Nunnak thingkung cu ban u sihlaw a thei cu ei hna u sih

Thawhṭhan caan zarh(3)nak nihin ni caah Bupi nih relding in a kan timhpiak mi Bible cathiang hna cu (Lamkaltu 9:1-20; Jn 6:52-59) an si.

Catholic Khrihfa bupi cawnpiaknak cauk (ccc-319) chungah kan hmuh khawh mi cu “Pathian nih a kan dawt tuk caah zeizong thil vialte hi kan caah a kan serpiak” tiah a kan cawnpiak. Eve le Adam a ser hna hlaan ah an herh hnga dingmi kha Pathian nih a rak ser chung cia hna. Gen 2:7 “Bawipa Pathian nih vawlei khan tlak tlawmpal a lak i mipa a ser. Nunnak petu thaw kha a hnar chungah a chuah hnawh i mipa cu a hung nung” tiah kan hmuh khawh. 

Bupi cawnpiak nak (ccc-375) “Eve le Adam nih Pathian laksawng nganbik an co mi cu Pathian i nunnak thaw kha a si” tiah a ti. Cu nunnak thaw cu a thi kho lomi nunnak thaw a si i sertu Pathian lawnglawng nih a ngeih mi a si. Cu nunnak thaw cu hell chung zongah a thi kho lo i van ram zongah a thi kho ti lomi Pathian pekmi nunnak thaw a si. Pathian nih Eve le Adam cu a dawt tuk hna caah Eden dum chungah an ca i an herhmi thlai kho le thingthei phun kip kha a khoh ter i an caah a timhpiak hna. Sihmanhsehlaw, Adam le Eve nih hin ‘an ka daw maw daw lo. ka bia hi an ngai maw ngai lo timi hngalhnak’ caah Eden dum chungah cun chia ṭha theidan khawhnak thingkung, asiloah, nunnak le thihnak thingkung tiin dum lai fang ah cun thingkung phun hnih cu Bawipa nih a khoh ter i a chiah piak hna. 

Satan tukforhnak ruangah thihnak thing kung thei cu an ei caah Pathian bia cu an buar i Pathian sin in an i ṭhen. Pathian sin in an tlau cang. Cucu Pathian bia nih ‘thihnak’ tiah a kan cawnpiak mi cu a si. Gen 3:9 ah “Pathian nih mipa khuazei ah dah na um” tiah a si. A ruang cu thihnak thingthei an ei khawh hnu in Pathian he an i ṭhen timi a langhter. 

Bupi cawnpiak nak (ccc-1031-1035) chungah “Hell ram timi cu Pathian he zungzal i ṭhennak dan in kha a si” tiah a ti. Gen 3:22-23 chungah “Bawipa Pathian nih khan aa thawh i, a tu cu mipa hi a ṭha le ṭha lo a hngalh ve cang caah nunnak thingkung a banh sual lai i a thei hi a ei lai i zungzal in a nung sual ko lai” a ti caah Eden dum khan a ṭhawl hna ti kha kan hmuh khawh. 

Rul hamhnak, cuk nak le rul siivai in a thi mi minung nih nunnak petu sii le ai kha a si. Nunnak thingkung banh i a thei ei lai a phannak cu Pathian nih a tinhmi a caan rikhiah a phanh rih lo ca tu ah khan a si i, sertu Pathian nih ai tinh mi ni le caan a phak tikah cun cu nunnak thingthei cu Thiang Thlarau thawngin nu Mary paw chungah hmunhma lak in thei a tlai. Cucu kan Bawipa Jesuh Khrih cu a si. 

Jn 6:53b-54 “Mi Fapa i ka sa hi nan ei i ka thi hi nan ei lo ah cun nan chungah nunnak nan ngei kho lai lo. Ka sa a ei i ka thi a ding mi paoh nih zungzal nunnak an ngei i hmahnungbik ni ah nunnak ah ka thawhter hna lai” tiah kan Bawipa Jesuh Khrih nih fiang tein a kan cawnpiak. 

Nunnak ngeih timi cu vancung ram co kha a si i Bupi nih a kan cawnpiak ning ah (ccc-1023-1024) ah “Vancung ram timi cu thil ṭha a tlinnak hmun a si i a zungzal in Pathian mithmai ceu dawh hmuh khawhnak hmun a si” tiah a kan cawnpiak. 

Dawtmi u le nau hna, rul cuknak siivai in kan dam khawhnak hnga ding caah nunnak thingkung cu zumhnak in kan banh i a thei cu kan ei ko ah cun Pathian biakamh mi ram cu ka co ko lai caah Pathian cu lunglawmhnak in thangṭhat zungzal ko hna u sih.