Vancung Pennak Kong, Thawngṭha Kha Va Chim Hna U.

Nihin Bupi nih a kan thimpiakmi a voikhat bible relnak (Hosea. 11:1-4,8-9; Ps. 80:2-3, 15-16, Mt. 10:7-15) hna hi Bupi nih a kan thimpiakmi a si i, a tawinak in a tlangtar lawng tein kan thim lai. 

(Mt. 10:7) chungah zeidah kan hmuh tiah cun, “Cun Vancung Pennak cu a nai cang, tiah va chim hna u” tiah kan Bawipa Jesuh Khrih nih Lamkaltu hna a thlahnak kong kha kan hmuh khawhmi a si. Vancung Pennak cu a nai cang, tiah va chim u” tiah a ti. Cun thawngṭhabia aupinak ah zeidah kan hmuh tiah cun, “Ngaihmanh u, nihin Bawipa nih a kan chimhmi hi nihin ngai tuah u a bia cu hihi a si. Lung hak in um hlah u” a kan timi hi a si (asiloah) Mark chungah zeidah kan hmuh tiah cun, “Vancung Pennak cu a nai cang, cucaah nan sualnak kha i ngaichih ulaw thawngṭha kha zum tuah u” timi hi a si. “Vancung Pennak cu a nai cang ti kha va chim hna u, va kal u law va chim hna u” timi kha kan Bawipa Jesuh Khrih nih a lamkaltu hna, a zultu hna a thlahnak kha nihin ah tlawmpal ruah ṭi ding le, thazaang lak ṭi dingin kan duh hna. 

“Vancung Pennak cu a nai cang, nan sualnak kha mer tak hna ulaw thawngṭha kha zum hna uh” timi hi tlangtar hi kan zoh tikah kan Bawipa Jesuh Khrih nih thawngṭhabia chim aa thawkka in a phuan hmasabik mi thawngṭha a si i, cucu a luancia (AD kum 2000) leng i kan Bawipa Jesuh nih a rak phuan cangmi thawngṭhabia hi a si i, ralrinnak a kan pek cangmi kha a si i nihin zongah kan Bawipa Jesuh Khrih nih ralrinnak a kan pek ṭhan ti hi kan hmuh khawhmi a si. “Pathian Pennak cu a nai cang” timi hi pakhatnak ah kan zoh tikah, nihin kan vawlei dirhmun, nihin kan pawngkam hi kan zoh tikah hin raltuknak phunphun kokek rawhralnak siseh, zawhnak le lungfahnak ti bantuk ṭihnung ngaiin a khatnak caan a si i, hi hna hi kan zoh tikah hin kan Bawipa Jesuh Khrih a ratnak, Vancung Pennak a nai taktak cang ti hi, hi hna nih hin a langhtermi a si. 

Cucaah dawtmi u le nau hna, nihin kan boruak hi kan zoh tikah hin Pathian Pennak aa nai cang ti cu a langhter cuahmahmi a si ko i nihin ah zeidah kan tuah lai ti a si ahcun, kan sual kan palhnak vialte,  Pathian kan dohdalnak vialte kha vialte kha i ngaihchih in amah sinah kir ding a si timi hi a pahnihnak ah chim kan duhmi cu a si. Sual ngaichihnak timi cu zeidah a si ti a si ahcun Pathian Pennak chung luh khawhnak ding caah hin tawhfung a simi cu hi sual ngaichihnak hi a si. Cu sual ngaichihnak timi cu mithli tlaknak le ngaihchiatnak lawng a si lo, mah le duhnak le sualnak kha hlawt in Pathian leiah 180 degree in i mer in Pathian hmaiah tawidor tein kan sual cang e…kan ngaithiam ko, tiah sual phuannak le lamhlun in lamthar ah kal ding biakhiahnak kha a si. Phundang kan chim a si ahcun kan tuah tawnmi sualnak kha kal tak in, tuah ti lo mer tak in Pathian duh ningin nun kha a si. Lungthin thlennak taktak kha a si. 

Dawtmi u le nau hna, nihin ah Pathian Pennak a nai cang, Vancung Pennak a nai cang. Kan Bawipa Jesuh Khrih rat ni a nai cang, kha vialte kha kan Bawipa Jesuh Khrih nih a kan chimh takmi a si. Nihin ah ram khat le ramkhat kan i do, a phunphun in kha vialte kan zoh tikah, kan boruak hna a rawkralmi kan zoh tikah kan Bawipa Jesuh Khrih ratnak ni caan, Pathian Pennak a nai cang ti kha a fian tikah hin kan Bawipa Jesuh Khrih duh lo ningin kan nunnak le kan sual kan palhnak vialte kha i ngaichih in, kha vialte kha mer tak in zeidah a duh bikmi a si ti hi kan kawl dingmi a si. Kan sual kan palhnak vialte kan i ngaihchih hnu lawngah Vancung Pennak chungah cun a lut kho dingmi kan si. Cucaah Vancung Pennak chungah luhnak tawhfung cu zeidah a si tiah cun sual ngaihchihnak hi a si ti hi zeitik hmanhah philh hlah usih. Cu sual ngaihchihnak hnuah zeidah a um tiah cun zumhnak hi a si. Zumhnak, thawngṭha zumhnak, “Thawngṭha kha zumh u” a tinak ah kan Bawipa Jesuh Khrih nih a chimmi thawngṭha nihin kan dirhmun ah kan i lak i kan zumh dingmi a si. 

Nihin kannih cu misual kan si i, Hell ah kal ding timhcia kan si ko nain Pathian a kan dawt caah a Fapa Jesuh Khrih cu kan sualnak vialte caah hi vawlei ah a run thlah i, Vailam cungah thi dingin a run thlahmi a si i, thihnak in a thoṭhanmi khamhnak cu a Fapa nih cun nihin ah a kan pekmi cu a si. Cucaah amah zumh in mah bochannak he nihin ah hmailei ah a kal dingmi, a nung dingmi fanu fapa kan si. Cucaah nihin nang le kei zong kan Bawipa Jesuh Khrih cu kan zumh i, cucu kan nunnak dihlak in kan i bochan i amah duh ningin, amah a bia te kha nihin ah kan nunpi a si ko ah khan cun kan sual kan palhnak vialte a kan ngaithiam lai i nihin ah Vancung Pennak chungah amah nih a kan hruai lai. Cucaah nihin ah kan thinlung innka ong hna usih, kan sual kan palh vialte i ngaichih hna usih. Kan Bawipa Jesuh Khrih nih nihin kan relmi thawngṭhabia chungah, a zultu hna kha mizaw hna damter awk, mithi hna thawhter awk, thinhmui mi hna thianter awk, khuachia hna hmanh khaw ṭhawl khawhnak ṭhawnnak a pek hna. 

Nihin nang le kei zong zultu hna bantuk in pek kan si ve. Cucu kan tuah khawhnak dingah zeidah a herh tiah cun, a thlahmi kan Bawipa Jesuh Khrih kan zumh a herh i kan sual kan palhnak vialte a herh i, amah Pathian duh ningin kan nun a si ko ahcun nihin kha vialte ṭhawnnak hna kha nang le kei zong nih kan tinco dingmi a si. Cucu kan sualnak kan palhnak vialte kan i ngaichih lo a si ahcun biaceih ni ahcun Pathian nih cu khuami hna nak cun Sodom le Gamorah khuami hna kha a zaangfah deuh hna lai a ti. Amah a cohlang lomi, tluninn a onh lomi hna vialte kha chiatser awk le chingchiat awk ah khan kha vialte kha biaceihnak ni, Bawipa Pennak, Bawipa Ni a tlun tikah cun ngaithiam khawh an si lai lo, Sodom le Gamorah kha ka zaangfah deuh hna lai a ti. 

Dawtmi u le nau hna, nihin ah “Vancung Pennak cu a nai cang, nan sualnak vialte kha i ngaichih ulaw thawngṭha kha zum u” timi tlangtar, hi bia hi kan lungthin chungah i nunpi ko usihlaw, Pathian fa kan sinak kha langhter usihlaw, nifatin tein kan nunnak ah amah duh ning tein a nungmi kan si khawhnak dingah Bawipa nih a thar in thluachuah za ka pe ko hna seh. Amen.  

Thazang petu /- Saya William