Nunnak innka cu Jesuh a si

Thawhṭhan Zarh(4)nak Zarhpi ni ah kan rel hnga dingmi cathiang hna cu (Lamkaltu 2:14,36-41; 1Peter 2:20-25; Jn 10:1-10) hna hi an si. Nihin cu Bupi nih ‘Tuukhal ṭha Jesuh’ puai ni tiah a kan tuah piak. 

Nihin kan relmi cathiang hna chung zong in ‘Bawipa cu Vancung kan luhnak kutka’ a si nak kha an langhter cio. Peter nih ‘Jesuh cu khamhtu a si’ nak kong a chimmi cu mi vialte nih an cohlaan i an sualnak an i ngaihchih hna i tipil nak an ing hna tiah a ti. Cun avoi(2) nak ka relmi cathiang chung zongah ‘Khrih cu kanmah caah sifah harnak a in. Amah nawl kan i cawn, a hnu kan zulh ah cun Jesuh Khrih bantukin kannih hna zong ṭhawnnak kan hmu lai.’ Kannih hna zong Jesuh Khrih thawngin ṭhawnnak kan ngeih khawh nak hnga ding caah thluachuah veel laksang kan hal a herh. 

Thangṭhabia John 10 chungah Jesuh nih ‘Innchung luhnak kutka ka si’ a ti. Cucaah kutka a simi Jesuh Khrih in Pathian sin ah kan panh, kan luh ding a si. Pathian cu kan thinlung chungah a um cang tiah kan theih a si ahcun midang hna zong kan thinlung chungah umter khawhnak ṭhawnnak kha Pathian nih a kan pek khawh. Pathian ṭhawnnak ṭhangṭha kha fakpi in kan chim khawh ve lai i, kan chimphuan mi a ngaitu vialte hna chung zongah Pathian Thlarau nih rian a ṭuan ve lai i Pathian sinah an sualnak ngaihchih in an hung kir ve ko hna lai. Cutin kan tuah khawh nak hnga ding caah Jesuh Krhih ṭhawnnak kan ngeih a herh.        

Jesuh Khrih bangin dawtnak lungthin kan ngeih ve a herh. Cu dawtnak thawngin zeithil paoh tlung hmanhseh, harnak,sifahnak, hremnak kan in zongah teinak kan hmuhhrimhrim ko lai. 

Mithiang Stephen tuanbia te kan zoh a si ahcun, Stephen cu an tlaih i an thah mi a si. A thih hlan ah zeidah a chim, ‘Jesuh Khrih cu Pa orhlei ah a ṭhut i van a hun kha ka hmuh’ tiah a ti tikah Judah mi hna cu an thin a hung tuk i lungin thi lak in an ceh. Cu lio te ah cun ‘Maw Bawipa, ka thlarau cu na kut cungah kan pek’ tiah a ti. Cun a thaṭu hna ca zongah ‘zei an tuah an thei lo, an sualnak rak ngaithiam ko hna’ tiah thla a campiak rih hna. A cungah ṭhat lonak a tuah tu hna hmanh kha ngaihthiam khawhnak “Ṭhawnnak” kha Stephen nih a ngeih mi cu a si. Cucu Jesuh Khrih sin in hrambunh in a hmuhmi, a ngeih mi a si. 

Pathian dawtnak ‘Innka’ cu zungzal in aa hung ko. Kan lut lai maw lut lo timi kha kan i thim ding mi cu a si. Nunnak innka, “Kutka” in luh dingin Jesuh Khrih nih nihin ni ah a kan sawm ko. Nunnak innka in kan luh a si ahcun Vancung pennak cu kan hmuh ko lai. 

Innka dangin a lut mi cu ‘mifir le damiah an si’ tiah Jesuh nih ralrinnak zong a kan chimh. Mifir le damiah cu fir ding le hrawh ding lawng aa timmi an si caah, an caah a donghnak lam cu thongtlaknak, hremnak, “Hell” kha a si ko. 

Jesuh Khrih dawtnak le a kan hun piakmi “Innka, kutka” in a lutmi kan si nak hnga, vancung Pennak ram, zungzal nunnak ram ah a lut kho mi kan si nak hnga Jesuh Khrih nih nihin ni caan ah a kan cawnpiak. Nunnak kutka a hmu tu le Jesuh cawnpiak ningin a nung kho tu kan si khawhnak hnga i zuam hna u sih. Jesuh Khrih cu vancung kutka hunnak nawl a ngeitu a si. Amah nih luh dingin lam a kan hmuhsak mi, cun cu lam cun ṭha tein a kal kho mi a zul kho mi kan si khawh nak hnga ding ca zongah a biathiang in nifatin a kan cawnpiak, a kan sawm ko. Zungzal nunnak ah nuam tein a lut kho tu kan si khawhnak hnga i zuam hna u sih. Cun kanmah lawng siloin kan hawikom hna he Jesuh Khrih nih a kan hun piakmi “Kutka” in a lut kho mi kan si khawhnak hnga ding ca zongah i zuam hna u sih.