Raltuknak ruang ah a thimi le har tongmi hna kha philh hna hlah usih

Castel Gandolfo ah, Angelus thlacam a dih ah, Pope Leo XIV nih mipi sin ah a chimmi, “Raltuknak le thahnawnnak nih a hrawhmi ram hna caah a lungre a theihnak kong le cu hna caah daihnak ser khawhnak ding i zuam ding le thlacamnak ah lungkhat thin khat in ṭanlak awk ah Pope nih Angelus thlacam dih ah mipi sin ah forhfialnak a tuah. Cun Piazza della Liberta ah a ra mi mipi hna zong chawnhbiaknak le thazaang peknak a ngei. Ukraine, Iran le Kuwait hna ah a cangmi tukdohnak buainak ah a nunnak a liammi an um.

Ukraine khualipi Kyiv cu Russia missile nih a kah ruangah minung pakhat nunnak a liam i mi tampi nih hliamhma an tuar tiah thawngpang theih asi. Cu lio ah, Ukraine ralkap nih Black Sea le Sea of ​​Azov ah a ummi Russia ralkap kha kan kah ve hna tiah an chim. Cu ve bantuk in, naite ah, U.S. vanlawng nih Iran thlanglei a kah ṭhan ruangah, Tehran um Iran ralkap nih Kuwait ummi U.S. ralkap ummnak hmun hna kha missile le drone in a kah i lehrulhnak a tuah ve. Hi tukdohnak hna nih Iraq ram Kurdistan zong a hnursuan tiah theih asi. Cawn ninga ni ah khan Jordan ram i Muwaffaq al Salti Air Base tuknak he aa pehtlai tiah ruahmi American ralkap pahnih an thi i pakhat a tlau.

Pope aa dinhnak Castel Gandolfo ah a ra mi khua mi hna le lamhlat in a ra mi mizapi hna sin ah Pope nih chawnhbiaknak a ngei.Vawlei cung hmunkip in a ra mi khualtlawng hna chawnhbiaknak a ngeihmi lak ah Saluzzo khua ah (Nunnak puai/Feast of life) caah a ra mi Elvira nih a dirhmi Cenacolo phu, Focolare phu, APRA Summer sianginn in Mexico siangngakchia hna le hmunkip in Catholic Fellowship hna an i tel. Regnum Chriti phu in mino cawnpiaktu (formator) phu hna le Australia in  khualtlawngmi (the Lion Pilgrimage) hna sin ah miraang holh hmang in thazaang peknak a ngeih hna tiah kan theih.