Pathian Thlarau bia a ngaimi Filip nih Ethiopia pa khamhnak lam a hmuh sak khawh

Nihin ni caah Bupi nih a kan thimpiak mi cathiang hna cu (Lamkaltu 8:26-40; Jn 6:44-51) hna hi an si. 

Voikhat nak kan relmi lamkaltu chungah Filip le Ethiopia pa kong hi kan hmuh. Khrihfa upa pakhat a simi, Thiang Thlarau he a khat mi, zultu hna nih anmah rian bawmtu dingah an thimmi ah aa tel ve mi a si i a nih cu Samaria mi hna umnak ah a kal. Cu mi hna sinah cun Filip nih thawngṭhabia a phuan i mi tampi zong nih kan Bawipa Jesuh Khrih kha an zumh tikah Khrihfa an hung si hna. 

Nikhat cu Bawipa vancungmi pakhat Filip sinah a lang i “thlanglei thetse rawn ah vung kal tuah. Jerusalem in Gaza ah a kalmi lam kha va zul tuah” tiah a ti. Filip nih ‘zei ruangah dah ka kal lai’ tiin zei hmanh bia a hal lo. Vanmi nih a chimmi bia bantuk tein khan vanmi bia cu a ngai i a kal ko. Ethiopia mi rangleng pakhat cungin a rat kha a hmuh tikah Thiang Thlarau nih Filip kha ‘rangleng lei ah khan va kal law va naih deuh tuah. A sin ah cun va kal tuah’ tiah a ti i ranglei lei ah cun Filip nih a va naih i a kal ve. Ethiopia pa cu bawi pakhat zong a si i Siangpahrang nu phaisa keng pakhat zong a si. 

Ranglei kam a kal lio ah mipa nih Isaih cauk chung in cathiang a rel lengmang mi kha a theih. “Amah cu thah awkah hruaimi tuu bantuk a si. Amah cu a hmul an meh tikah a awn au lomi tuufa bantuk a si. Bia kaa khat hmanh chim lo tein a um ko. Ningzahnak kha a in, chanhtu ahohmanh a ngei lo. Hi vawlei ucng a nunnak cu a dongh cang caah a tefa hna kong kha ahohmanh nih an chim kho lai lo” timi kha rel tikah cu a bawip nih cun Filip kha a thawh i “Profet nih hin aho kong dah a chim, ka chim tuah; amah kong maw aa chim, midang kong dah a chim?” tiah a ti. Cutikah Filip nih a vun thawh i ‘kan Bawipa Jesuh Khrih kong kha hi bia nih hin a chimmi cu a si’ ti kha fiang tein a chimh. Cutik ah Filip zong cu Ethiopia pa nih hi Bible kong theih a duh tikah a rangleng cungah a kai ter i, mah cathiang kong cu an i ceih i Filip zong nih caan ṭha aa lak i fiang lak in a chimh tikah Thiang Thlarau nih cu pa lungthin chungah rian a vun ṭuan ve i ti umnak an phanh tikah ‘tipilnak’ in ding in a hal. Ethiopia pa nih cun “hi ka ah hin ti a um ko hih. Zeinih dah tipil in a kan donh lai. Hi ka ah hin ti a um ko hih” tiah Filip kha a ti tikah Filip nih a thawh i ‘a ṭha’ na lungthin dihlak in kan chimh mi Jesuh Khrih cu na zumh a si ahcun tipil nak cu na in ko lai tiah a ti. Cu pa nih cun “Ka zumh, Jesuh Khrih cu Pathian Fapa a si” ti hi ka zumh ko a ti tikah an pahnih cun ti chungah cun an vung ṭum i Filip nih cu pa cu tipilnak a pek timi kha kan hmuh mi cu a si.

Khrih ah dawtmi u le nau hna, Ethiopia pa khamhnak a hmuh nak hnga ding caah Filip cu Thlarau nih a hruai mi kan hmuh tikah khuaruahhar ngai mi asi. Pathian rianṭuannak timi hi hi bantuk hi a si. Filip zong aa lawm, Ethiopia pa zong lunglawmhnak in a khat ve. “Khamhnak thawngṭha hi Afarica ah ka va kal lai i a Siangpahrang nu le a miphun vialte ka va chimh hna lai” timi hi zumh a um ṭheo mi a si. 

Kannih zong Khrih khamhnak thawngṭha kan co tikah hin kan lungthin chungah zeibantukin dah rian a ṭuan. Jesuh Khrih khamhnak thawngṭha kha Khrih a thei rih lomi hna sinah chim awk zong rian kan ngei ve timi hi philh hlah u sih. Filip zong zeitluk in dah a lung aa lawmh hnga. Pathian nawl a ngeih caah, Thiang Thlarau nih a hruai bantuk tein a um caah, a nun caah zum lo tu Ethiopa zong kha Jesuh Khrih sinah a hruai i Jesuh Khrih khamhnak thawngṭha a co ter. Pathian fanu fapa cannak nawl a pek timi zong hi nihin kan relmi cathiang chungah kan hmuh khawh mi a si. 

Khrih ah dawtmi u le nau hna, nihin ah kannih zong Filip bantukin, Thlarau aw kan ngeih i Pathian bia kan ngeih i a Bible biathiang in Bawipa nih bia a kan ruahmi kan theihmi hi zum lo tu, Khrih dawtnak a thei rih lomi hna, Khrih khamhnak thawngṭha a co rih lomi hna, Khrih khamhnak thawngṭha an nunnak ah ai fiang rih lomi hna, Pathian fanu fapa ka si tiah ai fiang rih lomi hna kan Bawipa Jesuh Khrih sinah a hruai kho mi, Khamhnak thawngṭha a theihter kho mi a co ter kho mi fanu fapa kan si khawh nak lai thazang pek kan duh hna.