Teima tein thla na cam bal maw?

November 16, 2024 (Luke 18:1-8)

Teima tein thla kan cam zungzal hna maw? Chim duhnak cu, thla kan cam i kan thlacammi kan hmuh hlan tiang lungdong loin kan cam maw? Nihin kan relmi Thawngṭha ah Jesuh nih a kan cawnpiak duhmi cu thlacamnak ah lungdongh lo ding, teimaa tein cam lengmang ding timi kha a si. Thla kan cam tikah kan thlacam mi kha a si kho lomi thil lo hmanhsehlaw, lungdong loin thlacam ding a si. Zeicahtiah cun, mithiang Pual nih, “Pathian caah a si kho lomi thil a um lo” (Eph 3:20-21) tiah a ti bangin thla kan cammi cu Pathian caah a si kho tuk mi lawngte an si ko. 

Mi a ṭih lomi le aho cung hmanh ah upatnak lungthin a ngei lomi biaceihtu pa kong, nihin Thawngṭhabia ah kan hmuh. Sihmanhsehlaw nuhmeinu nih a hmaanmi biakhiahnak caah a hal peng tikah nuhmeinu duhnak kha ka tuah piak lai tiah a ti. Nuhmeinu nih a duhmi caah dai loin le lungdong loin a hal tikah a duhmi kha tuah piak a si.

Nuhmeinu dirhmun ah hei i chia hmanh u sih law; hi biaceihtu hi mi lungpuam a si ti hngalh ko buin biakhiahnak kan tuah piak dingah kan hal ngam cio hnga maw? Asiloah, um cang ko seh tiin lungdong in kan um hnga maw?

Pathian sin thla kan cam tikah, kan hmuh duhmi hmuh khawhnak hnga caah toidornak le ruahchannak lungthin he kan hal zungzal a hau. Caan saupi kan thlacamnak leh lo sihmanhsehlaw, lungdong loin Pathian sinah kan hal ding kha a biapi mi cu a si.

Pawngkam ah lungdong loin rian a ṭuanmi hna le thla a cammi hna nih an duh mi thil an hmuh zungzal timi kha ahopaoh nih theih lengmang cio mi le toncio mi a si. Cucu nihin kan relmi nuhmeinu kong nih fiang tein a langhter.

Pathian nih na thlacamnak leh loin a um tik caan ah fawi tein na lung a dong maw?