Reflection for Friday

– November 15, 2024 – (Luke 17:26-37)

Zeicahdah Bupi nih sualnak tuahlo ding le hrial dingin a kan forh? Hlanlio piin Bupi nih Khrihfa mi hna kha sualnak lam hrial ding le Pathian duh ningin nun dingah forhfialnak a rak ngei zungzal ko hna.  Bupi nih zeiruangah dah Bawipa duhning in nun dingin a kan forhfial leng mang hnga?

Hihi a ra laimi biaceihnak ni caah timhtuahnak ttha ngeih khawh ding caah a si. Sihmanhsehlaw, zeitikah dah biaceihnak ni cu a si lai i, tuahsernak ttha a ngeimi hna nih laksawng sunglawi an co te lai ti kha kan hngal kho rih lo. Cucaah, sual ngaihchihnak ngeih dingin Bupi nih a kan cawnpiak zungzalnak kha a si. Ngaihchihnak ngeih ding timi cu, sualnak dantatnak in luatnak hnga caah, cun Pathian lung a tongmi nunzia he nunding caah, khamh “zungzal nunnak laksawng pek” sinak hnga caah a si.

Noah le Lot chan lio ahcun, mi hna cu an ziaza a rawk i  vawlei thilri cung lawng ah an rak buai. Ralrinnak pek an rak si ko nain rawhralnak lam an rak i thim caah hrawh dih an rak si. An duhnak, an hakkauhnak le sual tuahduhnak, cun Pathian sinin a rami ralrin peknak kha  ngaih duh loin mah taksa duhnak lawng an rak i thim caah hrawh dih an rak si.

Noah le Lot chan lio i thil a rak cangmi hna in zeidah kan i cawn khawh cio lai? Nihin ni zongah  cheukhat nih cun mah duhnak lam lawng zulh in, taksa duhnak-sual tuahduhnak lungthin kan ngei peng rih.

Caan ttha kan ngeih lio ah, sual tuahduhnak lungthin khan i mer in, ngol in ‘nunnak lam’ Pathian duhnak lam kha thim ding a si. Sualnak nih tthatnak zeihmanh a chuahpi lo. Rawhralnak lawng a chuahpi.  Sualnak tuah deuh caan paoh ah kan nunnak ah buainak a chuak deuh chinchin i daihnak a zor- a tlau deuh chin tawn. Nifatin kan nunnak ah sualnak lam hna kha hrial khawh i zuam zungzal ding a si.