Pope Loe XIV: Myanmar rammi hna kong he pehtlai in Vawlei pi sinah ka chim lai
Pope Leo XIV le Cardinal Charles Bo kut tlaihnak. Potho Credit to His Eminence Cardinal Charles Bo
Rome ah Pope he ton dingin a kal mi Myanmar Bishop hna nih June 5, ni ah Pope Leo XIV cu tlamtling tein ton-biarauh khawhnak caan ttha an ngei hna tiah theih a si.
Cardinal Charles Bo nih “Tuzing 9:30 in 11 tiang, suimilam pakhat le cheu hrawng, Pope Leo XIV he chungkhar hna i tonbantukin tonnak caanttha kan ngei hna” tiah a ti.
Cu tonnak ah Cardinal Charles nih Myanmar ram aiawh in biachimnak a ngei i cu biachimnak a dih in Pope caah tiin Myanmar ram in an i put mi laksawng peknak zong pehzulh in an ngei hna.
Cun Pope Leo le Bishop pawl cu Myanmar ram dirhmun kong he pehtlai in ram mi hna si ning dirhmun le harsatnak pawl zong chimrel ttinak suimilam pakhat tluk an ngei hna. “Pope pa zong nih unau bantukin le Pa can dirhmun in bia zong ttha tein a kan ruah” tiah Cardinal Bo nih a ti.
Cardinal nih zumtu hna ruahchannak le dirhmun kong he pehtlai in a timi cu: “A tu lio caan ah kan thil tonmi hna hi an harsa tuk ko nain Myanmar Khrifabu, hruaitu hna zong nih zumhnak he teirial in hmai kan nor cuahmah lio asi” tiah a ti.
Cardinal Charles Bo nih Pope Leo XIV sin laksawng a pek lio. Potho Credit to His Eminence Cardinal Charles Bo
Cun zumhnak kong he pehtlai in siseh, Siangbawi cannak caah timhnak a ngei mi seminarian hna caah timhpiak nak kong he pehtlai in siseh, Pope nih thazang peknak le forhfialnak zong a ngeih hna.
Cardinal nih a lungchung um bia a chimmi cu “ Pope he ton khawhnak caan ttha kan ngieh mi in thazang tampi a thar in kan hmu” tiah a ti.
Pope nih bishop hna sinah biacah a chimmi cu, “Myanmar rammi hna kan philh hna lai lo. Ka thlacamnak zongah kan theih peng ko hna lai” tiah a ti.
Tonak a donghnak lei ah Pope Francis nih a rak chimmi “Non dimenticare Myanmar” “Don’t forget Myanmar” tiah a rak timi program kha pehzulh in kan tuah piak hna lai” tiah Pope Loe nih a chim i “Myanmar rammi hna tonmi harnak hna zong vawlei pi nih a theih hngalh khawhnak hnga ka chim lai” tiah a ti.