Pathian sermi thil a hrawktu paohpaoh cu Pathian ral an si
Nihin ni caan ah hin Bawipa Pathian i a bia kha kan thlarau rawl ah kan ruah ṭi dingmi cu Bawipa Jesuh Khrih nih hin holh kho lomi pa kha a damter, bia a chimter ṭhan timi kha kan hmuh.
Bawipa Jesuh Khrih nih a dam lomi vialte kha a damter hna. Hi tikah holh arhmi kha bia a chimter tikah Farasi mi pawl nih cun, “Pathian ṭhawnnak in a si lo, Satan ṭhawnnak in a tuahmi a si” tiah khan alingtelet in khan Bawipa Jesuh Khrih a ṭhawnnak le a thiamnak kha thangṭhat loin khan thangchiat le mawhphurh tertu tukah khan an i cang. Hika ah hin kan Bawipa Jesuh Khrih nih Farasi mi pawl nih hin zeitluk in khan an rak doh zongah hi a tuah keel a simi ṭhatnak a tuahmi le damnak a tuahmi, thawngṭha a chimnak kha a ngol maw kan ti tikah khan a ngol hlei lo. Cucaah Bawipa Pathian nih aa tinhmi a rianṭuannak cu Satan nih a hrawk kho lo.
Sihmanhsehlaw hi Satan nih hin hrawk a duhmi cu minung ngandamnak hi a hrawk kho, sihmanhsehlaw ṭhatnak lei kha a phanhter kho maw kan ti tikah a phanhter kho lo. Satan hi a hrawktu lawnglawng kha a si i ṭhatnak kha a pe khomi a si lo timi hi kan hmuh fawn. Cucaah hika ah kan Bawipa Jesuh Khrih nih rianṭha kha a tuah, damnak kha a tuah, cucun thawngṭha a chim khakha Satan le Farasi mi pawl nih cun ṭhatlonak lawngte khan an i lak i, ṭhatlonak lawngte khan lehrulhnak an tuah. Sihmanhsehlaw a cheukhat pawl nih cun Pathian kha an thangṭhat. “Hi bantuk thil hi kan hmu bal lo, hi bantuk hi Isarael miphun lakah a um bal lo” tiah Pathian kha an thangṭhat lioah cun Farasi pawl cu Pathian thangṭhat loin khan “khuachia pekmi ṭhawnnak in a tuahmi a si” tiin khan ṭhatlonak hmuhnak lawngte khan thil kha a rak zohmi an si.
Dawtmi u le nau hna nitinte kan nunnak ah hin Pathian nih kan cung i a rianṭuannak, mi cung i rian a ṭuannak hi zoh in khan Pathian a thangṭhattu maw kan si, asiloah Pathian a thangchiattu dah kan si timi kha mah le mah kha i chekhlat kha kan herh timi kha pakhatnak ah chim ka duh.
Cun pahnihnak ah Bawipa Jesuh Khrih nih hin a rianṭuannak vialte hi Satan le Farasi mi hna nih hin, “Hi cu khiachia bawmhnak in a tuahmi si” tiah an ti ko, sihmanhsehlaw zeitluk in an soisel zongah Bawipa Jesuh cu a rianṭuannak kha a ngol hlei maw? “An ka soisel, cucu an duh lo” tiin khan a ngol maw, a ngol hlei lo. Cucaah Bawipa Jesuh Khrih nih a ṭhami paohpaoh cu a zungzal in pehtlai thluahmah in khan a tuah. Cucaah Jesuh Khrih nih khuapi he khuate he a tlawng duahmah hna i anmah an phungchimnak le an biakinn chungah khan thawngṭha kha a chimh hna, Vancung pennak kong kha a chimh hna i zawtnak phunkip damternak kha a tuah thluahmah timi kha k an hmuh tikah Bawipa Jesuh Khrih cu hi Farasi pawl i soiselnak kha zeihmanhah rel loin khan a tuah hngami paohpaoh kha pehtlai in a tuah.
Cucaah cun kannih vialte zong nih khan hi vawlei cungcah rianṭha kan tuah paohpaoh ahcun mi nih soiselnak an tuah hnga maw, an ka thangchiat hnga maw, hitin kan tuah a si ahcun duh loin an um sual hnga maw, ti kha ruah loin kannih nih a ṭhami paohpaoh kha hi soiseltu pawl kha ruat loin khan Pathian hmaiah a ṭha kan ti, kan ruah mi paohpaoh kha lunglawm thanuam tein khan kannih nih kan ṭuan thluahmah a si ahcun Bawipa Pathian nih tuah khawhnak ṭhawnnak zong a kan pek chih lai, cucun ngandamnak zong a kan pek chih lai. Fimnak le thiamnak zong a kan pek chih lai i hmanungbik ah kan rianṭuannak le kan i zuamnak ah khan sunpar lianngannak kha a kan pek ṭhan te lai timi kha nihin ah thazang pek zong kha ka duhmi a si.
Cucaah kannih vialte nih mi rianṭuannak kha a soiseltu si loin khan ṭhatnak a tuahmi paoh kha a thangṭhattu si kho kha kan i zuam lai i Bawipa Pathian a rianṭuannak paohpaoh kha lunglawm thanuam tein khan kan thangṭhat lengah amah bantuk in khan lung donglo tein khan pehtlai thluahmah in khan a rianthiang kha kan ṭuan a si ahcun ni nikhatkhat ah a ziam lomi sui luchin kha kannih kha a kan pek lai timi kha cawnnak i lak usih.
Thazang petu /- Fr. Abraham Hrang Hit