KHRIH HNUZULH TIMI

November 6, 2024 (Luke 14:25-33)

Nihin caah kan rel mi Thawngṭha hi hngalh a harmi a si kho. Jesuh cu a zultu hna he lam an kal lio ah mibu nganpi nih an zulh. Jesuh nih mibu kha a zoh hna i a chimmi cu: “Ahohmanh ka sinah a rami cu a pa siseh, a nu siseh, a nupi siseh, a fale si hna seh, a unau si hna seh, a farle si hna seh, amah le amah siseh, aa huat lo ahcun a ka zultu a si kho lo” tiah a ti hna. Cun a chimchap mi cu, “A vailamtahnak kha aa put i a ka zul lomi cu a ka zultu a si kho lo” tiah a ti rih hna.

Jesuh chimmi bia hi a fak ngaimi biafang an si! Jesuh nih nu le pa, u le nau, fale le hawikom hna huat ding hi a chim duhmi a si taktak hnga maw? Asiloah Jesuh nih amah hnuzulh kan i thimh taktak a si ahcun Amah kha kan nunnak ah pakhatnak ah chiah a herh timi maw a si hnga? A si taktak ko. Jesuh hnuzulh kan i tim cang kan ti a si ahcun zumh tlak kan sinak kha Amah cungah kan chiah taktak a herh ko. Jesuh nih kan chungkhar le kan hawikom hna kha dawt hna lo ding a si tinak a silo. Amah sin kan i pek cang a si ahcun Amah nunzia kha kan i nunpi ding a si.

Jesuh nih a hnu a zulmi hna sinah khan ahmaan taktak mi bia a chimh ko hna. Cucu kan nunnak ah pakhatnak le biapibik ah Jesuh kha kan chiah ding a herh. Cun Jesuh nih kan chungkhar, kan hawi le hna kha huat dih cikcek dingin a kan cawnpiak duhnak zong a silo.

Mah le mah i dawt bantukin pawngkam a ummi hna zong kha dawt ve hna ding kong zong Jesuh nih atu le tu a kan cawnpiak lengmang ko. Nihin ah kan tonmi minung pakhat cio hna kha dawt khawh i zuam hna u sih. Cun pakhat le pakhat kan i dawt ding zong kan sinin Jesuh nih aa ruahchan ve. Mit in hmuhkhawh mi hna kha dawt khawh loin zeitindah hmuh khawh lomi Pathian cu kan dawt khawh hnga.