Pathian Duhnak A Tuahmi Hna Cu Ka U le Ka Nau An Si

Nihin ni ah thawngṭha kan i hrawm dingmi cu (Mt. 12:46-50) tiang kha a si lai i, cu chungah zeidah kan hmuh ti a si ahcun Bawipa Jesuh Khrih nih mibupi kha a cawnpiak hna lioah khan bia a chimh hna lioah khan a nu le a u le nau pawl kha amah biaruah awkah, amah biachimh awkah an rak ra ti si.

Minung pakhat nih Bawipa sinah a va chimh i, “na nu le na u le nau pawl kha nangmah biaruah awk an in duh” tiah an rak chimh tikah Bawi Jesuh nih zei a ti, “Ka nu cu aho dah a si? Ka u le ka nau cu aho dah an si? Pa Pathian duhnak tuah aa zuammi, Pa Pathian duhnak a tuahmi hna, hi hna hi ka u ka nau cu an si, ka nu cu an si” tiah Lamkaltu hna kha a sawh hna i kha ti khan a chimh hna. Cucaah nihin thawngṭha kan relmi chungah hin Pa Pathian duhnak tuah a duhmi, Pa Pathian duhnak a kawlmi, tuah aa zuammi pawl kha Bawi Jesuh i a nu le a nau le a u le pawl an si, timi kha a bia tlangpi ah kan hmuh.

Cu a si ahcun kannih vialte nih zeidah kan herh bik kan ti tikah hin Pa Pathian duhnak hi a kawl i a tuahmi kan si paoh ahcun Jesuh Khrih a nu ah khan kan i cang i cun a u le a nau taktak ah khan kan i cang timi kha kannih nih a biapi bik in khan catlang ah vun i lak usih. 

Hi cathiang hi kan zoh tikah unau budang pawl, protestant pawl nih zeitin an ti a si ahcun, ‘Mary hi a rianṭuanmi zei hmanh a si lo. Khamhnak cah zeihmanh a ṭuan lo timi kha a fiantuk caah Jesuh nih a nu kha zei a rel lonak a si. Cun kha lengah a u a nau timi zong kha an um fawn. Cucaah Mary nih hin Jesuh lawng si loin khan fa dang zong a ngei ko” tiin khan budang pawl nih an ruah. Hi tikah hin “Mary zeihmanh a si lonak le cun Joseph he fale a dang an ngei ko” timi Mary i thianhlimnak kha ralchanh in khan bia an chimnak kha kan theih kan hmuh kho. Sihmanhsehlaw hika ah kan Bawipa Jesuh Khrih nih Mary i zei a si lonak kong kha a chim timi kha a si lo i, Mary hi Pathian duhnak a kawlmi le Pathian duhnak a tuahmi vialte hna caah kan i zohchunh awk hnga dingmi Pathian Nu tu a si, timi khi Bawi Jesuh nih hmuhsak a kan duhmi a si timi kha kannih nih theih deuh ding kha a si. 

Cu lengah hika ah Jesuh i a u le a nau hna timi zong kha Mary nih a hrinmi taktak kha an si lo i Mary a u le တစ်ဝမ်းကွဲ pawl i an hrimmi an fale pawl kha an si. တစ်ဝမ်းကွဲ ti zongah khan kanmah kan lai holh ahcun unau thotho kha a si fawn, unau tiin kan kawh ṭhiamṭhiam. Cucaah hi hna hi a u le a nau hna timi zong kha mi dang an si lo i တစ်ဝမ်းကွဲ a u le a nau pawl kha an si. Cucaah “kan upa hi rawl ei zong a hngalh lo hi tah” tiin khan rawl ei fial awkah khan an rak kawlmi kha a si. Sihmanhsehlaw, kha a u le a nau hna kha Pathian duhnak tuah awkah aa zuammi an si maw kan ti tikah an si lo. Vawlei cung i kan u si ṭung, kan nau si ṭung ti i vawlei thisa lawngin khan a ruahmi u le nau deuh kha an si. 

Sihmanhsehlaw, Mary tu cu amah a hringtu hrimhrim Pathian duhnak kha ‘nangmah duhnak tuah cu kaa lawmhnak a si” tiah a tibantuk in khan, Mary nih Pa Pathian duhnak cu si ko seh tiah a ti bantuk in khan, nangmah duhnak bangin ka cungah si ko seh tiah a rak chim bantuk in khan fapa Jesuh Khrih, khamhtu Messiah cu amah chungin kha a rak chuakmi a si. 

Cucaah hmasa bik ah Pathian duhnak a kawlmi le Pathian duhnak a tuahmi kha tahchunhnak ah kan zoh a si ahcun Mary kha number pakhatnak i tahchunhnak ah kan lak hnga dingmi kan Nu a si. Cucaah Mary bantuk in khan kannih hna zong Pa Pathian duhnak hi zeidah a si, Pa Pathian i duhnak kan tuah dingah zeidah kan tuah lai timi kan i cawn, kan i hlan hnga ding ahcun Nu Mary hi kanmah caah zohchunh awk tlak, khamhnak rian ah rian a ṭuanmi vialte hna caah i zohchunh awk kan thlalang a si timi kha nihin ah theihter kan duh hna. 

Cucaah hi Pathian duhnak a kawlmi le Pathian duhnak a tuahmi hna cu ka nu an si, ka u ka nau an si tiah a ti bantuk in khan kannih vialte zong nih Nu Mary bantuk in kha Pa Pathian duhnak kha kan kawl i Pa Pathian duhnak kha tuah kan i zuam zungzal a si ahcun Mary i a fale zong kha kan si lai i Jesuh i a u a nau zong kha kan si lai timi kha kannih nih cawnnak (သင်ခန်းစာ) i lak in Pa Pathian duhnak a tuahmi, a kawlmi, Jesuh a nu le a u a nau si kha i zuam zungzal usih timi kha forh kan duh hna. 

Thazang petu /- Fr. Abraham Hrang Hit