Pope Leo XIV nih Castel Gandolfo i aa dinh caan a donghter
Pope Leo XIV cu July 5 ni thank in aa rak dinhnak hmun Castel Gandolfo in July 27 zanlei 8:30 hnu ah Vatican ah a kir tthan cang.
Pope cu aa dinhnak inn in mawtaw in a chuah lio ah, Pope nih amah thlah awkah aa pummi mibu a ton hna i cu hmun ah aa pummi hna le ngakchia zeimawzat kha thluachuah a pek hna.
“Canticle of Peace” tlangtar in hawikomhnak le thlacam ttinak caan hman tti dingin July 29, Nithumni ah Castel Gandolfo ah a kir tthan te lai.
Laudato Si’ Center for Higher Education le Andrea Bocelli Foundation nih an tinhmi, cu puai cu St Francis of Assisi thihnak kum 800 tlinnak puai ah telh ve mi a si. Zanlei 7 p.m ah thawk a si lai i Pontifical Villas dum chungah tuah a si lai.
(PHOTO: Vatican media)
Castel Gandolfo ah um caan hna
Castel Gandolfo ah ni 23 a um chung ah, Pope Leo nih thlacamnak, ca relnak le lentecelhnak cheukhat tuah nak in a caan a hman hna.
Rome lenglei i Alban tlang cung um Albano Tidil lei a hoih mi khua hmete cu Italy khuate dawh bik hna lakah aa tel ve mi khua pakhat a si.
July 11 ah, Rome Diocese chungin zatlang nun ah harnak a tongmi ngakchia 35 telh in minung 200 hna he pontifical dum ah zanriah ei ttinak zong a ngeih hna.
Zarhkhat hnu, July 18 ah, Albano Diocese nih Apostolic Palace tual ah an tuahmi hlasaknak puai zongah a telpi ve hna.
(Photo: Vatican Media)
Pope cu July 20 ah, Montecassino i Benedictine Abbey ah a va tlawng. July 22 ah, Subiaco khua i Mithiang Benedict le Mithiang Scholastica Biakinn a tlawn hlan July 22 ah Vallepietra khua i a Thumkomh Pathian Biakinn (The Most Holy Trinity) Biakinn zong a va tlawn.
Source: vaticannews