Biatak zumhnak he Jesuh kan panh a herh
Nihin ni caah bupi nih a kan timhpiak mi cathiang hna cu Hosea 2:16–17, 18, 21–22; Psalm 144; Matthew 9:18–26 hi an si. Kan cathiang hna nih a kan cawnpiak duh mi cu: Pathian hrimhrim nih a sermi minung hna he pehtlaihnak a kan ngeih ṭhannak, Pathian cu kan lungdonh lio caan hmanh ah ruahchannak a kan pe kho ṭhan tu a si timi le zumhnak in Amah a kawl mi hna cungah zangfahnak a ngei zungzal timi hna hi an si.
Hosea 2 chungah Bawipa Pathian nih a mi hna hna he a thar in biakamnak a tuah ṭhan lai nak kong a chim. Sual dantatnak pek loin a mi hna he remnak a tuah ṭhan i pehtlaih ṭhan ding in a kawh hna nak kong a si. A kan cawnpiak duh mi cu minung hna kan sungh-tlak nak nih Pathian lung a donghter dih thai lo. Amah sinah ngaihchihnak lungthin he a panh ṭhan mi hna paoh cu a cohlaan zungzal ko hna timi hi a si.
Psalm hla ṭial tu zong nih Pathian cu a kan khamh tu a si nak, kan ṭhawnnak le thluachuahnak vialte aa thawk nak hrampi a sinak kha a langhter ve. A kan cawnpiak duh mi cu ‘a kan daw zungzal tu Pathian cungah kan zumh i, kan i bochan chung paoh cu himnak a um’ timi a si.
Thawngṭhabia chungah Khrihfa mi hna nih kan i zohchunh awk tlak taktak a simi tahchunhnak pahnih kan hmuh khawh. Judah mi lak i bawi pakhat a simi nih Jesuh hmai ah a khuk aa bil i “Tunaite ah khan ka fanu a thi, sihmanhsehlaw ra law a cungah na kut ra chia law a nung ko lai” tiah a ti. Cun kum hleihnih tiang a zaw cangmi nu nih “a puan hmanh kha ka tongh khawh ahcun ka dam ko lai” tiah a ti. ve. Hi hna pahnih nih an ton mi sining hna hi aa dang ko. Sihmahsehlaw Jusuh cungah an zumh nak cu biatak zumhnak a si. A donghnak an i ruahchannak a si ti zong in kan ti khawh. An pahnih in Bawipa cu an panh taktak ve. An duh mi thluachuah an co taktak ve. Jesuh nih ngakchia nute cu a damter lawng siloin thihnak in a thawhter ṭhan bantukin thichuah zawtnak a ngei mi nu zong damnak a pek ṭhan. A kan cawnpiak duh mi cu “Jesuh Khrih cu Pathian a si. Zeizong vialte a tuah ko tu le a ti kho tu a si” timi kha a si.
Dawt mi u le nau hna, zeitluk hmanh in ruahchannak dong hmanh sehlaw Pathian sin panh ding kha philh hna hlah u sih. Pathian caah a si kho lomi thil zeihmanh a um lo. Zumhnak he kan panh cio i kan herh taktak mi kan hal, kan chimh a si ahcun a kan pek hrimhrim ko lai timi zumhnak le ruahchannak ngei hna u sih. Sihmanhsehlaw, Jesuh sin panh kan duh taktak a si ahcun lungpuar nak le ruamkainak lungthin bel te cu chiah tak a herh.
Thazang petu /- Fr. Fidelis Maung Sein