KA SEIHNAM I BEI U, DINHNAK NAN HMUH LAI

Nihin i Bupi nih a kan timhpiakmi puai cu “Jesuh lungthin thiang” puai a si i hini caan cathiang rel ding a kan timhpiakmi (Mt. 11:25-30) khar kha a si i a tawinak in kan vun char a si ahcun, “Maw ka Pa, van le vawlei a uktu. A fimmi le cathiammi hna sinin na thuhmi kha cathiam lomi hna sinah a langhter caah na cungah kaa lawm” timi le “Rethei le thilrit mi hna ka sinah ra u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve uh. Cun dinhnak nan hmuh lai. Ka saihnam cu a bei a nuam i ka thil cu a zaang” timi kong kha a tawinak in kan hmuh khawh. Cun Bible pakhatnak ah, Israel miphun cu Pathian nih miphun vialte lakah amah a roc aah a thimmi hna miphun thiang an sinak kha kan hmuh khawh i, “Nanmah cu nan tamtuk ruangah si lo, miphun vialte lakah a tlawmte nan si ko nain kan dawt hna caah kan thim hna” tiah a tinak kong le Bible pahnihnak ah cun (1Johan. 4) chungah kan hmuh khawhmi cu, “Dawtnak cu, Pathian kan rak dawt hi a si lo. Amah nih a kan dawt i kan sualnak vialte a kan ngaithiam dih i a Fapa Jesuh Khrih kha kan sinah a rak thlah. Kannih cu a dawtmi a fale kan si” tinak kong kha nihin Bupi nih a kan thimpiakmi cathiang chungah a tawinak in kan hmuh khawhmi a si. 

Duhdawtmi nu le pa, u le nau hna vawlei mi fimthiam tampi Scientist pawl hi Pathian a um lo tiah a cohlanmi an tam deuh i cunih cun van le vawlei zeizong vialte hi sertu Pathian a um lo i amah tein a rak cangmi a si tiah an rak ti i, minung zong hi zawng in minung ah duhsah tein kan i thleng i minung ah kan cang ti kha an zumh i an cohlan. Sihmanhsehlaw, sehmawngh lomi nikapi a ceumi le vawleipi aa hermi vialte hna hi amah le sining a caan keel tein a kal ning le ai mer ning kha an zoh ṭhan tikah hihi control tu pakhat khat cu a um hrimhirm ti cu an zumh nain cucu aho a si kha an hngal lo. Sihmanhsehlaw, duhdawtmi nu le pa, u le nau hna kannih cu cathiam lomi le mihrut kan si ko nain sertu Pathian kan hngalh i, zeizong vialte a hram thawhnak hi sertu Pathian a um ko ti cu kan hngalh i kan zumh. Cucu Pathian nih a kan dawtnak a sunglawi tukmi a si. 

(1Korin. 1:21) ah, “Minung nih anmah fimnak in Pathian hngalh khawh lonak ding kha Pathian nih a fimnak in a rak tuahmi a si” tiah a ti. A vun pehrihmi cu, “Kalvary vailam cung i kan Bawipa Jesuh Khrih a thihnak cu khuaruahhar tuahnak, khuaruahhar a umnak in Pathian kawl aa zuammi hna Judah mi hna caah cun tluknak lung a si i, fimnak in Pathian a kawlmi, fimnak lawngte a kawlmi Grik miphun caah cun valamtah cung i Khrih a thihnak cu hruhnak a si” tiah a ti. Sihmanhsehlaw, Pathian nih a kawhmi hna caah cun Judah mi an si zongah, Jentail mi an si zongah Khrih kha a si i Khrih cu Pathian hmual le Pathian fimnak a si” tiah a ti. Vawlei fimnak hi duhdawtmi nu le pa, u le nau hna amah sertu Pathian hngalh lo hi Pathian caah Thlarau bia ahcun fimnak a si lo ti kha kan zapi te nih kan hngalh awk a herh. 

(Golose. 3:12) ah, “Nannih cu Pathian mi nan si i amah nih an dawt hna i an thim hna” a ti. Pathian kan dawt i Pathian kan thim si loin amah tu nih a kan dawt i amah tu nih a kan thim i kan sualnak a kan ngaithiam i Fapa Jesuh Khrih kan caah a rak thlahmi kha a kan dawtnak a sunglawi tukmi dawtnak a si. Duhdawtmi u le nau, nu le pa hna (1905) kum ah a rak chuahmi kum (33) lawng a nungmi St. Fustina sinah Bawipa Jesuh Khrih aa rak langh tikah a chimmi cu, “Keimah a ka zum lomi hna nih cun vailamtah cung i ka inmi ka hliamhma pawl, ka hrimma pawl kha an fahter chin;” tiah a rak chim. Cun a ti rihmi cu, “ka zaangfahnak lungthin thiang zumh in, i bochan in ka sinah a rami vialte cu ka zaangfahnak thluachuah an co lai” tiah a chim fawn. 

Duhdawtmi nu le pa, u le nau hna misual kan si. Jesuh lungthin thiang zumh in, amah lungthin thiang i bochan in a sinah kal hna usih. A zaangfahnak thluachuah kan caah a kan chiahpiak a si. A chimṭhan rihmi cu, “Fustina, tlangbawi a simi Pathian rianṭuantu vialte hna hi kan zaangfah dawtnak vialte hi mi vialte sinah a phawtzamhtu an si caah ka zaangfahnak rili chungah rak hnim tuah hna” tiah a ti fawn. Cucaah cun duhdawtmi nu le pa, u le nau hna tlangbawi rian Jesuh Khrih aiawh in a ṭuanmi kan Pope, Cardinal, Bishop, Siangbawi caah a hleice thlacam piak ni tiah Bupi nih a kan fial bantukin Jesuh Khrih a zaangfah dawtnak mikip sinah a phawtzamhtu kan Siangbawi te caah ahleice in thlacampiak hna usih. Jesuh Khrih lungthin thiang zaangfahnak chungah i hnimphum khawh i zuam cio hna usih. 

Rethei le thilrit mi hna ka sinah ra tuah i a ti. Pathian a theilomi mifim cathiammi hna nih vawlei cung Pathian kutchuak thilri hna cu dawt loin fimnak le ṭhawnnak i zuam in vawlei cungpi an hrawh cuahmah lioah nang le kei vawleipi caah mihrut a simi hna kan lungrethei kan vansang, sihmanhsehlaw harnak phunkip kan tong si ko hmanhsehlaw kanmah a kan dawbik tu Jesuh Khrih a um ko caah kan lungre theihnak vialte, kan zaang batnak vialte, kan ngaihchiatnak vialte, kan harnak vialte zeizong vialte sertu Pathian pe ko hna usih. Amah Pathian i a seihnam cu i bei ko usih law, nun hnangam tein nun karhlan i zuam ko hna usih. Jesuh lungthin thiang nih kan zapi kan zaangfah in thlachuah sunglawi kan pe hram ko seh. 

Thazang petu /-Saya Canute Bawi Kam