Thihnak in thawhṭhannak kong

2026, June 3, RVA Hakha service in nan kut kan in tlaih hna. Bawipa nih damnak, lawmhnak, hnangamnak in pe cio ko hna seh. Tuzing Gospel chungah kan hmuhmi Mk 12:18-27: “Cun Sadusi mi kha an ra, annih cu thihnak in thawhṭhannak a um lo a timi an si. An i thawh i, ‘Saya, Moses nih phung a kan ṭialpiak mi ah mipa pakhat cu fa ngei loin a thih ahcun fa a hrinpiak nak hnga a unau nihkhan a rohmi a nupi cu an ṭhit awk a si lai ti a si. Voikhat cu unau pasarih an um i, an upabik nihcun nupi a ṭhit. Sihmanhsehlaw fa ngei loin a thi. Cucaah a hung changtu nihkhan a rohmi cu a ṭhit. Asinain amah zong cu fa ngei loin a thi ve. Cuticun a pathumnak zong kha a si i, a dang zong cu an si cio. An pasarih cun cu nu cu an ṭhit i fa ngei lo cun an thi dih. Cun a hmanungbik ah cu nu zong cu a thi ve. Cucaah thawhṭhan ni ah mithi vialte kha thawhter an si ahcun cu nu cu aho nupi dah a si kun lai? An pasarih tein an ṭhit cio ṭung’ tiah an ti. Jesuh nihcun a leh hna i, ‘nan hei palh hringhran dah! Cun zeizahdah nan palh ti nan hngal maw? Cathiang siseh, Pathian ṭhawnnak siseh nan hngalh lo caah a si. Mithi cu thawhter an si tikah Vancungmi bantuk pei an si lai cu. An i ṭhi in an i um ti lai lo. Mithimi thihnak in thawhter ṭhan an si lai le si lai lonak kong cu Moses cauk chungah khan burbuk a kangmi kong kha nan rel bal lo maw? Khaka ahkhan Pathian nih Moses cu a thawh i, ‘Kei cu Abraham Pathian, Isak Pathian, Jacob Pathian ka si a ti’ tiah aa ṭial ṭung. Cucu a nungmi hna Pathian a si, a thimi hna Pathian a si lo tinak a si. Nan palh cikcek’ tiah a ti hna.”

Kan cathiang chungah a tlangpi ah kan hmuhmi cu ‘thihnak in thawhṭhannak kong’ ti kha a si. Tuzing kan cathiang chungah kan Bawipa Jesuh Khrih nih Vancung, zungzal nunnak le hi vawlei sining, thluak i ruah khawh mi le tuah khawh mi a si lo zia kha Sadusi mi hna nih an halmi in a leh hna nak kong kha kan hmuh. Kan cathiang chungah zumhnak in miphun pahnih hi kan um i, cucu thih hnu in thawhṭhan i zungzal nunnak a zummi le kan thih cun kan dih ko cang tiah thawhṭhannak nun a zum lomi phunhnih an um. Farasi mi le Sadusi mi tiin an um i, Farasi mi hna hi thih hnu thawhṭhan zungzal nunnak cu an zumh ko nain an zumh dan hi kan Bawipa Jesuh Khrih zumhnak, cawnpiaknak in zumh loin khamhnak tlanhnak zumh loin Moses phungbia le Judah mi hna cawnpiaknak in dinfelnak, minung tuahṭuannak in Pathian lungton in thawhṭhannak nun hi a zummi kha an si. Sadusi miphun hi kan thih hnu cun kan dih ko cang, kan lo ko cang, thawhṭhan nun a um ti lo tiah a zummi hna an si i, tuzing kan cathiang chungah hin Sadusi mi hna nih taksa, minung sinak, minung thiamnak in kan Bawipa Jesuh Khrih bia an halmi kha kan hmuh. 

‘Moses phungbia chungah mipa pakhat nih nupi a ṭhit i cu pa cu a thih ahcun fa an ngeihpiak nak hnga cu pa a thimi i unau nih an ṭhitṭhan ding a si tiah Moses nawlbia nih a kan cawnpiak ṭung. Tahchunhnak ah unau pasarih an um i upabik pa nih nupi a ṭhit, fa ngei loin a thi. Fa a ngeih khawhnak ding caah tiin a changtu he an fonhṭhan hna. A changtu zong cu fa ngei loin a thi ve. Cuticun a pathumnak pa zong cu, cu nu he cun an fonhṭhan hna, fa ngei loin a thi ve. Cuticun unau pasarih tiang kha fa ngei loin an thi. A donghnak ahcun cu nu zong cu a thi ve i, thih hnu thawhṭhan ah tah cu nu cu aho nupi dah a si lai?’ tiah Sadusi mi hna nih kan Bawipa Jesuh Khrih an halmi kha kan hmuh khawh. Kan Bawipa Jesuh Khrih nih a timi hna cu ‘Taksa sining in ruat hlah u; Pathian ṭhawnnak hi nan hngal lo hringhran dah! Mithi cu thawhter an si tikah cun Vancungmi bantuk an si lai, an i ṭhi in an i um ti lai lo’ tiah a timi hna kha kan hmuh mi kha a si. Sadusi mi hi anmah minung sining thluak, tuaktan mi le ruah khawhmi tiang lawngin Pathian hi an zumh i, thih hnu thawhṭhan, zungzal nunnak pinlei tiang a zummi kha an si lo.

 Zumtu u le nau hna, kannih hna zong minung taksa sining in thluak nih a tuak khawhmi kan fimnak kan ruahnak nih a ruah khawhmi tiang lawngin Pathian hi kan zumh a si ahcun zeizong tuah kho Pathian si loin minung level minung sinh ceo khi a si ding kha a si. Kannih nih Khrih kan zumhnak, Pathian kan zumhnak cu minung ruahmi nih a phak ti lomi, minung tuakmi nih a phak ti lomi, zeizong vialte a tuah khotu a si ti kha kan zumh caah cucu kannih nih kan biakmi a si i, Pathian kan timi cu a si. Tahchunhnak ah kan Bawipa Jesuh Khrih nih ‘Vancung in a rung ṭummi nunnak changreu cu Ka si, Ka sa a ei i Ka thi a dingmi cu zungzal nunnak an ngei lai’ tiah a ti tikah changreu kan zoh tikah cun minung sermi a si ko, kan Tlangbawi kan Siangbawi te nih thla an cam, thluachuah an pek zongah a thawtnak aa dang in, a rim aa dang in, a muisam zong aa thleng lem lo. Sihmanhsehlaw kannih nih kan zumhmi cu, cucu minung nih kan hmuh, kan ruah, kan theih khawhmi tiang lawng si loin zeizong tuah kho Pathian nih ‘A si’ a ti ko ahcun a cang ko hme cu, a si ko hme cu tiah kan zumhmi kha cucu zumhnak a si. Kan zumhnak kan ruahnak kan fimnak nih kan theihnak nih a phak khawh ti lomi pinlei ah a ummi Pathian a si caah cucu kannih nih kan zumhmi, kan biakmi zeizong tuah kho Pathian cu a si ti kha a si.

Cucaah dawtmi nu le pa u le nau hna; kan Bawipa Jesuh Khrih nih ‘Abraham Pathian, Isak Pathian, Jacob Pathian ka si’ tiah aa ṭial ṭung. Cucu a nungmi hna Pathian a si, a thimi hna Pathian a si lo’ tiah Sadusi mi a timi hna kha kan hmuh. Sadusi mi hna hi an thi maw an nung kan ti a si ahcun taksa cun an cawl an cang, an fim, an tuak an ruat kho ve ko, asinain thih hnu pinlei zungzal nunnak timi kha an zumh lo caah mithi ah kan Bawipa Jesuh Khrih nih a timi hna kha a si. Abraham, Isak, Jacob cu an taksa cu a nung ti lo nain an zumhnak kha a nungmi a si caah minung tiah, a nungmi an si tiah a nungmi hna Pathian a si tiah cathiang ah kan hmuhmi kha a si. 

Cucaah kannih hna zong hi kan nung maw kan thi? Taksa in cun kan cawl kan cang, khua kan tuak, taksa pawcawmnak ding caah khua kan khang, lai kan rel ko. Asinain thih hnu pinlei zungzal nunnak taktak hi kan ngei maw? Sadusi mi hna bantukin kan ruah khawhmi le kan tuak khawhmi tiang in maw Pathian hi kan zumh! Thih hnu pinlei zungzal nunnak hi tah kan zum maw? ti kha i ruat in kannih hna nih nifatin kan nunnak ahhin kan Bawipa Jesuh Khrih; kannih kan biakmi Pathian cu zeizong vialte a tuah khotu Pathian, minung ruahmi le minung thil ti khawhnak nih a phak lomi pinlei tiang a tuah khotu a si. ‘Ka si’ a timi le ‘tuah u’ a timi hi kannih nih kan ruah khawh ruah khawh lo pek ah kan zulh kan tuah a si ahcun cucu a nungmi zumhnak, kan Bawipa Jesuh Khrih nih ‘Pathian cu a nungmi hna ta a si’ tiah a timi kan si ko lai. Bawipa nih thluachuahnak kan pek piak ko seh! 

Thazang Petu: Saya John Chan Uk