JESUH KHRIH A FAPA NGEIHCHUNH, KAN BAWIPA DAL HNIHNAK
Khrih: Khrih timi cu Hebrew holh ‘Messiah’ kha Greek holh in an lehmi a si. A sullam cu chiti thuhmi tinak a si. Khrih hi Jesuh min ah a rak cannak cu Khrih sullam nih a saw hi Pathian pekmi rian kha tlamtling tein a ṭuan caah a si. Israel mi hna lakah Pathian rianṭuantu ah thim a simi hna cu amah Pathian min in chiti thuh an rak si. Mah hi siangpahrang le tlangbawi hna caah an rak si i, a caancaan ah profet hna ca zong a rak si ve. (Ex. 29:7, Lev. 8:12, ISam. 9:16, 10:1, 16:1, 12-13, ISiang. 1:39, 19:16). Mah hi Pathian nih a pennak hramthawknak caah a rak thlahmi Messiah caah cun a herh chinchin mi a si. (Ps. 2:2, Lam. 4:26-27). Bawipa Thlarau nih Messiah kha siangpahrang le tlangbawi le profet sinak chiti a rak thuh ding kha a herh hrimhrim. (Is. 11:2, 61:1, Zech. 4:14, 6:13, Lk. 4:16-21). Jesuh nih Israel mi hna nih an rak i ruahchan mi profet, tlangbawi le siangpahrang a sinak kha a tlin ter.
Vancung mi nih tuukhal hna sinah Jesuh chuahnak kong kha an vun thanh tikah Israel mi sin biakam mi Messiah a si, tiin a chim. “Nihin David khua ah Khamhtu Khrih Bawipa cu nan caah a chuah” (Lk. 2:11). A hramthawk in amah cu Pathian nih a thianter i vawlei ah a rak thlahmi a si. Ngaknu Thiang Mary nih a thiang in a pawi. (Jn. 10:36, Lk. 1:35). Pathian nih Joseph cu Mary kha a nupi caah i lak awkah a chimh. Zeicah tiah a pawimi naute cu Thiang Thlarau in a si. Cucaah Khrih tiah auh a simi Jesuh cu David phun chungin hrin a si. (Mt. 1:20, Mk. 1:16, Rom. 1:1, IITim. 2:8, Biat. 22:16).
Khrih nih chiti thuh a rak sinak cu Johan nih tipil a peknak ah khan a lang. Pathian nih Nazareth khuami Jesuh kha Thiang Thlarau le ṭhawnnak chiti a thuh i cucu Israel mi hna sinah an Messiah in a langh awk caah a si. A rianṭuanmi le a bia chimmi nih amah kha, “Pathian a Thiangmi” a si, ti kha a langhter te lai. (Mk. 1:24, Jn. 6:69, Lam. 3:14).
Judah mi a tampi le an ni ruahchannak kha aa hrawmmi Gentel mi cheukhat nih Jesuh cungah Pathian nih bia a rak kammi cheukhat nih Jesuh cungah Pathian nih bia a rak kammi kha an hmuh caah “David Fapa” tiah an auh. (Mt. 2:2, 9:27, 12:23, 15:22, 20:30, 21:9, 15). Jesuh nih mah Messiah min an pekmi kha ṭha tein a cohlan ko. Asinain chan hawimi nih minung tuk ah an ruah i, nainganzi in an ruah bik. Jesuh nih Peter zumhnak kha a cohlan. Peter nih, “Nangmah cu a nungmi Pathian Fapa, Khrih na si,” tiah a sinak kha; vancung in a ruang ṭummi Fapa ka si; aa tinak le temhnak a ingmi sal, sinak khan khamhnak rian a ṭuannak kha a langhter. (Jn. 3:13, Mt. 20:28, Jn. 6:2, Dan. 7:13, Is. 53:10-12). Mi Fapa cu, “Mi nih rianṭuan piak awkah a ra lo, mi rianṭuan piak awkah a ra,” Siangpahrang a sinak sullam taktak cu vailam cungah thlir a si tik lawngah a lang. (Jn. 19:19-22, Lk. 23:39-43). Thawhṭhan hnu lawngah Peter nih Jesuh Messiah a sinak kong kha mi vialte kha a chimh khawh hna. “Cucaah Israel miphun hna nih vailam nan tahmi mah Jesuh kha Pathian nih Bawipa le Khrih ah a ser cang, ti kha fiang tein hngal dih u,” tiah a ti. (Lam. 2:36).