JESUH KHRIH PATHIAN FAPA NGEIHCHUN KA ZUMH
Thawngṭha: Pathian nih a Fapa a rak thlah
“Sihmanhsehlaw a can a tlin tikah Pathian nih a Fapa kha a rak thlah; nu nih a hrin; nawlbia tangah a ummi hna kha tlanh awkah nawlbia tangah hrin a si i, cucu kannih kha fa cannak kan hmuhnak hnga caah a si.” (Gal. 4:4-5). Mah hi Pathian Fapa Thawngṭha cu a si. (Mk. 1:1). Pathian nih a miphun kha a len cang hna, Amah nih Abraham le a tefa cungah a tuahmi biakamnak kha a tlinter. Mi vialte an i ruahchanmi nakin ngan deuh piin a tuah; a dawtbik a Fapa kha a rak thlah cang. (Mk. 1:11, Lk. 1:55-68).
Kannih nih Herod bawi le Caesar Augustus chan ah Bethlehem khua ah a chuakmi, Pontius Pailat kut in Jerusalem ah vailamtah mi, Nazareth khuami Jesuh cu minung a cangmi Pathian Fapa a si tiah kan zumh i kan phuan. Amah cu Pathian sinin a ra. (Jn. 13:3). Vancung in a rung ṭum i, (Jn. 3:13, 6:19) minung ah a cang (IJn. 4:2). Zeicahtiah BIA cu minung ah a cang i kanmah lakah a um; vel le biatak he a khat; kannih nih a sunpar kha kan hmuh. Cucu Pa sinin Fapa ngeihchunh nih a hmuhmi sunparnak kha a si. Amah a tlinnak chungin kannih nih vel cungah vel kha kan hmuh cang (Jn. 1:14, 16).
Thiang Thlarau vel thawngin le Pathian hruainak thawngin Jesuh Khrih kha kan zumh i, “Nangmah cu a nungmi Pathian Fapa, Khrih ta a si,” tiah kan phuan.
Khrih – a rumnak kong phuannak (Eph. 3:8)
Khrihfa zumhnak ro a hmunhnak cu midang kha Khrih zumhnak lei hruai awkah Jesuh kong chimnak ah hin a um. A hramthawk in hmasabik zultu hna cu Jesuh Khrih kong chimduhnak lungthin in an al hi, “Kannih nih kan hmuhmi le kan theihmi kha chim loin kan um kho lo,” tiah an ti. (Lam. 4:20). Cun annih nih chan kipah a ummi minung vialte kha Khrih he an i kawmhnak in an hmuhmi lawmhnak kha co ve awkah an sawm hna (IJn. 1:1-4). “A hramthawk in a rak um cangmi, kannih nih kan theih i kan mitin kan hmuhmi, kan zoh i kan kut in kan tonghmi nunnak bia kong ah nunnak cu langhter a si; cu kong cu kannih nih kan chi mi Pa he a rak um ṭimi zungzal nunnak, kannih sinah langhter a simi kong kha kan in chimh hna. Zeicah ti ahcun Pa le Fapa Jesuh Khrih he hawikomhnak kan ngeihmi chungah khan nan tel ve khawhnak hnga kan duh. Hi ca kan ṭialmi cu kan i lawmhnak kha a tlinnak hnga caah a si. (IJn. 1:1-4).
Pathain bia cawnnak ah Khrih
Pathian bia cawnnak ah Khrih cu kanmah he a um zungzal. Pathian bia cawnnak kan timi nih Khrih chungah Pathian aa tinhnak vialte a tlinnak a phan ti kha a langhter. Pathian bia cawnnak timi cu Khrih a tuahser mi, a bia chimmi le khuaruahhar hmelchunhnak a tuahmi hna a sullam theihthiamnak kawl kha a si. Pathian bia cawnnak i tinhmi minung kha Khrih he kawmhter awk kha a si. Amah lawng nih kannih kha Thlarau in a Pa dawtnak chungah kan hruai khawh i Thumkawmh Pathian nunnak kha a kan hrawm ter khawh.
Pathian bia cawnnak ah minung nunnak a lami BIA, Pathian Fapa kong cawn a si. A dang kong vialte cu amah he pehtlaih in cawnpiak a si dih. Cawnpiaktu taktak cu Khrih a si. A dang cawnpiaktu hna cu Khrih can ah biachimtu lawng an si. Cawnpiaktu saya vialte nih Khrih bia kha an i lak dih cio awk a si. Khrih nih, “Ka cawnpiakmi cu keimah ta a si lo, a ka thlahtu ta a si,” tiah a ti. (Jn. 17:16).
Khrih kong cawnpiak awkah auhnak a hmuhmi vialte Khrih Jesuh hngalhnak kha a kawl hmasa awk a si. “Khrih kha a hmuhnak hnga la Khrih chungmi ah aa hmuhnak hnga” le Khrih le a thawhṭhannak i a ṭhawnnak kha hmuh awkah a temhinnak kha i hrawm; a thihnak ah thih ve in a thawhṭhannak ah thawhṭhan ve awkah zeizong vialte sunghnak kha a in lai” (Phil. 3:8-11). Khrih hngalhnak in Khrih kong chimduhnak, Thangṭhabia phuan duhnak lungthin le midang kha Jesuh Khrih zumhnak ah hruai duhnak lungthin a hung chuak lai. Cu lawng a si lai lo, Khrih hngalh duhchinnak lungthin cu a rak lang chinchin rih lai. Mah duhnak tlinh awkah Khrih kong kha zumhnak bia nih a phuan ning tein zulh a hau.