Chikhat harnak lonhnak caah Jesuh a panh mi ka si sual maw?

Nihin ni caah Bupi a kan thim piak mi cathiang hna cu (Lamkaltu 6:8-15; Jn 6:22-29) hna hi an si. Hi cathiang hna chungin thlarau thazang i lak hna u sih. 

Jesuh Khrih nih minung 5000 rawl a dangh hna hnu ah rili khaṭe lei ral a um mi Capernaum khua ah a kal. Mipi nih Jesuh khawika a kal an theih lo tikah an kawl i Capernaum khua i a um kha an theih tikah an sin an rak fuh i: “Bawipa, zeitikah hi ka ah hin na phak” tiah an ti i Jesuh nih “Nan ka kawl hi ṭhawnnak in thil ka tuah mi nan hmuh caah a si lo. Changreu khim tein nan ei ruangah a si” tiah a ti hna. 

Khrihfa a si mi nang le kei nih Jesuh Khrih hi a phunphun in kan kawl i kan fuhpanh cio. Harnak kan ton caan ah siseh, ngeihchiatnak kan ton caan ah siseh, sunghtlaknak kan ton caan ah siseh, lawmh caan ah siseh Bawipa Jesuh hi kan fuh-panh cio tawn hna. 

Nihin kan relmi chungin kan hmuh khawh mi hna nih Jesuh an kawl ning cu vawlei ti-rawl caah an kawl timi kha fiang tein kan hmuh mi a si. Pathian kan thangṭhat tikah siseh, kan biak tikah siseh, Pathian rian kan ṭuan tikah siseh, kan hawi cungah ṭhatnak kan tuah tikah siseh, midang thil kan ṭhenh hna tikah siseh, zei bantuk lungput in dah kan tuah i kan pek hna timi hi a biapi tuk mi a si. Minung nih cun leng lei hi kan zoh tawn i Pathian nih cun chunglei hi a zoh ti kha Bible thiang chungah fiang tein kan hmuh mi a si. 

Nihin Jesuh a kawl tu hna hi zungzal nunnak caah si loin chikhat vawlei nuamhnak, paw khimnak ca lawng, chikhat te harnak hlohnak ca lawng ah a kawlmi lawng te an si ti kha kan hmuh khawh fawn. 

Dawt mi u le nau hna, Jesuh hi piatana pakhat le phisin nak ah siloin zungzal kan Pathian le kan Bawipa ah aa thaih i amah hnu a zul kho i zumtu ṭha kan si khawhnak hnga ding ca zongah thazang pek kan duh hna. 

Pahnih nak ah “Jesuh nih zungzal nunnak caah rianṭuan u” tiah a ti. Mithiang Paul nih Khrihfa hna ca a kuat hna tikah ‘Pathian nih khamhnak hmu hna seh ti a duh’ a ti. Mi vialte nih khamhnak kan hmuh khawhnak ding kha Bawipa nih a duh mi cu a si. Cun Paul ṭhiamṭhiam nih Efesa Khrihfa hna sinah ca a kuat hna tikah: “Bawipa lung a lawmhter tu thil kha kawl i zuam u” a ti. 

Nang le kei nihin kan nunnak ah vawlei chawva ah siseh, vawlei pumsa duhnak, nuamhnak, vawlei sunparnak ah kan nunnak, kan caan sunglawi kan pe sual maw? Hi a rawk kho mi rawl caah a cawl cang mi kan si sual maw? Mi zapi nih Jesuh cu an kawl ko, an panh ko. Sihmahsehlaw, “Kei cu Vancung in a rungṭum mi nunnak changreu ka si” tiah a ti hna tikah an zum duh lo. Zeitindah a thi le sa cu a kan pek khawh lai tiah an zai i an kir tak dih ti kha kan hmuh khawh.  

Cuasicaah Jesuh kan zulh mi hi, vawlei pumsa duhnak, piahtana phisinnak ca lawngah siloin zungzal nunnak ca i Jesuh a kawl mi fanu fapa ṭha kan si khawhnak hnga i zuam u sih. Cucu Pathian nih a kan duhpiak mi rian cu a si. Jesuh nih: “Pa nih a duhmi cu a thlahmi zumh hi a si” a ti. Jesuh kan zumh timi cu amah hnu kan zulh kha a si. A duhnak kan tuah kha a si. Sualnak kan huat i, sualnak kan kaltak i a duhnak bantuk tein nifatin kan nunnak ah amah Thiang Thlarau sawm buin amah hnu zulh kha a si. A vailam tah put buin amah hnu kan zulh kha Pathian duhnak kan tuah cu a si.