Reflection for Tuesday

November 12, 2024 – (Luka 17:7-10)

“Abiana ah sinum pakhat hei ngei u law, cu nan sinum cu lei hei thuang sehlaw, asiloah, tuu hei khal sehlaw, lo in inn i a hung tlun tikah, ‘I rianranh law rawl kha ei,’ nan ti lai maw? Ti hlah. Nan i thawh lai i, ‘Ka zanriah kha hei tim, cun rawl ka ei lio le ka din lioah na angki leng kha i hruk law ka bulṭawl, cu hnuah cun na ei ve te lai i na din ve te lai’ nan ti deuh lai,” tiin Jesuh nih bianabia in a cawnpiak hna.

Sinum pa cu chun nitlak rian a ṭuan hnga i a tha zong a ba lai, cun a rawl zong a ṭam ko lai.

Sihmanhsehlaw, a tuah hnga ding mi cu a tuah awk a si caah a bawipa caah a tuahpiak ding a si ko.

Cun Jesuh nih a zultu hna kha, “Nannih zong cu bantuk cu nan si ve ko, tuah u tiah fialmi rian kha nan tuah dih tikah, ‘Kannih cu sal santlailo kan si, kan tuah awk hnga rian a simi lawng pei kan tuah ko cu,’ va ti u,” tiah a ti hna.

Kannih Khrihfa mi hna zong Jesuh ‘sinum’ bantuk kan si. Rianṭuantu kan si bantukin Jesuh nih kan rian a simi rian kha ṭha tein ṭuan awkah aa ruahchan. Dawtnak he a rianṭuan ding zong aa ruahchan. Hi tahchunhnak ah sinum a simi hna nih ruahchan awk zeihmanh a langhter lo zong kan hmuh khawh. Tuah hnga ding a simi lawng kha ṭha tein le dawtnak lungthin he tuah ding, rianṭuan ding lawng kan hmuh. “Laksawng” hmuh ding zong sinum a simi nih i ruahchan lo dingin a langhter.

Biahal awk a ummi cu: kan tuah awk a simi thil tuah awkah kan lung a tling maw? Kan rian kha ṭha tein le lungnuam tein kan tuah a si ahcun ṭuanvo a ngeitu kan si bantukin Jesuh nih ‘Laksawng’ cu a kan pek hrimhrim ko lai. Fakpiin rian kan ṭuan i kan rian kha ṭha tein kan ṭuan ahcun “a ṭhami le zumhawktlak sal, sinum” kan si caah Pathian sinin lungsinak kan hmu lai. Zumhawktlak le ṭuanvo a ngeimi kan si caah Jesuh nih laksawng a ken pek lai. Cucu zungzal nunnuamhnak hmun, Amah Pathian sinah zungzal umnak nawl “Laksawng” kan hmu ko lai.