Zuu Kan Rit Ding A Si Lo

Nihin ni caah kan nu bupi nih a kan thim piak mi cathiang voi-1 nak Bible Jeremiah 13:13 chungin thazang i lak ṭi hna u sih. “Khi tikah na thawh hna lai i, “Hi bangin Bawipa nih a ti: Hi ram chung i a ummi vialte hna hi an rit hlan tiang, mitsur hang in ka khahter hna lai – bawiṭhutdan ah a ṭhumi siangpahrang David tefa hna, tlangbawi hna le profet hna le Jerusalem i a ummi vialte hna hi ka ritter hna lai.”

Nihin ni ah chim ka duh mi cu zumtu pakhat, Khrihfa pakhat nih mitsur hang, zuu hi a rit awk a si maw?A din awk a si maw timi kong kha vun ruah ṭi ka duh mi a si. A tawi khawh chungin vun langhter ka duh mi cu: Pakhat nak ah Bible nih mitsur hang kong he pehtlai in, bia dang in kan vun chim a si ahcun ‘Zuu’ kong he pehtlai in zeitin dah a kan cawnpiak timi kha zoh ṭi hna u sih. 

Pakhat nak ah Mitsur zuu a ṭhatnak kha a si. (Biaceihtu 9:13) “Minung le pathian lung a lawmhter” tiah a ti. Biafang hme ‘pathian’ timi a hman caah khuachia lung a lawmh ter ti a si. (Phungthlukbia 31:6-7) chungah “A lung a dong mi kha zuu kha va pe” tiah a ti. Cun Samaria miṭha pa nih lam i damiah nih an tuk-velh mi pakhat mitsur hang a hma ah a toih timi kha kan hmuh. Sii can ah a hman timi kha kan hmuh. Cun mithiang Pual nih Timothy ca a khuat tikah ‘Na paw fah a dam nak hnga mitsur zuu kha tlawmpal in va din piak’ tiah a ti. Cun kan Bawipa Jesuh Khrih nih Canaan khua ṭhitumhnak puai ah khan an mitsur zuu a dih i ti sawhsawh in mitsur zuu a canter timi kha kan hmuh. Cun “Matthai 15:11” chungah “Mi cu a kaa chung i a lutmi nih a thurter lo, sihmanhsehlaw a kaa chungin a chuakmi tu nih hin a thurter” tiah a ti. Cun kan Bawipa Jesuh Khrih nih hmanung bik zaanriah an ei lio ah mitsur zuu kha a thi can ah a hman timi kha kan hmuh. 

Kap khat lei in Bible nih zuu kong he pehtlai in zeitin dah a kan cawnpiak timi zong kha zoh ṭi hna u sih. Zuu a ṭhat lonak, zuu a rit lio ah an thah timi (1Siangpahrang 16:9) chungah kan hmuh khawh. (Judit 10:1-20) chung zongah zuu rit lio ah thah an si nak kha kan hmuh. Cun Epriam mi hna zuu a rimi  hruaitu hna ruangah vawlei ah ka lamh chih hna lai a ti. Cun Isaiah 28 chungah “tlangbawi le profet hna hmanh zuu an ri” a ti. Cun (Isaih 5:11-12) chungah “Nan puai ah zuu he nan i ciah” tiah a ti. Cun (Phungthlukbia 23:31) chungah “Zuu cu na mit in va zoh hlah” a ti. (Leviticu 10:9) chungah “tlangbawi hna raithawinak an tuah hlaan ah zuu din phung a si lo” a ti. Cun (1Tim 3:3-8) chungah “Khrihfa bu hruaitu cu zuu rit hmang mi a si lai lo” tiah a ti. (Galati 5:11-) “Zuu a rimi cu Vancung Pennak chungah an lut kho lai lo” a ti. Cun (Efesa 5:18) chungah “Zuu ri hlah u, Tlarau tu khan khat deuh u” tiah a ti. 

Nihin Bible nih a kan cawnpiak mi cu, Jerusalem i a ummi vialte hna hi an rit hlaan tiang an ram chungah hin zuu ka khah ter lai tiah a ti. David bawiṭhutden i a ṭhu mi vialte hna, profet vialte hna, tlangbawi vialte hna hi zuu ka rit ter dih hna lai a ti. A tang lei kha kan relchap a si ahcun “Cu tikah ka hrawh dih hna lai” a ti. Bible thiang nih a langhter duh mi cu ‘hihi ṭhatnak siloin chiatserhnak kong he aa pehtlai mi a si.’ Pathian thinhunnak in aa thawk mi a si. A ruang cu “Pathian duhnak tuah loin khan siasal kha an biak i Pathian hmai kawl loin siasal kha an biak ruangah khan Pathian nih hnu a chit hna i chiat a serh mi an si” kha kan hmuh mi cu a si. 

Cuasicaah zumtu pakhat, Khrihfa pakhat thlarau lei in kan ṭhan khawh nak ding caah Bible nih a kan cawnpiak mi cu “Zuu dinnak cu chiatserhnak he aa pehtlai mi a si” timi kha a si. “Zuu ri hlah u, Thlarau tu khan khat deuh u” a ti. Zu a rimi cu Vancung Pennak chungah khan an lut kho lai lo a ti. Thlarau lei ah nu tling pa tling si dingin kar a hlang cuahmah mi kannih zumtu hna, Pathian thimmi hna caah cun zuu hi kan rit awk a si lo timi kha Bible thiang nih fiang tein a kan cawnpiak mi cu a si. 

Dawtmi u le nau hna, kan nih vialte hna cu Vancung mi hna bantuk, mithiang mi hna bantukin si dingin Bawipa nih a kan auhmi kan si. Mithiang Paul nih Khrihfa mi hna sin ca a kuat tikah “Kannih cu sualnak tuah lengmang dingah Pathian nih a kan au lo. Mithiang si ding ah a kan auh” a ti. Kannih cu mithiang mi hna pawngkam a tlongleng mi kan si. Bupi nih nikhat voi-1 mithiang hna puai hi a kan tuah pi lengmang. A kan cawnpiak duh mi cu “Kannih cu mithiang hna he khua a sa timi kan si. Mithiang mi hna pawngah a ummi kan si. Mithiang hna he a tlongleng ṭimi kan si” ti nak kha a langhter duh mi a si. 

Thalrau lei a ṭhang chin mi kan si khawh nak hnga ding caah Pathian nih a duh lomi thil vialte kha kal tak in Thlarau he a khat mi fanu, fapa ṭha kan si khawh nak hnga ding caah nihin caan ah thazang pek kan duh hna. 

Thazang petu /- Saya Simon Hram Ling