Kan rian a kan chaangtu hna caah lam timhpiak cia zungzal ding a si

June 18, cacawn nilini caah thlarau thazaang laak dingin Bupi nih a kan thimpiak mi, a kan timhpiak mi kan Bible Cathiang hna hi Ecclesiasticus 48:1-15, Salm 96:1-7 le Mathai Thawngṭha 6:7-15 tiang an si. Nihin kan Bible Cathiang hna nih a kan cawnpiak mi cu Pathian ṭhawnnak, Pathian sunparnak le Pa Pathian kan caah Pa can in Pa dirhmun in a kan dawtnak hna kong kha a si. 

Voikhat Bible kan relnak ah Sirah Bible chungah Profet Eliah cu Pathian ṭhawnnak cu meialh bantukin a chim phuangtu, ngamhsang ngaiin Pathian ṭhatnak, Pathian lianngannak, cun a dinfelnak kha mi hna hmai ah ngamhsang ngaiin a rak chimtu, a rak phuangtu a si caah Pathian a dirkamhtu a si caah a chimphuan mi hi meialh nih thianternak a tuah bantukin, meikangh bantukin a kangh bantukin nihin ah tahchunhnak hmangin Sirah Bible chungah a ti. Eliah a nunnak kan zoh tikah a ngamh a sang, cun Pathian cungah zumhtlakte, mifel, cun a zumhnak dihlak biatak tein Pathian a zumtu a si. 

Cucaah Bawipa Pathian zong nih amah hmangin thil khuaruahhar tampi a tuah i, cun Eliah zong nih a nunnak kha Pathian sinah dotla tein aa ap ee timi kha kan hmuh. Mah cu pin ah Eliah a nunzia te ah aa dawh ngaimi kan hmuh mi cu; Van i cawisan a si hlan ah amah rian changtu dingah Pathian rianṭuantu dingah Elisha a rak thim i, amah kha rian a ap. Kannih hna zong thil pakhatkhat kan tuah tikah zumhtlak a simi minung pakhatkhat sinah khan generation kan hnu a ṭhang hnga dingmi hna mino hna, ngakchia hna sinah khan kan fimnak maw siseh, kan thiamnak maw siseh, kan theihhngalhnak maw siseh, chanhchin ding, pek ching ding timi hi Profet Eliah nunzia tein kan i laak dingmi a si. 

Cucaah Khrihfa kan nunnak ah khir ding a si lo. Kan thiamnak, kan hngalhnak, Pathian sinin fimnak zeizong vialte cu a rami a si caah, hi vialte hi kan hnu a ra hnga dingmi pawl sinah khan pekchin ding, cawnpiak chin ding, kanmah nakin thiam deuh hna seh, ṭhawng deuh hna seh tiin timhtuah piak ding a si. Cucaah Eliah in a thlarau ṭhawnnak nakin lethnih in ka pe law tiah Elisha nih a timi zong kha a si. Cucaah kannih Khrihfa hna nih kan nunnak ah ngamhsang tein le zumhtlak tein, cun kan thiamnak kan hngalhnak te kha mino hna, midang hna sinah pekchin ding rian kan ngei ti kha pakhatnak bik ah vun chim ka duh. 

Salm hla chungah Bawipa sinah a tharmi hla sa ulaw. Hla kan sa kan ti tikah kan lungthin chungin a hung chuakmi hi sak tawn ṭheo a si. Ngaihchiat caan ah maw, lunglen caan ah maw, asiloah lunglawmh caan ah maw. Kan thinlung chung i a ummi te kha langhter in phuan a si. Pathian sinah a tharmi hla sak ding kan ti tikah zeibantuk hla dah a si lai? Thlarau leiin aa dawh mi, cun kan lungthin thiang tein kan lungthin chung i a ummi a thianghlimmi hla, bia, ruahnak, thilṭha kha pekchanh ap in hlasak ding, tuah ding, nun ding timi te kha a si. Cucaah Khrihfa hna nih kan lungthin chungin Pathian kha thangṭhat khawh i zuam zungzal hna usih. Lungthin tak tein nihin kan Bible Cathiang nih a kan cawnpiak duhmi cu a si. 

Cun Gospel thawngṭhabia chung zongah Mathai 6:7-15 chungah zeidah kan hmuh ti a si ahcun ‘Bawipa Thlacamnak’ kan ti i, kan Bawipa Jesuh Khrih nih Zultu hna thlacam ning a cawnpiak hna nak kong kha a si. Jesuh Khrih hrimhrim nih Pathian hrimhrim nih zeitin thla nan cam lai timi kha a kan cawnpiak, a kan hmuhsak i, zeibantuk thinlung in dah thlacam ding a si timi kha a kan cawnpiak. Cucu hi Bible Cathiang chungah Pathian thlacamnak hi kannih hna zong nih nihin ni tiangah thla kan cammi cu a si.

Eliah nih thil khuaruahhar a tuah khawhnak hi amah ṭhawn siloin a lungthin tak tein Pathian aa bochan i a zumh caah a lungthin chungin Pathian nih thil khuaruahhar tampi amah hmangin rian a ṭuan bantukin kan Bawipa Jesuh Khrih nih hitihin thla nan cam lai ee tiah a kan cawnpiak mi hi kan lungthin tak tein Pathian kan thangṭhat, kan cam ve a si ahcun hi thlacamnak te hi zeitluk hmanh in tawi sehlaw a thianghlim tuk hringhran mi, a thiangmi Pathian nih a kan cawnpiak mi thlacamnak a si caah hmual tampi a um lai timi zong kha zum hna usih. Hi thlacamnak thawng te hin kannih kan chung zongin Pathian nih kan hmang ve sehlaw, thil khuaruahhar tuahnak tampi a um ve lai timi te zong kha Khrihfa hna nih kan zumh ding a si. 

Cu a si caah hi kan Bible Cathiang chungah Bawipa thlacamnak a donghnak te ahkhan zeidah kan hmuh ti a si ahcun sualngaihthiamnak-midang hna an sual kan ngaihthiam hna bangin kan sualnak kan ngaithiam ve law timi sualngaihthiamnak timi te zong kha telh chih a si ve timi kha kan hmuh. Cu a si caah a thianghlimmi Pathian he pehtlaihnak hnga ding caah Pathian ṭhawnnak kan chungin a langh khawhnak ve ding caah cun mi hna nih kan cung i an palhnak tete si hna seh, an sualnak ti ko usih, hri bantukin kan chungah kan ṭem peng a si ahcun, zeiti lei hmanh in kan thlah khawh lo a si ahcun Pathian khuaruahhar thil hi kan sinin a chuak kho lai lo. Cucaah zeibantuk te nihhin dah a ka dawntu a si? Ka thinlung chungah biatak tein thla ka cam khawh lonak hi zeidah a si timi te kha nihin ni ah ruatṭhan hna usih. 

Nan lungthin tak tein Pathian sinah a tharmi hla sa u tiah Salm hla chungah kan hmuh bantukin kannih zong kan thlacamnak ah thianhlimnak te he biatak zumhnak he thla kan cam, Bawipa kan thangṭhat a si ahcun Bawipa Pathian nih Eliah hmangin thil khuaruahhar tampi a tuah bantukin kannih zong kanmah hmangin thlarau tampi hna caah ṭhatnak a chuahpi tu, thluachuah a phortu kan si ko lai timi te kha nihin ni caan ah tawi tein thazaang laakṭi, thazaang hrawmṭi kan duh hna. Nan dihlak in Bawipa nih thluachuahnak in pe ko hna seh!

Thazang petu /- Fr. Fidelis Maung Sein