MITHIANG MI HNA NUNZIA DAWH
Duhdawtmi nu le pa, u le nau hna teinak a hmuh cangmi, teinak bu chungah a um cangmi, zungzal nuncang umnak a phan cangmi Lamkaltu (12) lakah aa telmi mithiang Thomas puai cu Khrihfa Bupi nih nihin ah sunglawi ngaiin upatnak kan pek, kan sunhlawih.
St. Thomas cu kan Bawipa Jesuh Khrih hi a rak ṭhanh ngaitu le a daw ngaitu a si ti cu (Jn. 11) chungah kan hmuh khawh. Cu chungah cun Lazaruh a thih lioah Bethany ah kal ning an si i lamkaltu a dang hna nih cun Judah mi hna nih lung in a kan cheh lai tiah an ṭih. Sihmanhsehlaw, Thomas nih a timi hna cu, “A thihnak ah va thi ve ko u si” tiah ralṭha ngai in Jesuh zulh ding kha a hawile a ti hna. Sihmanhsehlaw hika ah hin Jesuh Khrih hi Thomas nih hin vawlei taksa ṭanh in a ṭanh. Pathian a sinak kha a cohlang kho ngaiin a zum kho ngaingai lo. Kan Bawipa Jesuh Khrih cu thihnak in a thawh ṭhan hnuah Lamkaltu a dang hna sinah a langh tikah a hawilei nih Thomas cu, Bawipa Jeush Khrih kan hmuh da kaw, tiah an ti tikah, keimah ka mit nih a hmuh i a hmaneh hna kha ka kut in ka tongh lo ahcun ka zum kho lai lo, tiah a ti.
Hika zawnah hin Mithiang Thomas hi minung chimmi menmen in a cohlangmi le minung i tinak menmen in mihnu zul phun a si lo i milunghak ngai a si kha kan hmuh khawh. Sihmanhsehlaw kan Bawipa Jesuh Khrih nih, ra tuah ka kut hi tawn law ka hnak hmaneh hna hi tawng tuah zum loin um ti hlah, tiah a vun ti i Jesuh i a kut hmaneh hna a hnak hmaneh a vun tawngh tikah cun a zumh i a cohlan i, “Ka Bawipa le ka Pathian” tiah tehte a khan. Kan Bawipa Jesuh Khrih cu, ka Bawipa, tiah a ti. Duhdawtmi nu le pa u le nau hna, Mithiang Thomas nih Jesuh Khrih cu a cohlan i a zumh tikah kan Bawipa Jesuh Khrih nih Lamkaltu hna cu vawlei cung khua zakip ah va kal u, ka thawngṭha va chim u, a zumtu kha Pa le Fapa le Thiang Thlarau min in tipil va pe hna u, tiah a thlah hna tikah Lamkaltu hna cu vawlei cung kii kili ah an kal i Jesuh Khrih thawngṭha, khamhnak thawngṭha cu an phuang i cu ahcun Lamkaltu Thomas hi Medus, Persian le India ram tiang a rak phan ti hi Khrihfabu tuanbia ah hmuh khawh a si.
St. Thomas cu Medriest Mylapore an timi hmun ah fei in an chuh i a nunnak a liam. Kan Bawipa Jesuh Khrih caah marthys in a thi. Cuka hmun ah cun St. Thomas phil lonak dingah tiah Vailamtah tung nganpi kha an phun. A hnuah St. Thomas ih a ruh pawl hna cu Khrihfa Bupi nih Italy ram le Potugiest ram ah an kalpi ti kha kan hmuh khawh. Vawlei cung kiili ah Mession rianṭuan ah an kal i hika nihin ka relmi (Eph. 2:19-22) karlak ah kan hmuh khawhmi cu, “Cucaah nannih Jentail mi hna, ramdang mi le khual nan si ti lo; Pathian mi hna he cun laikhat nan sic ang i Pathian innchungkhar chung mi nan sic ang. Nannih zong lamkaltu hna le profet hna nih a hram an rak bunhmi cung i sakmi inn nan si ve cang i a kil lung cu Khrih Jesuh kha a si” a ti. Lamkaltu hna nih Messionnary an rak tuah i Khrihfabu hna cu an rak ser hna. Cu an sermi Khrihfabu hna cu anmah Lamkaltu hna bu si loin cu thawngṭha an phuanmi hna i a zummi hna i an sakmi innkillung cu Khrihfa Bupi ih a lu a simi Jesuh Khrih ah khan a si.
Lamkaltu (12) hna le a dang vialte hna nih vawlei cung kili ah missionary an rak tuahmi vialte cu anmah a bu kha an ser a si lo, Khrih i a bu kha an ser a si i nihin kan relmi bible pakhatnak (Eph.2:21) ah, inn cu a ningpi in i ṭhen lengluang loin a ningpi in a dirtertu cu amah kha a si i Bawipa Biakinn ah a chuahcanhtu cu amah ṭhiamṭhiam kha a si” a ti. Cucaah vawlei cung ki kili ah missionary an tuahmi vialte cu bu tam lengluang siloin Bukhat te ah Jesuh Khrih nih a sakmi inn a simi cu a pum bukhatte ahcun a zummi hna cu an luhter hna timi kha kan hmuh.
Duhdawtmi nu le pa, u le nau hna nihin ni ah St. Thomas puaini kan tuah bantukin St. Thomas a nun kha zulh khawh i zuam in i zohchunh in “Ka Bawipa le ka Pathian, a ka khamhtu pa” tiah kan Bawipa Jesuh Khrih kha thangṭhat le biak kha aa tim kho rih lomi na si ahcun i tim cang law; ka Bawipa le ka Pathian tiah nihin na nunnak ah na khamhtupa cohlang ve cang. Na nunnak na ning khawh tawk in St. Thomas bangin Messionary ruah kha i zuam cang ve usih.
Thazang petu /- Saya Canute Bawi Kam