Pathian nih a kan cawnpiak mi vialte kha pehzulh in cohlan ding a si

Pa le Fapa le Thiangthlarau min in Amen. Bawi Khrih ah zumtu dawtmi nu le pa u le nau vialte hna, Pathian nih a kan dawt, kan nunnak a ṭhabik in lam a hruai i, atu bantukin RVA hmangin Pathian bia chimphuan khawhnak caanṭha ka hmuh caah kan biak Pathian cungah lunglawmhnak tampi ka ngei i, hi bantukin caan pek in a kan zoh a kan ngaitu zumtu nan dihlak cungah Bawipa nih a thar in thluachuahnak in pe cio ko hna seh. Pslam caṭialtu nih, ‘Pathian nih a kan pekmi ni hi zeitlukindah a ṭhat, hi ni ahhin i lawm usihlaw i nuam usih’ tiah a ti bantukin Pathian nih a kan pekmi ni le caan chungah dam te le lawm te le tluang tein nan hman cio khawhnak hnga ding caah Bawipa nih a ṭhabik in lam in hruai cio ko hna seh. 

2026 April 29, kan Nu Bupi nih thlarau bia thazaang kan laak cio khawhnak hnga caah tiin Pathian bia tlang a kan tarpiak mi Johan thawngṭha 12:44-50, ‘Jesuh nih aw thangpi in, keimah a ka zummi poah nihcun keimah lawng kha a ka zumh siloin keimah a ka thlahtu kha a zumh ve a si. Keimah a ka hmu mi nih keimah a ka thlahtu zong kha a hmuh a si. Hi vawleicung ah ceunak bantukin ka ratnak cu a ka zummi poah kha khuamui chungah an um pengnak hnga lo caah a si. Ka bia a thei nain a ngai duh lomi cu keimah nihcun bia ka ceih lai lo, vawlei hi a bia ceih awkah ka ra lo, vawlei hi khamh awk tu ah ka ra. Keimah kha a ka hlaw i ka bia a cohlang duh lomi cu a bia ceihtu ding a um ko. Ka chimmi ka bia hi ni hmanungbik ni ahcun bia a ceihtu cu a si te lai. Zeicahtiah keimah nawl in ka chim lo, Ka chimmi cu a ka thlahtu ka Pa nih na chim lai tiah a ka fialmi kha an si. Na chim lai tiah a ka fialmi bia cu zungzal nunnak petu a si ti kha ka hngalh. Cucaah ka chimmi bia cu Ka Pa nih na chim lai tiah a ka timi bia kha a si’ tiah a ti. Pathian thawngṭhabia a si. Maw Bawipa, nangmah cungah ṭhangthatnak um ko seh.

Pathian nih minung a sermi khamhnak ding caah hin a Fapa ngeihchun kha vawlei ah a rak thlah i a Fapa ngeihchun nihcun a zultu kha a thlah hna i khamhnak thawngṭhabia le zungzal nunnak bia kha chim awkah a fial hna. Kan Bawipa Jesuh Khrih nih cathiang ah a kan chimhmi cu ‘Vawlei ah Ka rat i Ka chimmi le Ka tuahmi vialte hi Keimah duhnak le Keimah duhning in a si lo. A ka thlahtu ka Pa nih chim seh, tuah seh ti a duh ningin ka chim ka tuah i Ka Pa le keimah cu pakhat kan si i, ka Pa le keimah cu hmunkhat ah a ummi kan si. Aa khat mi kan si, Keimah a ka hmumi poah nih ka Pa kha an hmuh i ka bia a ngaimi poah nih ka Pa bia kha nan ngaih a si’ tiah a ti bantukin zultu hna a thlah tik hna ahhin ‘nan bia an ngaitu cu keimah ka bia a ka ngaitu an si i keimah ka bia a ngaimi cu a ka thlahtu ka pa bia a ngaimi an si’ tiah a ti ve i zultu kha a thlah hna i khamhnak thawngṭhabia kha an chim. Cu khamhnak thawngṭhabia cu tiva bangin a hung luang i zultu hna hmangin kannih kan laitlang kannih sin zongah a rak phan ve. 

Cucu Pathian nih a kan dawtnak Fapa Jesuh Khrih thawngin zultu hna hmangin kan hmuhmi a sunglawi tukmi khamhnak thawngṭhabia kha a si. Khamhnak thawngṭhabia kan timi a theimi vialte le Pathian ka zum ko a timi vialte hna nih ni hmanungbik ah biaceihtu ding cu Pathian a bia hi a si. Kan Bawipa Jesuh Khrih nih ka bia hin biaceih an si lai tiah a timi kha cathiang ah kan hmuhmi kha a si. Zumtu kannih vialte hna hi ni hmanungbik biaceihtu hi a kan tahtu ding hi zeidah a si lai tiah kan ti ahcun Pathian bia hi a si ding a si. Vawlei cungah hin tahnak timi hi a phunphun hi a um cio i lam tah tik zongah a hlat a naih, meng le phalong, pe tibantukin tah hi a si. A rih a zan timi zong hi kg, a cuai, tan tibantukin tah hi a si bantukin ni dongh tikah ni hmanungbik ni ahhin kan tuahmi le kan zumhnak vialte hi kan Bawipa Jesuh Khrih a bia in tah a si te lai timi kha kan Bawipa Jesuh Khrih nih fiang tein a kan cahtaak mi a si. Tuchan ah kan Lai, Khrihfa unau kan pawngkam kan zoh tikah hin ahodah piangthar, zeibantuk hi dah pianthar a si hnga kan ti a si ahcun pianthar kan timi cu holh theih loin a holh lai, a laam lai, Halleluiah a au lai tiah a timi tampi khi kan um. Sihmanhsehlaw cucu Pathian bia ah kan hmu maw hmu lo kan ti a si ahcun a piangthar mi, khamh aa fiangmi, tlanh a simi, born again a ngahmi an si lai ticun kan cathiang ah kan hmuhmi a um lo. 

Cathiang chungah a um lomi cu minung duhnak, minung ruahnak a si i cathiang chung a ummi lawnglanwg hi kannih nih kan zulh i cuticun Pathian bia lawnglawng nih bia kha a kan ceih te ding a si ti kha fiang tein kan hmuhmi kha a si. Pa Pathian nih Fapa Jesuh Khrih thawngin vawlei misual a kan tlanh i Fapa Jesuh Khrih nih a thlah mi zultu hna thawngin kannih cio zong Khrihfa ah kan canmi a si bantukin a hmaanmi kan timi hi Pathian he aa pehtlai i zultu hleihnih he tiva bangin catlo tein a luangṭi dingmi kan si ding kha a si. Zultu he aa peh lomi poahpoah cu zumtu hmaan an si lo. Zeicahtiah khamhnak kan timi cu a cat, aa pehṭhan, a catṭhan ti siloin Pathian nih Fapa Jesuh Khrih a thlah, Jesuh Khrih in zultu hleihnih a thlah hna i cuti tecun zultu hna he catlo tein aa peh dingmi kan si ti kha tuzing cathiang ah kan hmuhmi kha a si. Cathiang ah kan hmuh bantukin ‘zultu hna lam loin lamdang cu thlarau tlau hmangmi lam a si, lamdang zeihmanh a um ti lo, vancung lei kalnak lam cu’ tiah hlathiang ah kan sak bantuk tein vancung lei kalnak lam hi zultu hna he aa pehmi, zultu in kan Bawipa Jesuh Khrih, kan Bawipa Jesuh Khrih in a thlahtu Pa Pathian, cuticun aa pehmi a si ti kha fiang tein kan hmuhmi kha a si. 

Cucaah dawtmi zumtu u le nau vialte hna, kannih Pathian kan zumh, Kan Bawipa Jesuh Khrih kan zumh, zungzal nunnak a coding kan si tiah kan i ti tikah hin kanmah duhning, kanmah ruahning, kanmah lungsinak, kanmah emotion, kanmah lawnhnak men in maw Pathian hi kan zumh le Khrihfa hi kan si? Asiloah Pathian nih kan Bawipa Jesuh Khrih nih an kan cawnpiakmi a bia in dah Pathian hi kan kawl i zungzal nunnak co hi aa timmi dah kan si tihi i ruah awk ah ka duh ngaingai ko. Tuchan ah minung tampi nih anmah diriamnak le anmah nuamhnak le anmah hnangamnak, anmah emotion in Pathian a kawlmi tampi an um. Pathian thiangthlarau nih a kan hruai a timi tampi an um. Asinain cathiang ah kan hmuh lomi poahpoah cu Pathian bia an si lo ti kha fiang tein kan hmuh i Pathian bia lo cu a leng a si ti kha lenglei bia minung ruahnak bia a si ti kha kan hmuhmi kha a si. Kan Bawipa Jesuh Khrih nih ‘tuu luhnak kutka cu keimah hi ka si, keimah in a lut lomi poahpoah cu mifir le damiah nan si’ tiah a ti bantukin tuu luhnak kutka kan timi cu kan Bawipa Jesuh Khrih in zultu he aa pehmi kha a si awk kha a si. 

Ni hmanungbik ni ahcun ‘ka Pa ka Pa, tiah a ka timi paoh in vancung pennak ah nan lut lai lo, vancung ummi ka Pa nih tuah hna seh ti a duhmi a tuahmi lawnglawng an lut lai, khi tikah Bawipa na min in khuachia ka ṭhawl e, Bawipa na min in mizaw ka damh hna, mithi ka thawhter hna, khuaruahhar thil ka tuah, tampi ka tuah an ti lai asinain mi hrokhrol hna kal u, ka sinin chuak uh kan ti hna lai tiah’ a ti. Zeiruangah tuu luhnak kutka a simi kan Bawipa Jesuh Khrih in zultu hna he aa pehmi siloin a lengin Pathian bia lengin a lutmi hna cu mifir le damiah kan ti hna lai tiah a timi kha kan hmuh mi kha a si.

 Cucaah kannih hna nih kan zumhnak zong hi tuaktan awk a hau ngaingai. Cathiang he aa pehtlaimi si maw? Pathian nih a kan fialmi si maw? Cathiang ah a ummi a si maw? ti kha kannih nih ruah awk kha a biapi ngaingai mi kha a si. Cucaah zungzal nunnak kan conak hnga ding caah hin a lenglei in siloin Pathian bia in a kawlmi le Pathian bia in Pathian duhnak tuah a duhmi kan si khawhnak hnga Pathian nih thluachuah kan pe ko seh.