Reflection for Monday

November 11, 2024 (Luke 17:1-6)

Jeush nih zultu hna kha a chimh hna i, “Sualnak chungah mi a tlaktertu thil cu an um ṭheo lai; sihmanhsehlaw cu thil hna a umtertu caah cun ṭihnung a va si dah” tiah a ti. Hi sualnak hna hi phunhnih in ṭhen a si ahcun: pakhatnak ah mi cheukhat nih Pathian biatak doh in le zumtu hna kha lamdang pialpi dingin timhnak; a dang pakhat cu, cu zumtu hna lakah buainak chuahter le thinhunnak chuahter, serhsatnak asiloah thangchiatnak tibantuk pumpak palhnak he aa pehtlaimi a si. Pathian nih hi sualnak hna hi a chuahter lo. Minung derthawmnak ruangah a chuakmi an si. I ngaihthiam le lungsau tein intuar khawh a hau. Sihmanhsehlaw, a chuahtertu hna caah cun ṭihnung a si zia kha Jesuh nih fiang tein a kan cawnpiak.

Sualnak a chuahter lengmangtu lehrulhnak lakah, Khrih nih ngaihthiamnak ngeih khawh dingin a kan cawnpiak. Unau pakhat nih atu le atu sualnak a tuah ko nain aa ngaihchih ahcun, siibawi nih mizaw an zohkhenh lengmang hna bantukin lungsaunak le zawnruahnak langhter in kan ngaihthiam hna awk a si. Kannih zong, kan tlau tikah zaangfahnak le ngaihthiamnak kan i ruahchan leng cio a si lo maw?

Lamkaltu hna nih zumhnak a biapitnak kong an hngalh caah, Jesuh kha an zumhnak fehter dingin an hal. Zumhnak kan timi ahhin, kanmah le pumpak in i zuamnak zong cheukhat cu aa tel ko lai, sihmanhsehlaw, zumhnak timi cu Pathian laksawng a si. Jesuh hnuzultu hna le a zumtu hna kha Pathian nih thil lianngan tuahkhawhnak nawl a pek hna. Zeicahtiah cun Pathian cungah Zumhnak taktak an ngeih caah a si. Jesuh thawhṭhan hnu, lamkaltu hna nih Thiang Thlarau an hmuh, an cohlaan tikah, ralṭhatnak le khuaruahhar thil tuah khawhnak an ngei hna. Anṭam ci tlukin a hmete mi zumhnak hmanh sisehlaw, a fekmi zumhnak a si ahcun, thil lianngan nan tuahkhawh lai tiah Jesuh nih a kan cawnpiak. Sihmanhsehlaw, Pathian nih hi bantuk ṭhawnnak cu a hmaanmi thil, tinhnak ṭha caah a si lawngah a pek hna. Khuaruahharnak thil sawhsawh tuahnak men ding caah zeitik hmanh ah pek a si lo.