Pathian Mi Hna caah Himnak a Um Ko

Nihin Zarhpini cu zarhkel zarh (16) nak kan phan cang. July thla (19) ni a si. Thawngṭhabia chungah kan relmi; Mt 13:24 chungin tlawmpal kan rak rel lai. 

‘Jesuh nih tahchunhnak biadang pakhat a chimhṭhan hna i, Vancung pennak cu a lo chung i thlaici ṭha a tuhmi pa bantuk a si. Sihmanhsehlaw zan i aa hngilh kar ah a ralpa kha a ra i, belh ci kha rawl ci lakah a vorh i lo diam in a kal. Rawl kung cu a keuh i a thei a chuak tikah belh zong cu an hung lang ve.’ Cun a hme 31 in; ‘Tahchunhnak dang pakhat a chimṭhan, Vancung pennak cu mi pakhat nih a laak i a lo chungah a tuhmi anṭam ci bantuk a si. Cu anṭam cu thlaici vialte lakah a hmebik a si nain, a ṭhan tikah anhring so lakah a nganbik a si i, vanva hna kha an ra i a nge ahkhan bu an i ser tiah a ti.’ Cun thilnung tahchunhnak ah; ‘Tahchunhnak dang pakhat a chimṭhan, Vancung pennak cu nu pakhat nih aa laak i changvut relkhat chungah a phulh i, changvut dihlak in a thawtter dih tu thilnu bantuk a si tiah a ti’. 

Nihin kan nunnak hi kan zoh tikah cun kan pawngkam ah Vancung pennak, Vancung pennak ti cu, hi Vancung pennak kong te ahhin tahchunhnak bia pathumte kha Khrih nih a kan cawnpiak. Cu hlan ah nihin kan relmi Bible vialte kan zoh ahcun, Wisdom timi Fimnak Bible chung inkhan 12:13,16-19 tiang le Salm 86:5,6,9,10 le 15,16a, cun Response kan timi Lehnak ahkhan a hme 5 chungah khan a si. Cun voihnih kan relnak Rome cakuat 8:26-27 tiang le Matthai chung kan relmi Thawngṭhabia vialte kan zoh ahcun; ‘Faith in God’s work-Pathian rian ah zumhnak ngei usih’ timi a tlangpi ah kan hmuh. Cucaah nihin Wisdom kan timi Fimnak Bible hmasa kan relnak ahkhan, ‘zeitintiah nangmah hlei in zeizong vialte a zohkhenhtu Pathian dang pakhat hmanh an um lo. Zeitintiah na ṭhawnnak cu na biaceih dinnak kha a si i, zeizong vialte cungah zaangfah dawtnak a ngeitu Bawipa na si kha a langhter a ti.’

 Cucaah Pathian cu dawtnak le zaangfahnak a ngeitu Pathian a si. ‘Mercy and Justice’ an timi dawtnak le remnak le tling tein, ding tein bia a kan ceihpiak tu Pathian a si timi kha. Nihin Mithiang Paul zong nih Rome cakuat chungah ‘thlarau nih kan santlaih lonak kha bawmh awkah a ra i kanmah kha hnangamnak a kan pek’ a ti. Thlarau nih kan santlaih lonak vialte le kan nunnak vialte kha a zoh a zoh i a kan bawmh i hnangamnak a kan pek, cucu a caan caan ah kan philh, kan nunnak ah kan philh tawn. Thlarau ral ti kan thei lo, thlarau ṭha le thlarau ṭha lo, a bia kan zoh ahcun Thiangthlarau kong kan chim, Thiangthlarau cu kan pawngah a um ko. Cun ‘evil spirit’ an timi thlarau ṭhalo zong a um ko. Sihmanhsehlaw minung nih an uarbik mi cu thlarau ṭhalo, pumsa lei kalnak, nunnak kha.

Sihmanhsehlaw nihin ah Mithiang Paul nihcun, thlarau kha a ra i kan santlaih lonak vialte kha bawmh awkah, cun hnangamnak a kan pek timi kha kan philh lai lo. Cun Thawngṭhabia chungah kan zoh tikah, Vancung pennak kong kha a kan cawnpiak. Cu Vancung pennak cu a lo chungah thlaici ṭha a tuhmi bantuk a si a ti khah; thlaici ṭha. Lo chungah thlaici kha a tuh hna, cu lawng si loin mah a ihkarlak ahkhan miṭhalo pa nih a ra i belh ci kha a vorh i a tliṭhan. Cun an hun keuh tikah rianṭuantu pawl nihkhan ‘asi ahcun mah ram, belh hi kan bawngh dih lai, kan phoih dih lai’ an ti, ‘um ko seh, hi bantuk in khan ra ṭhang ko hna sehlaw a caan a zat tikah belh le ramh kha cu nan phoih dih lai i, mei ah nan thlak dih lai, mei ah nan duah dih lai, mei chungah nan paih dih lai. Cun ka rawl vialte kha nan laak lai i, ka buk chungah nan rawn lai a ti. 

Cucu nihin mah tuanbia te le tahchunhnak kan zoh tikah cun vawlei ah cun thlaici vorh bantukin nihin ah Pathian bia cu kan theih, karlak ah Satan nihcun zeidah; ṭhatlonak thlaici, ruahnak ṭhalo vialte kha a ra vorh ve. Kan ihkar ah timi kha muihnak ahkhan, zan ahkhan, cucu Satan cu muihnak le ceunak lakah muihnak kha a duh bikmi a si. Cucaah kan nunnak te ahkhan mah a chia le a ṭhami ahkhan kan nung kho lai. Sihmanhsehlaw a caan a zat tikah, vawlei caan dongh tikah cun a ṭha lomi Satan rianṭuannak vialte, mah vialte belh bantuk a simi kha cu an laak dih lai, an khawmh dih lai i, Hell ah mei ah thlak an si dih lai a ti. Cucun ṭhatnak a tuahtu le nihin a zumtu vialte kha cu Pathian Vancung Pennak ah, ka buk chung ahkhan nan rawn lai a ti. Cucaah thlaici vorhtu pa cu nihin ah Pathian Khrih rianṭuannak kha a si. A thlaitu cu Pathian bia kha a si. 

Cucaah nihin ah kan nunnak hi kan zoh tikah cun Pathian bia in a nungmi le, cun a chia a ṭha tiin kan nunnak ahhin ‘good and evil’ timi a hrawm in kan nun tikah khan a ṭhatnak lei nunnak kha kan zoh lai. Cucaah ralring tein nun kan i zuam lai. Vancung Pennak le cun Vancung Pennak chungah a nung zungzal mi kan sinak hnga ralring tein timhcia tein kan nunnak kha nihin Pathian nih a kan duh. 

Cucaah mi vialte kan nunnak ahhin a ṭha le a chia he a nung khawh mi kan si bantukin Pathian bia in a nungmi le Pathian duhnak bantukin Vancung Pennak aa hrawmmi kan si zungzal nak kha i zuam cio usih!  

Thazang petu /- Fr. Dominic Kung Tial