Nifatin tein Pathian caah Caan pek ding a si

RVA Hakha Chin service in thawngṭha hrawm ṭi nak a kan zangfah ṭhan tu kan Pathian  min ka thangṭhat. July 17, 2026 nihin ni hna ah Khrihfa bupi nih reldingin Bible a kan timhpiak mi (Matt 12:1-8) chung ta in a si. Hi chungah a tawi nak kan vun char a si ahcun kan Bawipa Jesuh Khrih le zultu hna cu Sabbath ni ah khual an tlawng i cuahcun an paw a ṭam tik ah zultu hna nih favui kha an sih pah hna i an ei pah hna. Cucu Frasi mi hna nih an hmuh hna tikah zei ruangah dah Sabbath ni ah tuah lo hnga ding mi cu na zultu nih an tuah tiah kan Bawipa Jesuh Khrih kha bia an hal i an mawhchiat. Kan Bawipa Jesuh Khrih nih a leh mi hna cu David le a mi hna nih an tuah hnga lo ding mi pei an tuah ko kha. Biakinn chung i an chiah mi changreu thiang kha Tlangbawi lawnglawng nih a ei hnga ding mi, a ei khawh mi changreu a si. Sihmanhsehlaw David le a mi hna nih an ei ko kha ta. Anmah Tlangbawi hrimhrim kha Biakinn chungah Sabbath phunglam kha an buar leng mang na in Moses nawlbia chungah an sual lo ti kha nan rel bal lo maw tiah a ti hna nak le, mah kan Bawipa Jesuh Khrih nih cun mi fapa hi Sabbath cung bawi a si kha nan hngal lo maw? Raithawi nak sa hi Pathian  nih a duh taktak mi a si lo i zangfah nak tu hi a duh deuh a timi kha a sullam nan rak hngal lo maw tiah kan Bawipa Jesuh Khrih nih bia a leh hna nak kha kan hmuh khawh. 

Kan biak kan Pathian  nih zeizong thil vialte hi a ser tikah nikhat nak ni in niruk nak ni tiang a ser i nisarih nak cu aa din. Nisarih nak cu thluachuah a pek i a dang tein a chiah timi cu bia kam hlun ah fiang tein kan hmuh khawh. Pa chan ah kan biak kan Pathian  nih nawlbia 10 a rak pek hna i cu chungah Sabbath ni kha nan ulh lai ti zong in nawl bia fel tein a pek tak hna. Sabbath ni a ulh lo mi hna cu an phun hawi chungin ṭhawl an si lai i an nun nak hrimhrim lak ṭhah an si lai ti kha (Exodus 31:14) ah kan hmuh khawh. Cucu Sabbath a ul lo mi hna i an in hnga ding mi dan tat nak a si. 

Sihmanhsehlaw Sabbath ulh nak ruang ah an co hnga ding mi thluachuah nak a um ve. Cucu (Isaiah 58:13-14) ah kan hmuh khawh mi cu Bawipa nih Sabbath ni cu ni zarh ah nan rel i cu ni ahcun nanmah duh nak tuah kha nan i sum i ka ni zarh cu nan sunhsak i nan upat i cu ni ahcun khualtlawng lo, le rianṭuan lo, le holh sawh sawh lo in nan um ahcun ka rian nan ṭuan nak chungin a chuak mi lawmh nak kha nan hmuh lai. Vawlei cung mi vialte kha nanmah cu kan upat ter hna lai i nan pu Jacob ka pek mi ram kha nanmah nih nan co lai. Hi bia cu Bawipa nih ka chim tiah a ti. Cucu Sabbath a ul mi hna nih an co hnga ding  mi thluachuah nak cu a si.

 Sabbath ni ah khualtlawn a ngah lo. Sihmanhsehlaw kan Bawipa Jesuh Khrih le lamkaltu pawl hna cu khual an tlawng. An tuah hnga lo ding mi Sabbath phung nih a onh lomi cu an tuah a si ahcun cucu a sual maw kan ti a si ahcun, Duh dawt mi u le nau nu le pa hna kan Bawipa Jesuh Khrih hrimhrim kha Pathian  a si i Pathian  nih thiang tein a chiah i Pathian aa dinh mi ni ni le khua kum le khua cung i Bawi a si kha an hngal  lo. A si ahcun Thiang Thlarau kan chan ah hin tah zeitik ni hi dah ni thiang ah kan chiah i hi ni ah hin rian ulh in Pathian  kan thangṭhat ti a si ahcun biakam hlun chung ahcun zarhkhat chungah nisarih nak ni, ca cawn niruk tiah kan timi ni khi bible chung bia in cun nisa rih nak ni a si i cucu Sabbath ni a si. Pa chan ah nisarih nak ni cu Bawipa nih isarel mi phun vialte cu a ulh ter hna a si. Sihmanhsehlaw biakamthar caan a rak phak tikah Thiang Thlarau chan ahcun cu nisarih nak ni cu kan ul ti lo i a nikhat nak ni ti a si lo le a niriat nak ni ti a si i nikhat nak ni ti le niriat nak ni ti hi a sullam ai khat i cucu kan holh kan chan ti luan in cun Sunday Zarhpi ni kan timi hi zarhkhat chungah a nikhat nak hi a si ti mi kha vun theih ter ka duh.

Duh dawt mi u le nau nu le pa hna kan Bawipa Jesuh Khrih nih mi vialte a kan tlanh i vailam cungah thih nak a in i nikhat nak ni theng theng ah a tho. Amah a zumtu mi vialte cu thawhṭhan tefa kan si caah lamkaltu pawl nih an chim mi cu kan Bawipa Jesuh Khrih hi thih nak in thoṭhan hlahsehlaw cu rethei kan tuar i hi tluk in kan chim kan phaun mi vialte hi hlen nak men a si hnga tiah a ti. Cucaah Lamkaltu hna nih a chan chan in an ṭuan hnawh chan mi cu kan Bawipa Jesuh Khrih a thih nak tiang lawng kha siloin kan Bawipa Jesuh vawlei tangdor nak in a rak chuak i temh nak a ing i kan caah a thih nak vialte hmual a ngeihter tu sullam a ngeihter tu cu a thawhṭhannak ah khan a si. 

Cucaah kan nih cu thawhṭhan tefa kan si i hmailei chan ahcun hi a nikhat nak ni ah hin Pathian  an biak lai i Pathian  sinah pumh nak lianngan nak an tuah lai ti mi hi Biakam hlun chung in a rak langhter chung cia (Leveticus 23:33-36) ah kan hmuh khawh mi a si. Bawipa nih Moses cu a chawnh i Isreal mi hna sin ah hi bang in va chim tuah. Nisarih nak thla, nihlei nga ni hin nisarih tiang Bawipa caah deu puai a si lai. A nikhat nak ni ah a thiang mi pumh nak a si lai. Rian fak zeihmanh nan ṭuan lai lo. Ni sarih chung Bawipa sin ah mei in thawi nak nan pek lai. Niriat nak ni ah a thiang mi pumh nak nan ser lai i Bawipa sin ah mei in pek chanh nak nan tuah lai. Mah cucu a lian ngan mi pumh nak a si. Rian fak zeihmanh nan ṭuan lai lo tiah fiang tein kan hmuh khawh.

Cucaah a niriat nak ni ti a si lo le a nikhat nak ni ti a sullam ai khat i cu ni ahcun kan Bawipa Jesuh Khrih thih nak a thoṭhan i, thawhṭhan tefa a simi kan nih hna nih kan Bawipa Jesuh Khrih a thawhṭhannak ni ahcun Pa Pathian  cu Sunpar nak kan pek i kan Pathian  cu thangṭhat Sunpar nak kan pek ni a si. 

Duh dawt mi u le nau nu le pa hna (Mk 12:27) chungah Sabbath cu minung caah pei ser a si cu. Minung cu Sabbath caah ser a si ṭung lo tiah kan Bawipa Jesuh Khrih nih a ti. Sabbath cung bawi a simi kan Bawipa Jesuh Khrih a zum mi vialte kanmah caah hin Biakam hlun i rak hman mi ni sarih nak ni kha ulh mi ni ah si ti loin kan Bawipa Jesuh Khrih thih nak a thawhṭhan ni tu kha Pa Pathian Sunpar nak kan pek ni cu a si. Biakam thar chan lamkaltu chan hrimhrim ah hin, a tu i Zarhpi ni kan timi zarhkhat nak a nikhat nak ni hi an rak hmang cang maw ti kan zoh si ahcun (1 Kor 16:2) nak ah Zarhpi nifa tein nan hmuh mi a tlawm a tam ning cio khan phaisa nan rak i thawh lai i nan rak khon lai. Ka rat tikah phaisa kholh herh ti lo ding in tiah a ti. 

Duh dawt mi u le nau nu le pa hna, cucu Zarhpi ni i an i pumh nak ah thawh hlawm an kholh mi kha a si i cucu mi thiang Paul nih ka rak lak te lai tiah a chim duh nak kha a si. Nihin ni ah Zarhpi nifatin te ah catholic Khrihfa bupi nih thawh hlawm kholh nak kan ngei i zeimawzat cu kan zung chuk a si mi Vatican ah kuat a si i zeimawzat cu Myanmar ram chung CBCM tiang kha kuat a si. Zeimawzat cu kan Parish kan peng ram, kan Khrihfa bu caah le Biakinn caah khan hman a si. Cucu zeidah ka chim duh ti a si ahcun Lamkaltu chan hrimhrim ah Zarhpi ni a nikhat nak ni ah Pathian  cu thangṭhat nak an pek i ulh nak in caan an hmang ko ti cu kan hmuh khawh mi a si.

 Duh dawt mi u le nau nu le pa hna a si ahcun cu zarhkhat chungah nikhat ni lawng ah maw Pathian  kan biak lai ti a si ahcun a si lo. Nifatin tein catholic bupi nih cun Siangbawi um nak hmun ahcun Jesuh Khrih Thisa raithawi nak in nifatin te Pathian  cu a biak a si. Nifatin te hi Pathian  kan biak awk a si. Thawngṭha a rak ngai tu nan za pi te Pathian  nih thlua chuah in pe ko hna seh. Amen

Thazang petu /- Saya Canute Bawi Kam