Vancung Pennak Biathli

July 23, 2026 Bupi nih a kan thimpiakmi thawngṭhabia (Mt. 13:10-16) chungah (Mt. 13:11) chung te lawng kha kan rel lai. “Vancung pennak kong biathli cu nannih cu pek nan si cang, sihmanhsehlaw hi hna cu pek an si lo” tiah a ti. Khrih ah dawtmi u le nau hna nihin nifatin kan nunnak ah hin pakhat le pakhat bia kan i ruah tikah hin zeizong vialte kha fiang tein chim loin biathli le tahchunhnak kan hman tawn. Zeicahtiah cutin kan tuah ti a si ahcun a sunglawi tuk i a hngal khomi lawng nih theih hna seh tiin cu biathli kan duh caah a si. 

Nihin kan relmi kan Bible chungah hin kan Bawipa Jesuh Khrih nih a zultu hna sinah ‘Vancung pennak biathli cu nannih cu pek nan si cang, sihmanhsehlaw hi hna cu pek an si lo” tiah a ti. Cucu kan Bawipa Jesuh Khrih kha a zultu hna nih zei ruang ah dah bia na chim tikah hin bianabia hi na hman, tiah kan Bawipa Jesuh Khrih hi bia an hal tikah kan Bawipa Jesuh Khrih nih hin a zultu hna kha fiang tein a chimmi bia a si. “Vancung pennak biathli hngalhnak cu nannih cu pek nan si cang, sihmanhsehlaw hi hna cu pek an si lo” tiah a ti. Zei ruangah pek an si lo tiah cun, ‘a ngeimi cu hawi hlei vuan awk a ngeih tiang chap chin a si lai i, a ngei lomi cu a ngeihmi hnihchun te hmanh kha lak piak a si lai” a ti. Annih sinah bianabia kan hmannak cu hihi a si a ti, ‘a zoh cu an zoh leng ve ko lai, sihmanhsehlaw an hmuh kho lo. A ngai cu an ngai leng ve ko lai, sihmanhsehlaw an thei kho lo” tiah Profet Isaiah nih a rak chimmi kha lak in kan Bawipa Jesuh Khrih nih hi a zultu hna kha a chimhmi a si. Cun a vun peh rihmi a donghnak lei ah, “Nannih cu nan van a va ṭha thiam dah. Nan mit nih a hmuh i nan hna nih a theih. Hihi philh hlah u, nan hmuhmi nan theihmi hi profet tampi hna le Pathian mi tampi hna nih hmuh le theih an duh nain kan hmuh khawh lomi le an theih khawh lomi a si” a ti hna. Kan Bawipa Jesuh Khrih nih a chimmi bia vialte kha siseh, amah kong ah siseh a zultu hna nih an hmuh an theih tikah ‘mi vanṭha tuk nan si e’ a ti hna. 

Nihin pakhat le pakhat bia kan i ruah tikah hin biathli tete hna khi thuh kan hmang tawn. Zei ruangah ti a si ahcun thei khomi hna nih thei hna seh ti kan duh hna caah a si i cuve bantuk in kan Bawipa Jesuh Khrih nih vancung pennak a chim tikah hin a zultu hna kha fiang lak in a chimh hna. Zei ruangah dah dawtnak a ngei mi Pathian nih a cheu cu an zoh ko nain an hmu kho lo, an theih ko nain an hngal kho hna lo. Zeicahtiah thil thuh awk caah bianabia cu a hman. Nihin ah hi kong hi i ruah ṭi hna usih. Bianabia in a chimnak a ruang cu Kan bawipa Jesuh Khrih nih vawlei a um lioah thlaici vorhtu bianabia te hna siseh, fapa tlau pa bianabia hna hi a phunphun a simi bianabia kha a hman hna. Hi bianabia hna hi kan zoh tikah sullam pahnih a ngei. Pakhatnak ah toidornak a kawlmi hna, a zultu hna toidornak he Pathian hngalh a duh taktak mi hna caah cun hi bianabia, kan Bawipa Jesuh Khrih nih a chimhmi, hna kha biaphuan ah an si. 

Bianabia hnulei ah siseh thlarau lei biatak kha an hngalh khawh. Toidornak a kawlmi hna, Pathian hngalh duhnak a ngei taktak mi hna nih cu biaphuan cu an hngalh khawh, biatak cu an hngalh khawhnak a si. Pahnihnak ah aa pawrhlawmi le palhnak a kawlmi phu hna an si. Cucu Farasi mi hna le phungbia cawnpiaktu saya hna, annih bantuk in mah le mah a pawrhlawmi le zeizong vialte ka hngalh dih tiah aa ruahmi hna caah cun kan Bawipa Jesuh Khrih sinah palhnak kawl duhnak a rami hna caah cun hi bianabia a phuanmi, a chimmi vialte kha thuhnak ah aa cang ti kha kan hmuh khawhmi a si. An taksa mit in cun an hmuh khawh nain an thlarau mit cu mitcaw a si caah tuanbia men ah an ruah i an hngal kho lo. Pathian i a sunglawi tukmi vancung pennak biathli cu palhnak a kawlmi le aa pawrhlawmi hna sinah a pe duh hna ti kha kan hmuh khawhmi a si. Cu nakin ngakchia bantuk in aa toidormi, amah a zulmi hna kha biathli hngalh khawhnak a pek hna ti hi nang le kei kan hmuh khawhmi a si i, a zoh cu an zoh leng ve ko, sihmanhsehlaw an hmu kho lo. A ngai cu an ngai len ve ko, sihmanhsehlaw an thei kho lo. 

Cucu zeiruang ah a si? A ruang cu kan Bawipa Jesuh Khrih a chimmi bia hi a hartuk caah a si maw, a si lo an lung a hak tuk caah a si. Bia an theih ko zongah annih cu an vawlei chawva siseh, an i pawrhlawtnak, kan i pawrhlawtnak kan thlah khawh lo tikah siseh, Pathian bia nakin kanmah phunglam ningin nun kan duh deuh tikah kan lungthin innka kan khar tikah zeitluk thawngṭhabia a ṭhat zongah thlarau leiah hnachet le mitcaw kan si peng ko lai. Kan theih ko nain ka hngalh khawh lonak a ruang cu a si. A zultu hna zong an hngalh lo ahcun Bawipa Jesuh sinah a thli tein an ra i hi bianabia hi zeidah a sullam a si, tiah an hal tawn. A kawlmi hna nih cun an hmuh lawng si loin vancung pennak biathli tawhfung an hmuh chih timi hi kan hmuh khawhmi a si. Cucaah Khrih ah dawtmi u le nau hna nihin ah zeibantuk minung dah kan si, Bible kan ngeih, zarh fatin sarmon ṭhaṭha kan ngai, online chung zongin siseh kan ngai ko. Asinain kan lungthin cu a um taktak maw? amah sinah a um taktak maw? A zoh ko nain a hmu lomi, a thei ko nain a hngal lomi kan si sual maw (asiloah) vancung pennak biathli hngalhnak caan ṭha a hmumi zultu tah kan si maw. Thlarau biathli hngalh awkah thluak fimnak nakin thinlung toidornak kha a biapi deuh timi kha dawtmi u le nau hna philh hlah usih. 

Nihin ah Bawipa hmaiah kan thinlung innka ong usih law, “Maw…Bawipa, ka thlarau mit ka au ter ko. Na bia thukpi ka hngalh khawh nakhnga le ka nunnak ah theipar tampi kan tlai khawh nakhnga ka bawm ko” tiah thlacam buin vancung pennak biathli a hngal khomi , tluachuah a hmumi kan si khawh nakhnga thazaang pek kan duh hna. Pathian nih nan dihlak cungah thluachuah zaa in pe ko hna seh. Amen.

Thazang petu /- Saya William