Pakhat le pakhat duhdawt Lungthinternak
Nu le va hna cu pakhat le pakhat upatawk ttuanvo an ngei tiah Mithiang Paul nih chimhhrinnak atuah. “Khrih nan upat bangin pakhat le pakhat i nawl thiam uh. Zeicah tiah Khrih nih Khrihfa bu chungah nawl angei bantukin nupi le zong nih nan vale tangah tlingte in nan i dorawk asi.”
“Vale hna, Khrih nih Khrihfa bu cu a dawt i a nunnak apek bantuk in, nan nih zong nih nan nupi le kha nan dawtve awk asi.” (Efesa 5:21-26).
“Vale nih nan nupi le cu nan pum nan i dawt bantukin nan dawt hna lai i nupi le zong nih nan vale cu nan hmaizoh hna lai.” (Efesa 5:31).
Nu le va hna cu pakhat le pakhat nan i dawt, nan upat veve hna lai. Dawtnak cu forhfial nak (attraction) a um ruangah asi lo. Forhfialnak a um ruangah asi ah cun dawtnak taktak asi lo. Forhfialnak cu nangmah sinin a ra mi asi lo. Nangmah kan dawt na ti si ah cun amah sin a ra mi asi. Cu mi i forhfialnak a umnak a loh ahcun nang cu anih kha na dawt kho ti lai lo. Biana ah nangmah na dawtnak cu na dawtmi forhfialnak ruangah asi ah cun nang cu amah kha na dawt taktak mi asi kho lo. Amah i forhfial khawhnak a thil tikhawhnak lawng kha na dawtmi asi.
Bianabia ah cu mi i aa dawtnak, areng le a rumnak lawng kha na duh mi asi. Cu thil hna tikhawhnak a lohtlau ni ah cun cu mi cung ah na chiahmi dawtnak zong a dongh ve te ko lai.
A dik mi dawtnak cu thinlung chungin ara mi asi. Nunnak in arami asi. Nangmah na thinlung chungin ara mi asi. Parpavuan thil ti khawhnak hna kha hram a bunhlo caah cu thil hna lohtlau hmanhsehlaw cu mi cungah na duh peng khawh rih.
A dikmi dawtnak cu lungtlinter duh dawtnak (appreciative love) asi lo. Mi pakhat kha hram bunh duh mi dawtnak asi. A herh caah dawtnak (need love) he aa thleidan mi asi.
“Aher caah dawtnak” cu mi pakhat kha dawtnak asi lo. Keimah kha cu mipa / nu nih thil pakhat khat a ka pek khawh ruangah siseh, pakhat khat a ka tuah piak khawh ruangah siseh, cu mi kha duh khawhnak menmen asi. Ka herh baunak hna kha aka bet piak khawh ruangah cu mi kha ka dawt asi. Cu mi nih ka herhbaunak kha a bet khawh ti lo nikhat cu a cungah chiahmi dawtnak a lohtlau ni asi ve lai.
Cucaah nang cu mi pakhat kha abiapi ah na chiah ahcun lungtlinter duh dawtnak (appreciative love) in na dawt khawh lawngah na dawtnak cu caansau a nguh te lai.
Mi pakhat kha abiapi ah chiahin duhmi dawtnak cu a dikmi dawtnak asi. Muidawhnak kha hrambunh in na duh si ah cun cu dawtnak cu aathleng thiam mi asi. A ruang cu mui dawhnak cu aa thleng thiammi asi caah asi. Huham chawva rumnak kha hrambunh in na rak duh asi zongah aa thleng thiam mi asi ve caah a rawh a fawi. zeicah kan tiah cun huham chawva rumnak timi cu caan tawite ca lawng asi lo mei. Chun ah hmuh, zanah a tlau kho mi bantuk asi. A minung kha baipi ah chiah i duh mi dawtnak timi tu cu huham he lereng sang chawva ngeihnak he aa pehtlai lo.
Minung kha biapi ah na chiah caah huham chawva a ngeih lo zongah a mui dawhnak a lohtlau zongah na dawtmi kha cu na duh ttiamttiam ko lai. Cu bantuk dawtnak cu a dik. Caan sau a nguh.Thih tiangin kutsih dingmi hna ah a umlo awk attha lo mi dawtnak phun asi.