Africa ah a ni sarihnak: Pope nih Angola mi hna cu hringtu nu nih a ngeihmi dawtnak lungthin he nunthar i thawk dingin a sawm hna

Pope Leo XIV Africa ram a ni sarihnak ni khualtlawnnak ah Kilamba khua ah Mass a tuah i Angola khua Mamã Muxima Biakinn ah Rosary thlacam hruainak zong a tuah.

Kilamba khua Missa tuahnak

A hmasa bik puai cu Angola khualipi in meng 30 tlukhrawng aa hlatnak khuapi sernak caah timhtuahnak Kilamba ah a Missa a si. April 19, Zarhpi ni ah Africa hmun dangdang in a ra mi mi tampi cu khua can a lin tuk ko nain Pope Missa tuahnak ah cun lungtho ngai in an an i tel cio hna. 

Phungchimnak ah, Pope nih: Thawhṭhan hnu Emmaus khua lei a kal mi lamkaltu hna Jesuh he aa i tong ko nain an hngalh lonak kong he pehtlai in a chim.

Pope nih: “Thawngthabia a hramthawknak kan rel mi he pehtlai in kan zoh tikah Angola tuanbia hi aa dawh nain hliamhma a tuarmi, ruahchannak, daihnak le unau sinak caah a rawl a ṭammi le a ti a halmi, a langhtertu bantuk a si kha ka hmuh” tiah a ti.

“Zultu hna nih an Bawipa cungah a tlungmi thil kong kha ngaihchia ngai in an i ruah an i chawnhbiaknak nih [Angola rammi hna zong nih caan saupi chung ramchung ah a cangmi ralpi nih a chuahtermi fahnak an in tuarmi kha a kan hngalhter ṭhan” tiah a ti.

Pope nih Angola mi hna kha “nun thar in zeizong te thawk ṭhan dingin” a forh hna. Bawipa nih a zultu hna cungah a tuah bantukin an cungah Bawipa nih zaangfahnak he an um pi zungzal ve ko hna lai a ti. Missa a dih in hna ah Regina Coeli “Maw Van Siangparhang nu” timi thlacamnak kha aa pum mi mipi he an cam ṭi.

Mamã Muxima Biakinn ah Rosary thlacamnak

Chunhnu ah zumtu thong hra leng cu Angola ram ah minthang bikmi thlacamnak hmun Muxima ah Pope he Rosary thlacam ṭi dingin an i pum. Luanda in meng 130 hrawng aa hlatnak ah, Mamã Muxima biakinn a um. Mamã Muxima timi sullam cu “Lungthin Nu”(Mother of heart) tinak a si.

Fr Daniel Malamba, Divine Word Missionary nih “Angola ram i zumtu hna caah cun Mamã Muxima cu an zeizong te a si ko” tiah a ti. Angola biaknak lei le zumhnak cu Bawinu Mary an dawtnak cungah fek tein aa hngatmi a si caah mi tampi nih Pope cu Bawinu he hmunkhat ah hmuh an duh nak zong a si a ti.

Zumtu tampi nih Mamã Muxima upat peknak ah Pope he hmunkhat ah i tel khawhnak caantha an hmuh caah an i lawmhnak an langhter cio. “Kan thlacamnak hna kha a kan ngaih piak i kan tonmi buaibainak hna zongah Bawinu nih a kan um pi peng” tiah khualtlawng pakhat a si mi Conceição António nih a chim.

Puai lio ah bawmchantu volunteer pakhat a simi Fernanda nih a chimmi cu, mi tampi cu puai hlan pi ah an rak phan cio hna i Pope donnak ding caah timhtuahnak ngeih in thlam ah an i riah cia hna tiah a ti.

Marian thlacamnak dih hnu ah, Pope nih aa pummi hna sinah Rosary thlacamnak nih “mi vialte kha kan nu hna dawtnak lungthin in dawt thiamnak-a hleiin sifak bikmi hna an siṭhatnak caah mah le mah i pekchanhnak a kan ngeihter” tiah a ti hna.

Pope nih: “raldohnak, dinlonak, sifahnak le ziknawh eihmuarnak in a luatmi vawlei a si khawhnak hnga caah riantuan dingin” mino hna sinah forhfial nak zong a chim. “Raltuknak in siloin Dawtnak in teinak hmuh a si” tiah a ti hna.