Mangṭam

Nihin Pathian biathiang in thazang lak ṭi dingah (1Siangpahrang 17:1-7) chungin a si lai. “Bawipa, Israel Pathian, a hmaika i ka dir tawnmi a nun bangin, dap siseh, ruah siseh, ka bia in dah ti lo ahcun, hi kum hna chungah hin a um lai lo” tiah a ti. Cun tlawmpal hnuah khin, ram chungah ruah a um lo caah, tivate ti cu a reu dih.

Nihin ni caah thazang hrawmh kan duhmi hna cu “mangṭam” timi a si lai. Bible cathiang kan relmi chungah zeidah kan hmuh khawh tiah cun Ahab siangpahrang nih Pathian kha hnu a chit i Baal kha a rian a ṭuanpiak i a biak. Samaria khua chungah Baal caah inn pakhat a sak i cu inn chungah cun biakṭheng pakhat a ser. Cucaah Pathian cu Ahab cungah khan a lung aa lawm lo i Profet Elijah kha a sin ah a va kal i “Ka bia in dah ti lo ahcun hi hna kum chungah hin dap siseh, ruah siseh a um lai lo” a ti. A tanglei ah kan rel ṭhan mi cu “Mah ni thawk cun ruah a sur lo i kumthum chung ruah a sur lo caah an ram chungah pam a tlung” timi kha kan hmuh. 

Nihin ni ah thazang hrawmh kan duh mi hna cu, mangṭam vialte lakah, pam vialte lakah ṭih a nungbik mi cu Khrihfa hna kan caah cun Pathian bia mangṭam hi a si. Khrihfa bu tampi le Khrihfa cheukhat cu Pathian bia hi kan sinah a um ti lo i, Pathian bia hi kan thei kho ti lo i Pathia bia hi kan Khrihfa bu chungah siseh, kan chungkhar chungah siseh, kan peng kan ram ah siseh, mangṭam a tlun cuahmah lio asi ti zong kha kan hmuh khawh. 

Cucaah cun Khrihfa pakhat, member pakhat thlarau hnuk ti a khim lo tikah zeitindah an um ti ahcun thlarau hnuk kawl ah an vak. An vak i a hnu ahcun an mah le an um nak ah khan an sia a rem ti lo caah thlarau hnuk ti um nak lei ah an kal i an bu a chuahtak mi hna zong tampi kan hmuh hna. Hihi kan ruah tikah a ruang zeidah asi kan ti ahcun thlarau hnuk ti kha tlamtling tein le khim tein an ei an din khawh lo caah le kan pek khawh lo hna caah a si timi kha nihin ni caan kan tonmi chungah kan hmuh khawh mi cu asi. 

Cun Khrihfa pakhat thlarau lei in kan ṭhan khawhnak ding caah abiapi bik mi hi Pathian bia a si bantukin tahchunhnak in kan chim a si ahcun; motor pakhat hi a duhnak ah a kal khawh nak ding caah cun datsi a herh. Datsi a um lo ahcun motor pakhat cu zei ti hmanh in a kal kho lo. Cu ve bantukin Khrihfa pakhat hi thlarau lei ah kar kan hlan khawh nak ding caah cun a pakhat nak ah kan herh mi cu Pathian bia hi asi.  

Pathian Thlarau hnuk kha kan duh lo i thlarau hnuk ti in kan ṭhan lo ahcun zeitik hmanh ah teinak nun timi kan ngei kho bal lai lo. 1Pet 2:2 chungah “Thlarau hnuk kha duh u law, thlarau hnuk nan dinnak thawngin nan ṭhang lai” tiah a si. Khrihfa pakhat thlarau lei in kan ṭhan nak hnga caah cun thlarau hnuk hi abiapi ngai mi asi. Cun thlarau hnuk hi tampi kan din khawhnak hnga ding caah cun kan mah lei zongin lam tampi kan sial piak a hau ve i Pathian bia hi tampi kan rel ding zong kha abiapi ngai mi a si timi kha nihin ni ah thazang pek kan duh hna. 

Cu lawng siloin thlarau hnuk kan duh lo i vawlei hnuk, vawlei pumsa duhnak kan zulh hnawh tikah nikhat hnu nikhat kan thlarau hi a car chin lengmang i cuticun kan ral satan nih a kan tei i Pathian fa kan sinak kha a caan ahcun kan thlau ṭheo tawn. 

Cuasicaah Pathian bia hi tampi theih khawh i zuam hna u sihlaw, Pathian bia hi tampi chim khawh i zuam hna u sihlaw, thlarau ah a ṭhangmi zumtu kan si i thlarau ah nu tling pa tling sinak lei ah kar a hlang mi zumtu ṭha kan si khawh nak ding caah i zuam hna u sih timi kha nihin ni caan ah thazang pek kan duh hna. Nan dihlak in Bawipa nih thluachuahnak in pe ko hna seh. 

Thazang pe tu /- Saya Simon Hram Ling