Dawtnak, zawnruahnak lungthin he tuah ṭuan ding a si.

Nihin kan relmi cathiang Matthew 9:14-17 chungin thazang i lak ṭi hna u sih. Jesuh Khrih sinah Johan zultu hna nih bia an hal mi hi kan nih pakhat cio kan nunnak zongah kanmah le kanmah check hlet nak ah kan hman ve ding thil pakhat a si. Zeicah tiah cun minung cu kanmah nih kan tuah mi thil hna hi thil hmaan bik le a dik bik a si tiin ruah a hmang mi kan si caah a si. 

Farasi mi hna le Johan hnu zultu pawl nih rawl ulh nak an tuah mi hi an mah phu chung a ummi paoh nih zulh ding phung in an chuah mi zulhphung pakhat si dawh a si. Zulh phung tiin a si tiah an timi a si ahcun phu chung a ummi hna nih an duh zong duh lo zongah an zulh dingmi a si. Hi tin an zulh tikah Pathian an dawt tuk caah an zulh zong a si men lai, asiloah phu chungmi hna nih sual ka phaw hna hlah seh tiin an zulh mi zong a si kho. Datnak tel loin tuah kel rian pakhat bantukin an zulh zong a si kho.

Dawtnak in tuah lo mi paoh cu Pathian hmai ah co thlak a si tak hnga maw? An tuah ser nak zongah biatak lunglawmhnak a um tak hnga maw?

Jesuh nih a zultu hna cu a thim hna i amah hrimhirm nih a cawnpiak mi hna an si. A rian thiang pehzulh te dingin a sersiam mi hna an si. A herh tiah timi kha Jesuh nih a hmuhsak hna i a cawnpiak hna. Biahalnak an tuah tikah a leh mi hna cu “Hmai lei ah an tuah te lai” ding mi thil sinak in a leh hna. Hi tuah ser te hnga dingmi ah hin Jesuh cungah siseh, Pathian cungah siseh tuahser nak an ngeih mi thil paoh ah hin dawtnak aa tel ding kha chim chung cia nak zong a si.

Dawtmi u le nau hna, nihin nang lei kei nih rawl ulh nak kan tuah tikah, asiloah sumnak kan tuah tikah zulhphung pakhat menmen in maw kan tuah asiloah Pathian dawtnak taktak in dah kan tuah? Rua cio hna u sih. Khrihfa kan si caah, rawl ulhnak ka tuah ve lo ahcun midang, hawidang nih an ka mawhchiat sual lai tiin maw kan tuah? Pathian dawtnak taktak in teh kan tuah maw?

Jesuh Khrih, Pathian nih a duh mi cu dawtnak lungthin he tuahsernak kha a si. Dawtnak tel loin tuahsernak paoh ah ṭhencheunak le hnahnawh nak a um. Thangchiatnak le soiselnak a um. Ngaihthiamnak a um kho lo. Mah thil ti khawhnak le midang hna tuah ṭuannak tahchunh in nahchuahnak le rem lonak a chuahter khawh. 

Kan thlacamnak, rawl kan ulhnak hna hi Pathian dawtnak taktak in tuahser mi si hrimhrim kha a herh mi cu a si. Dawtnak ah soiselnak a um lo. Johan hnu zultu hna nih anmah le Farasi mi hna nih an tuah mi, an zulhmi bantukin Jesuh hnu zultu hna nih thil ṭha an tuah lo, an zul lo timi sullam bantukin bia an hal nak zong hi a si. 

Khrihfa mi hna nih kan tuah, kan chim, kan tuak nak paoh ah hin dawtnak lungthin he kan tuah zungzal ding a si.  

Thazang petu /- Fr. Fidelis Maung Sein