Na nunnak in Pathian fa na sinak phuang
Nihin thawngṭhabia kan relmi chungin “Khrih a ṭanhmi cu Khrih nih a ṭanh ve lai” timi in thazaang lak hna usih. Pathian nih a sermi vialte hi a hngalh dih i, a sermi vialte hna hi a zohkhenh zungzal ko hna. A sermi vialte hna chungin minung hi a kan dawt khun, timi hi nihin thawngṭhabia chungah kan hmuh. Pithlung pakhat hmanh khi a dawt i a zohkhenh a si ahcun pitlung nakin amah mui kengin a sermi le a thisen in a cawkmi kannih cu a let tampi in nan sung deuh, tiah nihin thawngṭhabia nih thazaang a kan pekmi cu a si. Nan lu cung nan sam hmanh khi a rel dih. Nanmah cu nan theih lo. Pathian nih zeizong vialte hi a hngalh dih, zeizong vialte hi a zohkhenh zungzal ko. Man ngeimi ah a kan chiah zungzal ko tinak a si.
Kan Pathian a ṭhatzia cu hmur le kaa nih a chim kho lo. Khrih a ṭanhmi cu Khrih nih a ṭanh ve lai. Zapi hmaiah amah mi ka si tiah a phuang ngammi cu Vancung khua ah ka Pa hmaiah ka phuan ve lai. Zeitindah Jesuh cu kan hlawt? Kan hmur le kaa in kan hlawt, kan nunzia in kan hlawt. Nihin zumtu Khrihfa vialte nih kan zumhmi kan biakmi kan Pathian cu kan hmur le kaa nih phuang sehlaw kan nunzia nih langhter seh. Amah a zummi, amah aa bochanmi ka si timi hi zapi hmaiah a langhtermi si a kan duh (Mt. 10:32) ah kan hmuh.
Cu bantuk in Khrihfa um lonak ah Pathian mi ka si, tiah a langhtermi Judah mi, Sadareh, Messiah, Abenaku kong kha (Daniel. 3:1-30) chungah kan hmuh. Babilon Siangpahrang Nebukhanezar nih milem zuuk pakhat a san (pe 90) a ngan (pe 9) in a ser i Judah mi ram ah a dirter i miphun vialte nih nan biak lai, tiah nawlbia a chuah. A bia lomi cu meiphu chungah paih a si lai, tiah a ti. Sihmanhsehlaw, Pathian fa a simi, Pathian a biami Sadareh, Messiah, Abenaku hna nih cun cu Siangpahrang pa i nawlbia cu zeiah an rel lo i an bia duh lo. Cucaah Siangpahrang Nebukhanezar cu an va chimh. Siangpahrang nih Sadareh,Messiah,Abenaku nanih nih ka pathian cu nan bia duh lo maw? tiah a ti hna. Maw…Siangpahrang, na meiphu chung le na kut chungin kan Biakmi kan Pathian nih a kan khamh khawh ahcun kan khamh ko seh. A kan khamh lo hmanhah na Pathian cu kan bia hlei lai lo, an ti hna.
A alh hluahmahmi meiphu chungah a paih hna. Meiphu chungah minung pali zeihmah poi loin aa chawkmi ka hmuh ko hna. Pakhat cu Pathian a lo. Siangpahrang nih Sadareh, Messiah, Abenaku, Pathian sal le hna, hung chuak uh, tiah a ti hna. Sadareh, Messiah, Abenaku hna cu meiphun chungin an chuak i samfa fangkhat hmanh an kang lo kha Siangpahrang nih a hmuh tikah Sadareh, Messiah, Abenaku Pathian cu thangṭhat si ko seh, tiah a ti. Nebukanezar nih Pathian a thangṭhatnak le Sadareh,Messiah,Abenaku meiphu chungin an luatnak cu an biakmi an Pathian an i bochannak le an i ṭanhnak thawngin a si.
Sadareh,Messiah,Abenaku hna nih Siangpahrang hmailei zapi hmaiah an bochanmi le an i ṭanhmi cu an biakmi an Pathian a si. A alh hluahmahmi meiphu chungin zeihmanh poi loin an luatnak cu an biakmi an Pathian an bochannak le an i ṭanhnak thawngin a si. Sadareh, Messiah, Abenaku an Pathian hi nihin zumtu hna nih kan biakmi kan Pathian a si ve. Nihin zeidah na tih? Zeidah na phan? A alh thluamahmi meiphu nakin ṭih a nung deuhmi a um ti lo. Ṭihnungmi meiphu chungin luatnak a pe khotu hi nihin kan biakmi kan Pathian a si.
Amah mi kan si, tiah zapi hmaiah a phuang ngammi cu Vancung khua i ka Pa hmaiah kei zong nih ka phuan ve lai, tiah Jesuh nih a ti. Pathian fale hna kan i thuamnak cu midawh nak cu mah hi a si. Na umnak na kalnak kipah Pathian fa sinak na langhter ahcun nang cu nun in Pathian thawngṭha na si. Nun in Pathian fa na sinak a phuangtu na si.
Thazang petu /- Saya Francis Khua Pheng