu an khuaruah a har ngai natein a hrihram an zon ṭhan tikah vawlei taksa mit rumro in an zoh i, ‘ziah hi pa nih hin khawika dah a va lak? Hi khuaruahhar tuah khawhnak vialte hi khoika dah a lak? Laktama fapa / Joseph fapa kha a si ko lo maw? Mary fapa kha a si ko lo maw? A naule, a farle hna zong kahin an um ko lo maw?’ tiah vawlei taksa mit zoh in an zoh a si. 

(1Sim. 16:7) ahcun, “Bawipa nih cun mi nih an zoh ningin a zoh lo. Mi nih cun lenglei langh ning kha an zoh, sihmanhsehlaw Bawipa nih cun lungthin kha a zoh” tiah a ti. Pathian hmaika ah Jesuh Khrih a hringtu Nu Mary a rak rum zia le mitṭha pa a simi Jesuh Khrih zohkhenhtu lattama Joseph Pathian hmaiah mithmai ṭha a rak hmuh ning kha phungbia cawnpiaktu, tlangbawi hna, Judah mi hna nih khan an rak hmu kho lo i, vawlei tahnak fung lawngin an tah tikah misifak, mitangvung te dirhmun an si tikah lenglei lawngin an zoh tikah Jesuh Khrih kha zeiah an rel lo i an zawmhtaih, an sarhsat hna nak a si. Duhdawtmi nu le pa, u le nau hna nangtah vawlei tahnak fung in na kal peng rih ko maw? Cawnpiaktu Saya, thlarau leiah kan pa, kan Tlangbawi le an si ah mirum chungkhar in a rak chuahmi an si maw, an hrihram a fek maw? ti kha na zoh lengmang rih maw? Nihin ni ah kan Siangbawi, cawnpiaktu saya te, kan Bishop hna, kan Khrihfabu chung i rian a ṭuanmi hna, hi vialte hna hi Pathian nih a thlahmi hna profet hna an si i, an sifah, an rum aa sai lo, an muisam an pumrua aa sai lo. Pathian nih a thlahmi hna an si, an bia ngaih i cohlan kha Pathian duhmi a si. 

Jesuh Khrih nih, “Ka bia a ngaitu cu a ka thlahtu a bia a ngaih a si i, keimah a ka cohlangtu cu ka Pa an cohlan a si i keimah nih ka thalhmi hna a rak cohlangtu cu keimah an ka cohlang a si” tiah kan Bawipa Jesuh Khrih nih fiang tein a chim. Vawlei mit zoh in, paṭha aw zawn in, a ṭhawngnu, pa mithmai lawng na zoh maw? Cucu Pathian zoh ningin na zoh a si lo i, minung zoh ningin na zoh. Minung zoh ning lawngin kar na hlan a si ahcun, lenglei zoh ning lawngin na zoh a si ahcun Pathian zoh ning he aa ralkah timi kha kannih nih kan theih a herh. 

Nihin hi kan Nu Bupi nih Mithiang Ignatius Loyola puaini sunpar a pek ni, upat a pek ni a si bantukin amah cu Pathian aa bochan taktak mi Mithiang pakhat, minthang ngaingai mi Mithiang pakhat a si i amah i a thlacamnak te hi tlawmpal te hrawmh hna kan duh hna. A thlacamnak te cu hitin a cam, “kaa cinken khawhnak ka thluak le ka thazaang, ka hngalh khawhnak ka thinlung ka thlarau le ka ngaihmi vialte hna hi Bawipa nangmah nih na ka pek dih i na ta si dingin ka cohlang sawh ko” tiah Bawipa laksawng vialte cu a pek ṭhan. A peh ṭhan rihmi cu, “Maw Bawipa, ka ngeihmi vialte hi nangmah sinin ka hmuhmi, na zaangfahnak le na dawtnak thawngin ka comi na laksawng an si caah hi thil vialte chungah hin nawl rak ngeih law nangmah duhning tein na hman nakhnga na kut chungah kan pek” tiah a ti. A peh ṭhanmi cu, “Mawi Bawipa, kei cu na dawtanak le na vel in na ka thuamh ahcun ka caah a tlam a tlin ko caah herhmi dang zeihmanh ka ngei ti lo” tiah Mithiang Ignatius nih thla a camnak te a si. 

Duhdawtmi u le nau, nu le pa hna zeiruang ah dah kan Bawipa Jesuh Khrih nih hin Siangpahrang hna chungkhar le mirum rum hna chungkhat ah hin hmunhma lakin vawlei chungah hin thawngṭha a rak chim in vawlei mi vialte hi a kan khamh lo ka ti a si ahcun kan Bawipa Jesuh Khrih nih Siangpahrang chungkhar hmangin, mirum hna, mi ṭha ṭha hna chungkhar hmangin vawlei sinak hi lak sehlaw, misifak pawl nih an biangam lai lo cu ta! Cucaah cun duhdawtmi nu le pa, u le nau hna vawlei cung i rum hi a herh maw? A herh ko. vawlei cung fim hi a herh maw? a herh ko. Sihmanhsehlaw a herh bik an si bal lo. 

Vawlei cung kan nun lioah hin Mithiang Ignatius nih thla a cam bangin “Bawipa na dawtnak le na vel in na ka thuam ahcun ka caah a tlam a tling ko, ka caah a za ko. Herhmi thil zeihmanh ka ngei ti lo” a ti bangin lung diriam tein a dawtnak chungah lungsi hnangam tein kan caah a thlahmi kan Bawipa Jesuh Khrih cu ka caah a si, kan caah a si” tiah zumh in amah cu i bochan usihlaw, cu a si ahcun kan nunnak ah, kan chungkhar ah Jesuh Khrih nih khuaruahhar thil tampi a tuah lai ti kha hmuh in, zumh in “Van Kanan Rampi” cu zumhnak in karhlang hna usih. Nan dihlak cungah Pathian nih a thluachuah in ṭhumh thlak ko hna seh. Amen

Thazang petu /- Saya Canute Bawi Kam