Pawngkam zohkhenh ding caah riankhinhmi sinak

Kokek pawngkam zohkhenh ding le a himnak hnga ding caah dirkamh ding cu minung hna kan rian a ti. St. Pope John Paul -II nih rianṭuantu hna kong he pehtlaimi a langhter mi ah rian nih a ngeih mi man zong telh chih in ruah an hau tiah a ti.

Sernak kong he pehtlai in Bible cathiang nih a langhter mi cu, Pathian nih mipa le minu kha a sermi dum chungah a chiah i (Gen 2:15) cu dum cu zohkhenh ding le kilven ding, rianṭuan ding ṭuanvo an ngeihnak kha a langhter. Thiamsannank a ngeimi hna, kutzung thiam hna le ruanṭuantu hna nih vawlei pi cu an zohkhenh i an kilven (Sirah 38:34).

Pathian sermi vawlei chung thil chuak hna cu minung ṭhanchonak caah hman ding le minung hna le pawngkam um mi thilri hna an himnak caah  hman ding a si. Pathian sermi thil hna ning cang tein hman thiamnak thawngin Pathian ṭhawnnak le sunparnak kha langhter ding a si. Pathian ser mi thil, vawlei chungchuak le lei cung um thil hna in Sii-ar thilri hna cu minung hna nih chuah a si. Fimthiamnak a ngeimi hna nih cun Pathian sermi thil hna cungah thangchiatnak bia an chim bal lo (Sirah 38:4).

Man a ngei mi rian

Minung le vawlei i pehtlaihnak, minung le kokek pawngkam i pehtlaihnak kong hna hi fiangfai tein theih kan herh. Zeicah tiah cun minung cu sermi hna zohkhenh tu siding le kilveng tu siding ah rian pek mi kan si caah a si. Minung le sermi thil hna pehtlaihnak kong sullam ngei tein theih hngalh khawh ding le Pathian nih a kan tinhpiakmi  hna theih hngalh khawh nak ding caah biahalnak ṭha zong tuah ding a si.

“Rian” kan ti tikah ah cinthlaknak lei rianṭuannak lawng si loin Pathian sermi thil hna muisam (ပုံစံ) aa thleng dingin tuahsernak, zatlang nunphung he pehtlai in chimrel tuah ṭuannak vialte aa tel dih. Assisi khua in St. Francis nih kokek pawngkam sining hna a dawt hna ning, a zohkhenh hna ning le a komh thiam hna ning zoh tikah Pathian nih minung hna nih a sermi thil hna cungah kan tuah hnga ding mi rian kong fiang tein hmuh khawh a si.